Abia (Psaumes) 2 - Mbeti ti Nzapa - Tënë so amu fini

Zo so Nzapa azia lo gbia

¹ Ngbanga ti nyen si amara nde ayeke sara wusuwusu so? Ngbanga ti nyen si azo ti amara ayeke leke tënë na popo ti ala senge senge so?

² Agbia ti sese alondo ti tiri bira; amakonzi ti akodro ama tere ti ke *KOTA GBIA, lo na zo ti lo so lo zia lo gbia so.

³ Ala tene: “E fâ akamba so ala kanga na e so, e sigigi na gbe ti komandema ti ala!”

⁴ Me lo yeke he ngia, lo so lo duti na yayu na ndö ti mbata ti lo ti gbia so; KOTA GBIA ayeke he ala na ngia.

⁵ Na pekoni, lo tene tënë na ala na ngonzo, ngonzo ti lo ti wâ azia kota mbeto na be ti ala

⁶ si lo tene: “Mbi wani laa mbi zia gbia ti mbi na ndö ti hoto ti *Sion, hoto ti mbi so ayeke nde si ayeke nzoni kue.”

⁷ “Mbi ye ti fa peko ti mbela ti KOTA GBIA: lo tene na mbi, lo tene: ‘Mo yeke molenge ti mbi; laso mbi ga babâ ti mo awe.

⁸ Hunda mbi, fade mbi yeke mu na mo amara kue; mbi yeke mu ala na mo si ala ga ti mo. Akodro ti dunia kue ayeke ga ti mo.

⁹ Fade mo yeke sara ngangu komandema na ndö ti ala, mo yeke kungbi ala tongana ta ti sese.’ ”

¹⁰ Ala, agbia, fadeso ala sara ye na ndara si! Ala, amakonzi ti sese, ala ga azo ti mango ndo si!

¹¹ Ala sara kua na KOTA GBIA na mbeto; ala dekongo na ngia, me ala do na mbeto.

¹² Ala kuku ti voro molenge ti lo si lo sara ngonzo pepe. Tongana lo sara ngonzo, fade ala kui na lege ti sarango ye ti ala so. Biani, gi kete ye, ngonzo ti lo alondo tongana wâ. Ti ala nzoni, azo so kue akpe na lo ti bata tere ti ala.