Abia (Psaumes) 12 - Mbeti ti Nzapa - Tënë so amu fini

KOTA GBIA, hunzi azo ti handango zo!

¹ Bia ti David; bia so ayeke ndali ti makonzi-bia. A he ni na kundi ti akamba miombe.

² *KOTA GBIA, soo mbi maa! Azo so angba na lege ti mo ayeke daa mbeni pepe; azo ti mbirimbiri ayeke daa fadeso pepe.

³ Zo oko oko ayeke du mvene na li ti mba ti lo; tënë ti yanga ti ala anzere gi nzerengo, tënë ti be ti ala ayeke use use.

⁴ Ayeke nzoni KOTA GBIA ahunzi azo ti handango zo so kue; lo fu yanga ti azo ti sioni yanga

⁵ na ala so ayeke tene: “Ndali ti kpengbango yanga ti e, fade e yeke hon ndö ti azo kue; ndali ti tënë ti yanga ti e, mbeto ti mbeni zo ayeke sara e pepe.”

⁶ KOTA GBIA atene: “Ndali ti so a sara ngangu na azo so ye atia ala si azo ti mawa ayeke toto mingi, mbi yeke londo fadeso ti ga. Mbi yeke ga ti zi ala na ya ti aye ti ngangu, ala so azo abaa ala tongana mbumbuse ye so.”

⁷ Atënë ti KOTA GBIA ayeke nzoni mingi, atënë ni ayeke tongana wen ti nginza so a kporo ni na ya ti wâ fani mbarambara ti zi puru ni kue daa.

⁸ KOTA GBIA, mo so mo yeke sara ye alingbi na tënë ti yanga ti mo, fade mo yeke bata e kpu na kpu si mara ti azo tongaso asara sioni na e pepe.

⁹ Azo ti sioni amu ndo kue si sioni ayeke gue guengo na nduzu na popo ti azo.