Ahebro 11 - Mbeti ti Nzapa - Tënë so amu fini

Tënë ti mabe

¹ Mabe ayeke sara titene ye so zo azia be ti lo ti ku ni, lo hinga lo tene, lo wara ni awe. Mabe ayeke sara nga titene ye so le ti zo abaa pepe, lo hinga lo tene, ye ni ayeke daa biani.

² Ndali ti mabe ti akotara ti e, Nzapa atene nzoni tënë ti ala.

³ Na lege ti mabe si e hinga, e tene, dunia abaa gigi na lege ti tënë ti yanga ti Nzapa. So aye ti fa atene, ye so le ti zo ayeke baa, alondo na lege ti ye so le ti zo abaa pepe.

⁴ Na lege ti mabe, Abel amu na Nzapa *sandaga so ayeke nzoni ahon ti Kain. Ndali ti mabe ti Abel, Nzapa atene, lo yeke zo ti mbirimbiri si lo yeda na aye so Abel amu. Na lege ti mabe si Abel angba ti tene tënë laso na e, ataa so lo kui awe.

⁵ Na lege ti mabe, a mu Henok na yayu titene lo kui pepe. Mbeni zo akiri abaa lo pepe, ngbanga ti so Nzapa amu lo awe. Mbeti ti Nzapa atene: kozo titene Nzapa amu lo, Henok aga nzoni na le ti lo.

⁶ Andaa, tongana zo ayeke na mabe pepe, lo lingbi ti ga nzoni na le ti Nzapa pepe, ngbanga ti so zo so aga nduru na Nzapa, alingbi lo hinga so, Nzapa ayeke daa biani si lo yeke mu anzoni ye na azo so ayeke gi lo.

⁷ Na lege ti mabe, Noe ama tënë ti aye so Nzapa atene tënë ni so ayeke si ande si zo ade ti baa ni pepe so. Noe abaa ni tongana senge tënë pepe, nilaa lo leke mbeni kota mangboko so lo na asewa ti lo ali na ya ni titene ala soo kuâ. Tongaso, lo fâ ngbanga na li ti azo ti dunia si na lege ti mabe, lo ga mbirimbiri na le ti Nzapa.

⁸ Na lege ti mabe, Abraham ayeda na iringo so Nzapa airi lo, lo ma yanga ti Nzapa si lo zia kodro ti lo ti gue na mbeni kodro so Nzapa aye ti mu na lo titene aga ti lo. Abraham amu lege ague, ataa so lo hinga ndo so lo yeke gue daa pepe.

⁹ Na lege ti mabe, lo gue, lo duti tongana wande na kodro so Nzapa amu zendo ni na lo. Lo lango na ya ti da ti bongo, lo na Isaac na Jacob, ala so Nzapa amu zendo na ala titene kodro ni aga ti ala.

¹⁰ Abraham asara tongaso, ngbanga ti so lo yeke ku gbata so agere ni ayeke tongana agere ti da so akpengba. Nzapa wani laa ayeke wakode-kua ti gbata ni, lo laa lo leke ni.

¹¹ Na lege ti mabe, Sara awara nga lege ti du molenge, ataa so ngu ti lo ahon mingi. Lo hinga biani lo tene, tongana Nzapa amu zendo, lo yeke bata tënë ti yanga ti lo.

¹² Ndani laa, gi na lege ti zo oko so aga nduru na kuâ awe, a du azo mingi si ala ga gbani gbani tongana atongoro ti le ti nduzu, tongana mbutu ti yanga ti kota ngu-ingo so zo alingbi ti diko ni pepe.

¹³ Azo so kue angba na lege ti mabe si ala kui. Aye so Nzapa amu zendo ni, ala wara ni pepe, me ala ngba yongoro, ala baa ni bango si ala bara ni. Ala hinga biani atene, ala yeke awande, azo ti lege senge na ndö ti sese so.

¹⁴ Azo so ayeke tene tënë tongaso, ala ye ti fa na le ti azo polele so, ala yeke gi mbeni kodro titene aga ti ala.

¹⁵ Tongana be ti azo ni so angba ando na ndö ti kodro so ala londo daa si aga so, ka lege ti kiri kâ ayeke daa.

¹⁶ Me kodro so nzara ni ayeke sara ala so ayeke kodro so ayeke nzoni ahon atanga ni kue, so ti tene kodro ti yayu. Ndani laa kamene asara Nzapa pepe titene ala iri lo Nzapa ti ala. Biani, lo leke mbeni gbata ndali ti ala.

¹⁷ Na lege ti mabe, Abraham amu Isaac na *sandaga na Nzapa na ndembe so Nzapa atara be ti lo. Lo mu oko molenge ti lo na sandaga na Nzapa, ataa so Nzapa amu zendo na lo,

¹⁸ atene: “Na lege ti Isaac laa mo yeke wara *ahale so mbi mu zendo ti ala na mo.”

¹⁹ Abraham atene na be ti lo, atene: ataa zo akui awe, Nzapa ayeke na ngangu ti zingo lo na kuâ. Biani, Abraham akiri awara molenge ti lo, mo baa mo tene, molenge ni alondo na ndo ti akuâ si akiri na fini.

²⁰ Na lege ti mabe, Isaac asara tufa na ndö ti Jacob na Ezau ndali ti gigi ti ala ti kekereke.

²¹ Na lege ti mabe, Jacob asara tufa na ndö ti amolenge ti Joseph ti koli na ndembe so lo ga nduru ti kui. Na pekoni, Jacob akpo li ti lo na ndö ti keke so lo yeke tambula ka na ni si lo voro Nzapa.

²² Na lege ti mabe, Joseph atene na azo ti Israel na ndembe so lo ga nduru ti kui, lo tene, ala yeke londo gbanda na kodro ti Ezipte ti sigigi. Lo mu nga yanga na ala ngbanga ti ye so ala lingbi ti sara na abio ti lo na ndembe so ala yeke londo ti hon.

²³ Na lege ti mabe, babâ na mama ti Moïse ahonde lo nze ota na peko ti so ala du lo. Ala baa so, lo yeke pendere mingi, ala ke mbela ti gbia; mbeto asara ala pepe.

²⁴ Na lege ti mabe, tongana Moïse akono awe, lo ke titene azo airi lo molenge ti molenge ti Faraon ti wali.

²⁵ Lo yeda ti baa pasi legeoko na azo ti Nzapa, ahon titene lo duti na ngia na ya ti siokpari na ya ti kete ngoi.

²⁶ Moïse atene na be ti lo atene, titene azo abaa ni tongana buba zo, tongana ti so ala sara na *Mesii, so ayeke kota ye mingi ahon amosoro ti kodro ti Ezipte. Moïse asara tongaso ndali ti so le ti lo angba na ndö ti futa so lo yeke wara ande.

²⁷ Na lege ti mabe, Moïse alondo na kodro ti Ezipte ti hon; mbeto ti ngonzo ti gbia asara lo pepe. Lo ka yingo, mo baa mo tene, Nzapa so zo ayeke baa lo pepe so, lo yeke baa lo.

²⁸ Na lege ti mabe, Moïse azia na sese *matanga ti Pake. Lo mu yanga titene azo azia mene na tere ti keke ti yanga ti da ti ala si kpale ti bubango ndo andu akozo molenge-koli ti azo ti Israel pepe.

²⁹ Na lege ti mabe, azo ti Israel afâ kota Ngu-bengba, mo baa mo tene, kuru sese laa; me so azo ti Ezipte aye ti hon na peko ti ala, ngu ni amene ala kue.

³⁰ Na lege ti mabe, azo ti Israel atambula, angoro gbata ti Jéricho na ya ti lango mbarambara si na pekoni, gbagba ti gbata ni atuku na sese.

³¹ Na lege ti mabe, Rahab, wali-ndumba, ayamba na ndo ti lo na nzoni be azo ti *bembengo ndo, nilaa na ngoi so azo ti Israel aga ti fâ azo so ake Nzapa, lo kui pepe.

³² Tënë ti nyen laa mbi yeke kiri ti tene? Ngoi atia mbi ti tene tënë kue na ndö ti azo tongana Gédéon, Barak, Samson, Yefte, David, Samuel na awayanga-Nzapa.

³³ Na lege ti mabe, ala tiri bira na ambeni gbia si ala mu kodro ti ala. Ala sara aye ti mbirimbiri, ala wara aye so Nzapa amu zendo ni, ala kanga yanga ti abamara;

³⁴ ala mingo angangu wâ, ala kpe na maboko ti azo so aye ti fâ ala na yongoro zeme, ala kiri awara ngangu na peko ti kobela so asara ala; ala ga akpengba zo ti sarango bira, ala tumba aturugu ti akodro wande.

³⁵ Na lege ti mabe, ambeni wali akiri awara azo ti ala so akui na peko ti so azo ni azingo na kuâ. Ti ambeni, a sara ala sana; me ala ke titene a sigigi na ala na ya ti sana ni ndali ti so ala ye ti duti na fini so ayeke nzoni ahon ti kozoni na peko ti zingongo ti ala na kuâ.

³⁶ A zonga ambeni, a pika ala na fimbo, a kanga ala na zingiri si a bi ala na da ti kanga.

³⁷ A bo ambeni na têne, a fâ ya ti ambeni use use na sii, a fâ ambeni na yongoro zeme. Ala hinga ndo so ala lingbi ti duti daa pepe si ala hon kirikiri, bongo ti ala ayeke gi poro ti tere ti taba wala ti ngasa. Ye kue atia ala, a sara ala sana si a sara ngangu na ala.

³⁸ Ala yeke hon gi kirikiri na ya ti benyama, na ya ti ahoto, ala yeke lango na ya ti adu ti têne, na ya ti adu ti sese. Andaa ala yeke anzoni zo so dunia so alingbi na ala pepe.

³⁹ Nzapa atene nzoni tënë ti ala kue ndali ti mabe ti ala; me anzoni ye so Nzapa amu zendo ni, ala wara ni pepe.

⁴⁰ Biani, Nzapa aleke ndali ti e mbeni nzoni ye so ahon atanga ni. Ndani laa, lo ye titene ala ku si e na ala, e ga nzoni kue legeoko.