Ahebro 10 - Mbeti ti Nzapa - Tënë so amu fini

¹ Aye so ayeke daa, *Ndia ti Moïse ayeke fa ni mbirimbiri kue pepe; Ndia ni ayeke gi limo ti anzoni ye so ayeke ga. Ngu na ngu, azo ayeke mu *sandaga ndali ti asiokpari ti ala, ala yeke mu gi oko sandaga ni lakue lakue; ala yeke zia ni pepe. Ataa so ala yeke sara tongaso, Ndia alingbi ti sara si azo so aye ti ga nduru na Nzapa, aga nzoni kue pepe.

² Azo so ayeke voro Nzapa, tongana a yeke sukula fade asioni ti ala gi fani oko biani biani, ka ala yeke baa tere ti ala tongana azo ti siokpari pepe si ala zia lege ti mungo sandaga awe.

³ Me asandaga so azo ayeke mu so asara si ngu na ngu, ala yeke dabe ti ala na asiokpari ti ala,

⁴ ngbanga ti so mene ti akoli-bagara na ti akoli-ngasa alingbi ti zi siokpari oko pepe.

⁵ Ndani laa, na ndembe so Christ aga lani na ndö ti sese so, lo tene na Nzapa, lo tene: “Sandaga wala mbeni ye so zo amu na mo, so laa mo ye pepe, me mo leke tere, mo mu na mbi.

⁶ Anyama so a yeke gbi ni kue na wâ, wala asandaga so a yeke mu ndali ti siokpari, so laa anzere na be ti mo pepe.

⁷ Tongaso mbi tene: ‘Nzapa, mbi laa! Mbi ga ti sara ye so be ti mo aye, alingbi na tënë so a su na ndö ti mbi na ya ti Mbeti ti Nzapa.’ ”

⁸ Christ atene kozoni, atene: “Asandaga, aye so azo ayeke mu na mo, anyama so a yeke gbi ni kue na wâ nga na asandaga so azo ayeke mu ndali ti asiokpari ti ala, so laa mo ye pepe; aye so anzere nga na be ti mo pepe.” Andaa Ndia ahunda na azo ti mu asandaga ni so.

⁹ Na pekoni, lo kiri lo tene: “Mbi laa! Mbi ga ti sara ye so be ti mo aye.” Tongaso Christ amingo tënë ti akozo sandaga si lo zia mbeni nde na sese: sandaga ti tere ti lo wani.

¹⁰ Jésus Christ asara ye alingbi na ye so be ti Nzapa aye. Lo mu tere ti lo na sandaga gi fani oko biani biani, nilaa a sukula asioni ti e.

¹¹ Na ya ti lango oko oko, wayango-sandaga oko oko kue ayeke luti na nduzu ti sara kua ti lo. Gi oko mara ti asandaga si ala yeke mu, me asandaga so ala yeke mu so alingbi ti zi asiokpari ti azo pepe.

¹² Me ti Christ, lo mu sandaga ni gi fani oko ti zi asiokpari ti azo si na pekoni, lo duti na tere ti Nzapa kpu na kpu, na mbage ti maboko ti lo ti koli.

¹³ Fadeso, Christ ayeke ku titene Nzapa azia awato ti lo tongana mbata ti gbe ti gere ti lo.

¹⁴ Na lege ti oko sandaga so lo mu, Christ asara si azo so lo *sukula sioni ti ala, ala ga nzoni kue kpu na kpu.

¹⁵ Yingo-Vuru atene nga na e tënë na ndö ni. Lo tene kozoni, lo tene:

¹⁶ *Kota Gbia atene: “Mbuki so mbi na ala e yeke sara ni na peko ti alango ni so ayeke so: mbi yeke mu andia ti mbi na ala, mbi yeke su ni na ndö ti be ti ala si mbi yeke su ni na ya ti li ti ala.”

¹⁷ Na pekoni, lo tene: “Fade mbi yeke kiri ti dabe ti mbi na siokpari ti ala oko pepe.”

¹⁸ E hinga so, tongana Nzapa azi tënë na li ti zo awe, zo ni ayeke kiri ti mu sandaga ndali ti asiokpari ti lo pepe.

E gbu mabe ti e ngangu

¹⁹ Tongaso a-ita, ndali ti mene ti Jésus, lege azi na e polele ti li na ndo ti nzoni kue ti Nzapa.

²⁰ Na popo ti ridoo so akangbi ya ti kota da ti Nzapa, Christ azi na e mbeni fini lege so e yeke mu ni ti duti na fini; lo sara so na lege ti tere ti lo ti zo.

²¹ E yeke na mbeni kota wayango-sandaga so a mu na lo komandema na ndö ti da ti Nzapa.

²² Tongaso, e ga nduru na Nzapa na be ti e oko nga na be so asi singo na mabe, be so e hinga, e tene, a *sukula asioni kue daa awe na tere so a sukula ni awe na mbeni nzoni ngu.

²³ Ye so e zia be ti e ti ku si e ngba ti tene tënë ni polele na le ti azo, ayeke nzoni be ti e awoko daa pepe, ngbanga ti so Nzapa ayeke bata tënë ti yanga ti lo si ye so lo mu zendo ti mungo ni, lo yeke mu ni.

²⁴ E baa ndo na ndö ti amba ti e na popo ti e ti pusu e titene e ye azo si e sara anzoni ye.

²⁵ E do abongbi ti e, e zia pepe tongana ti so ambeni zo asara; me e mu wango na popo ti e ahon ti kozoni, ngbanga ti so ala baa so, lango ti Christ aga nduru awe.

²⁶ So e hinga taa-tënë nzoni kue awe so, tongana e ngba ti sara siokpari na be ti e wani, mbeni *sandaga nde ndali ti asiokpari ayeke daa pepe.

²⁷ Me ye so angba ayeke gi ti ku na kota mbeto na be ngbanga ti Nzapa na kota wâ so ayeke gbi azo so ake Nzapa.

²⁸ Ando, zo so ake ti sara ye alingbi na *Ndia ti Moïse, tongana azo use wala ota abaa lo si atene tënë ni, azo ayeke mu zo ni ti fâ lo; mbeni zo ti baa mawa ti lo ayeke daa pepe.

²⁹ Ti zo so abaa Molenge ti Nzapa buba na le ti lo, fade pasi ti zo ni ayeke hon ndoni. Andaa lo baa mene ti *mbuki so asukula asioni ti lo tongana senge ye na le ti lo si lo kiri lo tene sioni tënë na tere ti Yingo so ayeke sara nzoni be na zo.

³⁰ E hinga lo so atene: “Mbi laa mbi yeke kiri sioni na zo so asara sioni; fade zo ni ayeke wara ye ti peko ti sioni so lo sara.” Lo kiri lo tene: “Fade *Kota Gbia ayeke fâ ngbanga ti azo ti lo.”

³¹ Titene zo ati na gbe ti ngbanga ti Nzapa so ayeke na fini, so ayeke ye ti ngangu mingi!

³² Ala dabe ti ala na ye so asi ando na ala: gi na peko ti so Nzapa azi le ti ala, ala baa pasi mingi, me ala kanga be ti ala na ya ti bira ti apasi ni.

³³ Mbeni lâ, azo azonga ala si asara pasi mingi na ala na le ti azo kue. Mbeni lâ, ala sara beoko na azo so abaa nga pasi tongana ala.

³⁴ Biani, ala kangbi mawa ti azo so abaa pasi na da ti kanga, ala yeda na nzoni be titene azo amu aye ti ala na ngangu. Ala sara tongaso, ngbanga ti so ala hinga atene, ala yeke na mosoro so ayeke nzoni ahon ndoni si ayeke ngba lakue lakue.

³⁵ Tongaso, be ti ala so ala zia na ndö ti Nzapa, ala girisa ni pepe, fade ala yeke wara kota ye na peko ni.

³⁶ Alingbi ala kanga be ti ala tongana ala ye ti sara ye so be ti Nzapa aye, ti wara ye so Nzapa amu zendo ni.

³⁷ Tongana ti so Mbeti ti Nzapa atene: “Ngoi angba gi kete, gi kete kete titene lo so alingbi ti ga so, lo yeke ga; lo yeke ninga pepe.”

³⁸ Nzapa atene: “Zo so aga mbirimbiri na le ti mbi na lege ti mabe, fade lo yeke duti na fini. Me tongana lo zia lege ti mabe, fade mbi yeke wara ngia na lege ti lo pepe.”

³⁹ Ti e, e yeke azo so ayeke zia lege ti mabe pepe ngbanga ti e girisa. Me e yeke azo so ama na be ti soo kuâ.