Amato 1 - Mbeti ti Nzapa - Tënë so amu fini

¹ *Amato ti Salomon, molenge ti David, gbia ti Israel.

Nda ti mbeti so

² Nda ti amato so ayeke ti fa na zo lege ti sarango ye na ndara nga na lege ti sarango ye alingbi na anzoni wango so a mu na lo. Amato ni ayeke mu lege na zo ti ma gbe ti atënë so ane mingi.

³ Ala yeke fa na zo lege ti nzoni hingango ndo, lege ti sarango ye ti mbirimbiri, ti kpengo ndia nga na ti sarango ye na legeni.

⁴ Amato ni ayeke sara titene zo so le ti lo ahan pepe, le ti lo ahan; ala yeke sara nga titene amaseka ahinga ndo si ala wara nzoni gbungo-li.

⁵ Zo ti ndara so ayeke ma amato so, fade hingango ye ti lo ayeke kono ahon ti kozoni; zo so ahinga ndo, fade lo yeke manda anzoni kode so ayeke fa na lo nzoni lege.

⁶ Lo yeke ma ya ti ambeni mato so atënë ni ali, lo yeke ma gbe ti ambeni tënë so ane si lo yeke ma ya ti akpengbango tënë ti azo ti ndara.

⁷ Kpengo mbeto ti KOTA GBIA ayeke tongo nda ti hingango ye. Gi azo ti buba laa abaa ndara na anzoni wango na le ti ala tongana mbumbuse ye.

Hange na asioni kamarade

⁸ Molenge ti mbi, mo ma wango ti babâ ti mo; aye so mama ti mo ayeke fa na mo, mo bi na peko ti mê ti mo pepe.

⁹ Fade aye ni ayeke duti tongana pendere kpoto na li ti mo wala tongana pendere ye ti go na go ti mo.

¹⁰ Molenge ti mbi, tongana asioni kamarade aye ti handa mo titene mo sara sioni, ayeke nzoni mo ke.

¹¹ Ala lingbi ti tene na mo: “Ga na peko ti e! E gue, e honde tere ti e titene e fâ azo so ayeke hon na lege. Azo so asara ye oko na e pepe so, e fâ ala senge senge!

¹² E mene ala na fini ni tongana ti so du ti kuâ ayeke mene akuâ; e mene ala na ngbongboro ni, titene ndo ti akuâ ni amene ala.

¹³ Fade e yeke wara aye nde nde ti ngangu ngere si ya ti ada ti e ayeke si singo na aye so e gbu.

¹⁴ Ga, mo yeke wara ti mo aye ni nga. E kue, e yeke duti gi na bozo ti nginza oko!”

¹⁵ Molenge ti mbi, mo na azo tongaso atambula pepe, mo na ala afono pepe.

¹⁶ Biani, ala yeke mu loro ti gue ti sara sioni; ala yeke nduru nduru ti tuku mene.

¹⁷ Tongana zo abi gbanda si ndeke abaa lo na bingo ni, fade ndeke ni ayeke ti na ya ti gbanda ni pepe.

¹⁸ Me ti azo ti fango azo ni, ala bi gbanda ndali ti ala wani, ala honde tere ti ala ti sara sioni na ala wani.

¹⁹ Biani, azo so ayeke wara ye na lege ti nzi, baa ye so ayeke ku ala laa: a yeke zi fini ti ala.

Ndara ato mbela ti iri azo ti buba

²⁰ Ndara ayeke dekongo na ndö ti alege, lo yeke tene tënë na kota go na ndo so azo ayeke bongbi daa.

²¹ Lo iri ndo na ndo so azo abongbi daa gbani gbani. Lo to mbela na atënë ti lo na ndo so azo ti gbata ayeke leke ka atënë ti ala daa, lo tene:

²² “Ala azo so le ti ala ahan pepe so, ala ye ti ngba tongaso ngbii asi lawa? Ala azo ti hengo ndo, ala yeke ngba ti he ndo ngbii asi lawa? Ala azo so ahinga ndo pepe so, ala yeke ke ti hinga ye ngbii asi lawa?

²³ So mbi yeke gboto mê ti ala so, ala ma ni si! Tongana ala ma ni, fade mbi yeke sara si yingo ti mbi aga na ndö ti ala, mbi yeke sara si ala hinga tënë ti mbi.

²⁴ Mbi iri ala, me ala ke. Mbi yoro maboko ti mbi na ala, me zo oko abaa ndo daa pepe.

²⁵ Awango ti mbi kue, ala ke ni; mbi gboto mê ti ala, ala yeda pepe.

²⁶ Ndani laa, fade mbi yeke he ala na ngia tongana ye ti ngangu asi na ala; mbi yeke he ala tongana kota mbeto agbu ala.

²⁷ Biani, fade kota mbeto ayeke ga na ndö ti ala tongana kota pupu; ye ti ngangu ayeke ti na ndö ti ala tongana ngangu pupu ti ngu-Nzapa; pasi na ye ti mawa ayeke hon ndö ti ala.

²⁸ Na lango ni so, fade ala yeke iri mbi titene mbi mu maboko na ala, me mbi yeke kiri tënë na ala pepe; ala yeke gi mbi, me ala yeke wara mbi pepe.

²⁹ Aye ni ayeke duti tongaso, ngbanga ti so ala ke ti hinga ye; ala ye ti kpe mbeto ti KOTA GBIA pepe.

³⁰ Ala ye tënë ti awango ti mbi pepe; aye so kue mbi gboto mê ti ala daa, ala baa ni tongana senge ye.

³¹ Fade ala yeke ko lengo ti sarango ye ti ala; apialo ti ala ayeke fun sen na hon ti ala.

³² Ngangu li ti azo so li ti ala ayeke daa pepe laa ayeke fâ ala; kangango le na ndö ti akpale laa ayeke fâ azo so ahinga ndo pepe.

³³ Me zo so ama mbi, mbeni ye ti sioni ayeke si na lo pepe, lo yeke duti kpoo, mbeto ti sioni ye ayeke sara lo oko pepe.”