Abia (Psaumes) 6 - Mbeti ti Nzapa - Tënë so amu fini

KOTA GBIA, baa mawa ti mbi

¹ Bia ti David; bia so ayeke ndali ti makonzi-bia. A he ni na kundi ti akamba miombe.

² *KOTA GBIA, mo sara ngonzo na tere ti mbi awe, me ayeke nzoni mo fâ ngbanga na li ti mbi pepe! Be ti mo aso na mbi awe, me ayeke nzoni mo pika mbi pepe!

³ KOTA GBIA, baa mawa ti mbi, ngbanga ti so ngangu ahunzi na mbi awe. KOTA GBIA, kai kobela na tere ti mbi, ngbanga ti so tere ti mbi kue awoko awe.

⁴ Li ti mbi kue akpe, me KOTA GBIA, mbi yeke ngba ti ku ngbii asi lawa?

⁵ KOTA GBIA, kiri, mo ga, zi mbi na ya ti ye ti ngangu! Ndali ti nzoni be ti mo, soo mbi!

⁶ Zo so akui awe, lo lingbi ti dabe ti lo na mo? Na ndo ti akuâ, zo wa laa alingbi ti mu singila na mo, zo wa?

⁷ Mbi dema ngbii ngangu ti mbi ahunzi kue. Lakue na bi, ngu ti le ti mbi ayeke yuru na ndö ti gbogbo ti mbi; ndö ti gbogbo ti mbi kue gi na ngu ti le.

⁸ Le ti mbi akanga ndali ti ye ti vundu; le ti mbi abaa ndo tuuu ndali ti gba ti awato ti mbi.

⁹ Azo ti sarango sioni, ala hon yongoro na tere ti mbi! Biani, KOTA GBIA ama toto ti mbi awe.

¹⁰ KOTA GBIA ama totongo tere ti mbi; lo yeda na sambela ti mbi awe.

¹¹ Ayeke nzoni kamene agbu le ti awato ti mbi kue, ala do na kota mbeto, ala londo biaku ala hon na gba ti kamene na le ti ala!