Amato 14 - Mbeti ti Nzapa - Tënë so amu fini

¹ Wali ti ndara ayeke leke sewa ti lo nzoni; me wali ti buba ayeke buba ya ti sewa, lo wani.

² Zo so sarango ye ti lo ayeke na legeni, lo yeke kpe mbeto ti KOTA GBIA; me zo so ayeke mu lege ti kirikiri, lo baa KOTA GBIA tongana mbumbuse ye.

³ Na ya ti atënë ti zo ti buba, atënë ti baba laa ayeke sigigi daa; me atënë ti azo ti ndara ayeke bata ala.

⁴ Zo so ayeke na abagara ti fango na yaka pepe, ya ti gogoro ti lo angba senge; me zo ayeke wara gba ti kobe ndali ti angangu bagara.

⁵ Zo so ayeke na tere ti mbeni tënë si mo lingbi ti zia be ti mo na ndö ti lo, lo yeke tene mvene pepe; me zo so ayeke tene mbeni tënë nde na so lo yeke fade na tere ni, lo yeke du gi mvene.

⁶ Zo ti hengo ndo ayeke gi ti wara ndara, me lo lingbi ti wara ni pepe; zo ti hingango ye ayeke manda ye hio mingi.

⁷ Kpe yongoro na tere ti zo ti buba, ngbanga ti so mbeni nzoni ye titene lo fa na mo ayeke daa pepe.

⁸ Zo ti hango le ayeke sara hange na lege ti dutingo ti lo: so zo ti ndara laa. Me zo ti buba ayeke handa azo: so zo ti buba laa.

⁹ Azo ti buba ayeke sara sioni ye, me tënë ni ayeke so ala oko pepe. Ti azo so sarango ye ti ala ayeke na legeni, ala yeke sara nzoni be na popo ti ala.

¹⁰ Vundu ti be ti zo, lo wani laa lo hinga ni; ngia ti be ti lo, mbeni zo nde alingbi ti kangbi ni na lo pepe.

¹¹ Fade a yeke kungbi na sese da ti azo ti sioni; me azo so sarango ye ti ala ayeke na legeni, da ti ala ayeke si singo na anzoni ye.

¹² Mbeni zo alingbi ti baa ti lo atene, lege ti sarango ye ti ni ayeke mbirimbiri, andaa ayeke lege so ague na kuâ.

¹³ Mbeni zo alingbi ti he ngia, me na be ti lo kâ tënë ayeke so lo. Na ndani, ngia alingbi ti ga vundu.

¹⁴ Zo so sarango ye ti lo ayeke kirikiri, fade lo yeke wara ye ti pekoni. Zo ti nzoni ayeke baa nzoni ahon lo.

¹⁵ Zo so le ti lo ahan pepe, lo yeda na atënë so kue a tene na lo; me zo ti hango le agbu li ti lo kozo si lo gue na mbeni ndo.

¹⁶ Mbeto ti sioni ye ayeke sara zo ti ndara; lo yeke kpe lege ni. Me zo ti buba alondo ti sara ye hio hio, ngbanga ti so lo baa lo tene, mbeni ye ti sioni ti si na ni ayeke daa pepe.

¹⁷ Zo so ayeke sara ngonzo hio hio, lo yeke sara aye ti buba. Be ti azo ake zo ti sarango ye na mayere.

¹⁸ Azo so le ti ala ahan pepe, fade buba ayeke ga ye ti ala; me ye so azo ti hango le ayeke wara ayeke hingango ye.

¹⁹ Fade asioni zo ayeke kuku na gbe ti azo ti nzoni si azo ti sioni ayeke ku na yanga-da ti azo ti nzoni.

²⁰ Azo ake wayere, ataa akamarade ti lo; me azo so aye zo ti mosoro ayeke mingi.

²¹ Zo so abaa mba ti lo tongana mbumbuse zo, andaa lo sara siokpari; me ti lo nzoni, zo so ayeke baa mawa ti awayere!

²² Zo so aleke na be ti lo ti sara sioni ye, lo girisa lege biani. Me zo so aleke na be ti lo ti sara nzoni ye, azo ayeke sara nzoni be na lo si ala yeke zia be ti ala na ndö ti lo.

²³ Kua kue, futa ni ayeke daa; me zo so ayeke diko gi atënë senge senge, lo yeke ga wayere.

²⁴ Mosoro ayeke nzoni ye so azo ti ndara ayeke wara; me ye ti buba ti azo ti buba ayeke gi ye ti buba.

²⁵ Zo so ayeke na tere ti mbeni tënë si mo lingbi ti zia be ti mo na ndö ti lo, lo yeke soo fini ti azo; me zo so ayeke du mvene, lo yeke zo ti handango azo.

²⁶ Zo so ayeke kpe mbeto ti KOTA GBIA, sioni ye oko ayeke si na lo pepe; KOTA GBIA ayeke ndo ti batango tere ti amolenge ti lo.

²⁷ Kpengo mbeto ti KOTA GBIA ayeke tongana li ti ngu so ayeke mu fini na zo; ayeke sara si zo akpe aye ti sioni so aye ti gbu lo tongana kuku si ayeke fâ lo.

²⁸ Iri ti gbia ti mbeni kodro ayeke gue na nduzu tongana azo ti kodro ti lo ayeke gbani gbani; kodro so azo ayeke daa pepe, gbia ni ati awe.

²⁹ Zo so asara ngonzo hio hio pepe, lo hinga ndo mingi; me zo so be ti lo ayeke wâ wâ, lo yeke fa buba ti lo na le ti azo.

³⁰ Be so ayeke na siriri ayeke mu nzoni tere na zo; me sarango mbanda ayeke tongana mbeni sioni kobela so ayeke te zo na ya ti bio.

³¹ Zo so asara ngangu na wayere, lo zonga Nzapa so asara lo; me zo so abaa mawa ti zo ti mawa, andaa lo ne Nzapa.

³² Zo ti sioni ayeke ti ndali ti sioni sarango ye ti lo; ti zo ti mbirimbiri, ataa lo gue ti kui, be ti lo awoko pepe.

³³ Ndara ayeke duti na be ti zo ti hingango ndo. Me alingbi ti wara ndara na popo ti azo ti buba laa?

³⁴ Sarango ye ti mbirimbiri amu iri ti kodro na nduzu; me siokpari ayeke ye ti kamene ndali ti amara.

³⁵ Be ti gbia anzere na zo ti kua so ahinga kua ti lo; me lo yeke sara ngonzo na tere ti zo ti kua so azia kamene na le ti lo.