Abia (Psaumes) 3 - Mbeti ti Nzapa - Tënë so amu fini

KOTA GBIA, awato ti mbi ayeke mingi

¹ Bia ti David; na ngoi so molenge ti lo Absalom ayeke tumba lo si lo yeke kpe.

² *KOTA GBIA, awato ti mbi, ala yeke mingi; azo so alondo ti tiri bira na mbi, ala wu mingi.

³ Azo so ayeke tene tënë na iri ti mbi, ala yeke mingi; ala tene: “Nzapa ayeke soo lo na kuâ lawa!” Luti kete

⁴ Me KOTA GBIA, mo yeke *vala ti batango mbi, mo sara si mbi kiri mbi ne na le ti azo, mo laa mo sara si mbi yeke tambula li ti mbi na nduzu.

⁵ Mbi toto na KOTA GBIA na kota go, lo kiri tënë na mbi, kâ na li ti hoto ti lo; hoto ti lo so ayeke nde si ayeke nzoni kue. Luti kete

⁶ Mbi lango na ndö ti gbogbo, lango ahon na mbi; ndade mbi zingo, ngbanga ti so KOTA GBIA laa abata mbi.

⁷ Azo saki saki, gbani gbani angoro mbi mbage na mbage, me mbeto ti ala asara mbi oko pepe.

⁸ KOTA GBIA, londo! Nzapa ti mbi, soo mbi! Biani, mo pika ngbangba ti awato ti mbi kue, mo kungbi pembe ti azo ti sioni.

⁹ KOTA GBIA, mo laa mo yeke soo zo na kuâ! Sara tufa na ndö ti azo ti mo! Luti kete