Abia (Psaumes) 5 - Mbeti ti Nzapa - Tënë so amu fini

Zo so asambela titene Nzapa abata lo

1 Bia ti David; bia so ayeke ndali ti makonzi-bia. A he ni na * angoli.

¹ Bia ti David; bia so ayeke ndali ti makonzi-bia. A he ni na *angoli.

² *KOTA GBIA, dingi mê ti mo ti ma tënë ti mbi; mo ma demango tere ti mbi!

³ Gbia ti mbi, Nzapa ti mbi, zia mê ti mo kpoo, mo ma iringo ndo ti mbi; mo laa mbi yeke sambela mo.

⁴ KOTA GBIA, na ndaperere, mo yeke ma go ti mbi; na ndaperere, mbi leke ye kue si mbi yeke ku mo.

⁵ Mo yeke Nzapa so sioni ye anzere na mo pepe; ndo ti azo ti sioni ayeke na tere ti mo kâ pepe.

⁶ Azo ti baba alingbi ti luti na le ti mo pepe; be ti mo ake azo ti sarango sioni kue.

⁷ Mo yeke fâ azo ti tenengo mvene. KOTA GBIA, be ti mo ake azo ti fango zo na azo ti nzi.

⁸ Me ti mbi, ndali ti nzoni be ti mo, mbi lingbi ti li na ya ti kota da ti mo. Na mbeto na be ti mbi, mbi kuku, mbi voro mo na yanga ti kota da ti mo so ayeke nde si ayeke nzoni kue.

⁹ KOTA GBIA, mo yeke mbirimbiri, fa na mbi lege ndali ti so awato ti mbi ayeke hara mbi; leke lege ti mo mbirimbiri na dawa ti mbi si mbi hon daa.

¹⁰ Zo alingbi ti zia be ti lo na ndö ti atënë ti yanga ti azo ni pepe; be ti ala asi singo na atënë ti fango zo; lege ti go ti ala ayeke tongana du ti kuâ so yanga ni azi kota; tënë ti yanga ti ala ayeke ti handango na azo.

¹¹ Nzapa, baa ala tongana azo so tënë ayeke na li ti ala! Ayeke nzoni asioni ye so ala leke na be ti ala ti sara akinda ala wani. Ndali ti gba ti sioni ti ala, mo tumba ala, ngbanga ti so ala londo ti ke mo.

¹² Me azo so kue akpe na mo ti bata tere ti ala, fade ala yeke duti na ngia; be ti ala ayeke si singo na ngia lakue, ngbanga ti so mo yeke bata ala. Ala so kue aye iri ti mo, ala yeke dekongo na ngia.

¹³ KOTA GBIA, mo laa mo yeke sara tufa na ndö ti zo ti mbirimbiri; nzoni be ti mo ayeke bata lo tongana *vala.