Abia (Psaumes) 141 - Mbeti ti Nzapa - Tënë so amu fini

KOTA GBIA, bata yanga ti mbi

1 Bia ti David.

¹ Bia ti David. *KOTA GBIA, mbi iri mo, ga hio, mo mu na mbi maboko! Tongana mbi iri mo, dingi mê ti mo, mo ma mbi!

² Ayeke nzoni sambela ti mbi aga tongana dukani so guru ni ayeke ma na nduzu na dawa ti mo; maboko ti mbi so mbi yoro na nduzu aga tongana *sandaga ti lakui.

³ KOTA GBIA, zia mbeni sanziri na yanga ti mbi, bata yanga ti mbi si mbi tene sioni tënë pepe.

⁴ Sara si be ti mbi ague na lege ti sioni pepe, sara si mbi sara aye ti sioni pepe legeoko na azo ti sarango sioni. Ayeke nzoni anzerengo kobe ti ala andu yanga ti mbi pepe.

⁵ Tongana zo ti mbirimbiri apika mbi, andaa lo sara nzoni be na mbi laa. Tongana lo suku na mbi, andaa nzoni mafuta laa lo tuku na li ti mbi, mbi lingbi ti ke ni pepe. Me mbi yeke ngba ti sambela, ataa so ala yeke sara sioni na mbi.

⁶ Na ndembe so a zia amakonzi ti azo ni na ndö ti kota têne ti bi ala na gbeni, na ndembe so laa awato ti mbi ayeke hinga atene, tënë so mbi tene ayeke taa-tënë.

⁷ Tongana ti so zo ayeke de ya ti sese si lo yeke zi du daa, fade ndo ti akuâ ayeke zi yanga ti lo ti mene abio ti ala so akangbi kirikiri so.

⁸ Me le ti mbi ayeke baa gi mo, NZAPA, Kota Gbia; mbi kpe ti honde tere ti mbi nduru na mo, mo zia mbi kui pepe!

⁹ Bata mbi si mbi ti na ya ti gbanda so a leke ti gbu na mbi so pepe, bata mbi si kuku ti azo ti sarango sioni agbu mbi pepe.

¹⁰ Ayeke nzoni azo ti sioni ati na ya ti kuku ti ala wani, me mbi yeke sigigi ti mbi daa.