Abia (Psaumes) 148 - Mbeti ti Nzapa - Tënë so amu fini

Ayeke nzoni dunia kue asepela KOTA GBIA

¹ Aleluya! Ala so ayeke na yayu kâ, ala sepela *KOTA GBIA! Ala so ayeke yongoro na nduzu kâ, ala sepela KOTA GBIA!

² Ala *a-ange ti lo kue, ala sepela lo! Ala aturugu ti lo kue so ayeke na yayu, ala sepela lo!

³ Lâ na nze, ala sepela lo! Ala atongoro so ayeke za zango, ala sepela lo!

⁴ Ala ayayu so ahon ayayu kue, ala angu so ayeke na ndö ti yayu, ala sepela lo!

⁵ Ayeke nzoni ala kue asepela iri ti KOTA GBIA, ngbanga ti so lo mu yanga si ala baa gigi!

⁶ Lo zia ala ti ngba kpu na kpu, lo lu andia ndali ti ala, ngangu ti andia ni ayeke ngba lakue lakue.

⁷ Ala so ayeke na sese, ala sepela KOTA GBIA! Ala akota nyama ti gbe ti ngu, na ala akota du so ali mingi, ala sepela KOTA GBIA!

⁸ Ala wâ na *pembe ti bekpa, *neze na guru ti le ti ngu, ala sepela lo! Ala, na kota pupu so ayeke sara ye na peko ti yanga ti lo, ala sepela lo!

⁹ Ala akota hoto na akete hoto, ala sepela lo! Ala akeke so ale lengo, ala akeke ti sedre, ala sepela lo!

¹⁰ Ala anyama ti ngonda, ala anyama ti kodro kue, ala sepela lo! Ala anyama so ayeke hara, ala andeke, ala sepela lo!

¹¹ Ala agbia ti sese, ala amara kue, ala sepela lo! Ala akota zo, ala amakonzi ti sese kue, ala sepela lo!

¹² Ala amaseka-koli na amaseka-wali, ala akangba na amolenge, ala sepela lo!

¹³ Ayeke nzoni ala sepela iri ti KOTA GBIA, ngbanga ti so lo oko laa lo yeke kota mingi, gonda ti lo amu ndö ti sese na yayu kue!

¹⁴ Israel, azo ti lo ayeke nduru na lo. Lo sara si ala mu li ti ala na nduzu, ala wara ngangu. Ndani laa, ala mu be ti ala na lo si ala yeke sepela lo! Aleluya!