Amato 10 - Mbeti ti Nzapa - Tënë so amu fini

* Amato nde nde ndali ti nzoni lege ti dutingo ti zo

¹ *Amato ti Salomon. Molenge ti ndara ayeke mu ngia na babâ ti lo; me molenge ti buba ayeke zia vundu na be ti mama ti lo.

² Amosoro so zo awara na lege ti sioni ayeke sara nzoni na lo pepe; me sarango ye ti mbirimbiri ayeke zi zo na ya ti kuâ.

³ KOTA GBIA ayeke zia zo ti mbirimbiri ti kui nzara pepe; me lo yeke gbanzi lege na zo ti sioni ti wara ye so lo sara nzara ni.

⁴ Zo so maboko ti lo ane na kua, lo yeke ga wayere; me zo so maboko ti lo ayapu na kua, lo yeke ga zo ti mosoro.

⁵ Zo so abongbi ale ti kobe na ngoi ti fango le ni, lo yeke zo ti ndara; me zo so alango na ngoi ni so, a yeke baa lo tongana mbumbuse zo.

⁶ Tufa ayeke ga na ndö ti zo ti mbirimbiri; me atënë ti zo ti sioni ahonde aye ti sarango ngangu na zo.

⁷ Zo ti mbirimbiri, be ti azo ayeke girisa na lo pepe; me ti zo ti sioni, be ti azo ayeke girisa na lo biani biani.

⁸ Zo so ayeke na nzoni gbungo-li, lo yeke yeda na andia so a fa na lo; me zo so ayeke diko abuba tënë, lo yeke gi titene gigi ti lo abuba.

⁹ Zo so sarango ye ti lo ayeke na legeni, ye ti sioni alingbi ti si na lo oko pepe; me zo so ayeke sara ye na lege ti mayere, fade azo ayeke sigigi na nda ti lo.

¹⁰ Zo so ate le na amba ti lo, lo zia vundu na be ti azo; me zo so ayeke diko abuba tënë, lo yeke gi titene gigi ti lo abuba.

¹¹ Atënë ti zo ti mbirimbiri ayeke tongana li ti ngu so ayeke mu fini na zo; me atënë ti zo ti sioni ahonde aye ti sarango ngangu na zo.

¹² Kengo zo ayeke du papa; me ndoye ayeke kanga ndö ti sioni ye kue.

¹³ Atënë ti ndara asigigi na yanga ti zo so ahinga ye; me ti zo so li ti lo ayeke daa pepe, lo lingbi gi na pika.

¹⁴ Azo ti ndara abata hingango ye ti ala tongana mosoro; me atënë ti zo ti buba ayeke buba ndo hio.

¹⁵ Amosoro ti zo ti mosoro ayeke tongana ngangu gbagba na tere ti lo; me mawa ti wayere ayeke buba lo.

¹⁶ Futa ti zo ti mbirimbiri ayeke sara titene lo ngba na fini; me futa ti zo ti sioni ayeke gue na lo na lege ti siokpari.

¹⁷ Zo so ama wango, lo yeke mu lege ti fini; me zo so ake titene a gboto mê ti lo, lo girisa lege.

¹⁸ Zo so ahonde tënë ti kengo amba ti lo, lo yeke zo ti tenengo mvene; zo so adu mvene na li ti azo, lo yeke zo so li ti lo ayeke daa pepe.

¹⁹ Zo so ayeke diko atënë gbani gbani, gbaa lo yeke sara sioni; me zo so ayeke bata yanga ti lo, lo yeke zo ti ndara.

²⁰ Atënë ti zo ti mbirimbiri ahon wen ti nginza ti nzoni ni; atënë ti be ti zo ti sioni ayeke ye oko pepe.

²¹ Atënë ti zo ti mbirimbiri ayeke sara nzoni na gba ti azo; me azo ti buba ayeke kui, ngbanga ti so li ti ala ayeke daa pepe.

²² Tufa ti KOTA GBIA laa ayeke sara si zo awara mosoro; ngangu so zo asara azia ye oko daa pepe.

²³ Ti zo ti buba, sarango sioni ayeke tongana ye ti ngia ti lo; me ti zo ti hingango ndo, ndara ayeke tongana ye ti ngia ti lo.

²⁴ Ye so zo ti sioni asara mbeto ni, ni laa ayeke si na lo; me ye so azo ti mbirimbiri aye, a yeke mu ni na ala.

²⁵ Tongana ngangu pupu ahon awe, zo ti sioni ayeke daa mbeni pepe! Me zo ti mbirimbiri aluti ti lo ngangu lakue.

²⁶ Tongana ti so kpingo ye asara pembe ti zo si guru asara le ti zo, zo ti sopo ayeke sara nga tongaso na wa ti lo.

²⁷ Kpengo mbeto ti KOTA GBIA asara si gigi ti zo ague, ayo; me azo ti sioni ayeke kui hio mingi.

²⁸ Ye so azo ti mbirimbiri alingbi ti ku ayeke ngia; me ye so azo ti sioni azia be ti ala ti ku, ala yeke ku ni gbaa.

²⁹ Lege ti KOTA GBIA ayeke tongana ngangu gbagba na tere ti zo so sarango ye ti lo ayeke na legeni; me lege ni ayeke buba fini ti azo ti sarango sioni.

³⁰ Mbeni ye ti kinda zo ti mbirimbiri ayeke duti daa pepe; me azo ti sioni ayeke ngba na ya ti kodro ni pepe.

³¹ Atënë ti ndara ayeke sigigi na yanga ti zo ti mbirimbiri; me fade a yeke fâ menga ti azo ti tenengo mvene.

³² Zo ti mbirimbiri ayeke tene tënë na nzoni be; me azo ti sioni ayeke tene gi mvene.