Abia (Psaumes) 8 - Mbeti ti Nzapa - Tënë so amu fini

Gonda ti Nzapa na kota ndo ti zo

¹ Bia ti David; bia so ayeke ndali ti makonzi-bia. A he ni na mara ti kundi ti azo ti gbata ti Gat.

² *KOTA GBIA, Kota Gbia ti e, iri ti mo ayeke na gonda mingi na ndö ti sese kue! Pendere ti mo aza ahon pendere ti yayu!

³ Na lege ti atënë so asigigi na yanga ti akete molenge na ala so angba ti nyon me, mo fa ngangu ti mo na le ti awato ti mo. Ngangu ti mo ni ayeke tongana ngangu gbagba so ayeke kanga yanga ti awato so amu ngangu ti ala kue ti sara sioni.

⁴ Tongana mbi baa le ti nduzu, ye so maboko ti mo asara, tongana mbi baa nze na atongoro so mo zia ala kâ, mbi hunda tere ti mbi, mbi tene:

⁵ Zo ayeke nyen titene mo dabe ti mo na lo? Zo ayeke nyen si tënë ti lo agbu be ti mo tongaso so?

⁶ Mo sara lo, angba kete lo lingbi na *a-ange; mo zia lo gbia si mo mu na lo gonda na nengo.

⁷ Mo sara si lo duti na komandema na ndö ti aye so kue maboko ti mo asara; mo zia aye kue na gbe ti lo:

⁸ anyama ti kodro, akete ni na akota ni nga na anyama ti ngonda,

⁹ andeke ti nduzu, asusu ti kota ngu-ingo na aye so kue ayeke hon na ya ti kota ngu-ingo.

¹⁰ KOTA GBIA, Kota Gbia ti e, iri ti mo ayeke na gonda mingi na ndö ti sese kue!