Abia (Psaumes) 88 - Mbeti ti Nzapa - Tënë so amu fini

Mbi ga nduru na kuâ awe

¹ Bia ti azo ti Kore; bia so ayeke ndali ti makonzi-bia. A he ni na ngoli. Bia ti Heman, zo ti mara ti Ezrahi. Bia ti fango ye na zo.

² *KOTA GBIA Nzapa, wasongo mbi! Na kota lâ, mbi yeke dekongo na mo, na bi, mbi yeke toto na dawa ti mo.

³ Ayeke nzoni sambela ti mbi asi na mo! Dingi mê ti mo, mo ma demango tere ti mbi.

⁴ Biani, aye ti mawa ahon ndö ti mbi si mbi ga nduru na kuâ.

⁵ A diko mbi na popo ti azo so aga nduru na kuâ awe, ngangu ti mbi kue ahunzi awe.

⁶ A zia mbi na popo ti akuâ, mbi kpa azo so a fâ ala awe si ala yeke lango na ya ti du ti kuâ; azo so be ti mo agirisa na ala awe si ala kangbi na mo awe so.

⁷ Mo zia mbi na ya ti du so ali mingi, na ndo so avuko pitipiti, na ya ti du so zo alingbi ti baa ngbonda ni pepe.

⁸ Ngonzo ti mo ane na ndö ti mbi, *amapo ti mo amene mbi kue.

⁹ Mo tumba amba ti mbi yongoro na tere ti mbi, mo sara si mbi ga sioni na le ti ala; a kanga mbi, mbi gi lege ti sigigi gbaa.

¹⁰ Pasi so asi na mbi avuko le ti mbi awe. KOTA GBIA, lakue mbi yeke iri mo ti mu na mbi maboko, mbi yo maboko ti mbi na nduzu na mbage ti mo.

¹¹ Fade mo yeke sara ye ti kpene ndali ti akuâ? Fade akuâ ayeke londo ti sepela mo? Luti kete

¹² Na ya ti du ti kuâ, zo alingbi ti tene tënë ti nzoni be ti mo? Na ndo ti akuâ, zo alingbi ti tene tënë ti mbirimbiri ti mo?

¹³ Ye ti kpene so mo sara, zo alingbi ti hinga ni na ya ti vukongo ndo? Batango tënë ti yanga ti mo so mo yeke bata, zo alingbi ti hinga ni na kodro ti akuâ?

¹⁴ Me ti mbi, mo laa mbi yeke dekongo na mo KOTA GBIA! Na ndaperere, sambela ti mbi asi na dawa ti mo.

¹⁵ KOTA GBIA, mo ke mbi ngbanga ti nyen? Mo honde le ti mo na mbi ngbanga ti nyen?

¹⁶ Ti londo na ndembe so mbi de molenge ngbii asi laso, mbi yeke zo ti mawa, mbi ga nduru na kuâ; mo sara si aye ti mbeto ahon ndö ti mbi, li ti mbi kue akpe si tënë ahunzi na yanga ti mbi.

¹⁷ Ngonzo ti mo ti wâ ahon na ndö ti mbi, mbeto so mo zia na be ti mbi apete mbi na sese.

¹⁸ Lakue, aye ni so angoro mbi tongana ti so ngu ayeke ngoro zo; mbage na mbage kue, ala kanga ndö ti mbi.

¹⁹ Amba ti mbi na azo so mbi na ala e ye tere, mo tumba ala kue na tere ti mbi awe; vukongo ndo aga mba ti mbi so mbi na lo, e yeke fono.