Abia (Psaumes) 102 - Mbeti ti Nzapa - Tënë so amu fini

Sambela ti mbeni zo ti mawa

¹ Sambela ti zo ti mawa so ye ahon ndö ti lo si lo yeke dema tere ti lo na KOTA GBIA.

² KOTA GBIA, ma sambela ti mbi, ayeke nzoni toto ti mbi asi na mo.

³ Na ngoi so ye ti ngangu asi na mbi, mo honde le ti mo na mbi pepe. Dingi mê ti mo, mo ma mbi. Na lango so mbi toto na mo, kiri tënë na mbi hio.

⁴ Biani, lango ti fini ti mbi ahon tongana guru ti wâ, abio ti mbi ayeke gbi tongana le ti wâ.

⁵ Be ti mbi awoko kue si mbi ga tongana pere so a fâ ni si ahole; nzara ti kobe akiri asara mbi pepe.

⁶ Ndali ti demango tere ti mbi, mbi nge, abio ti mbi kue na gigi.

⁷ Mbi kpa ndeke ti benyama, mbi ga tongana ndeke ti bi na ya ti agbagba da.

⁸ Lango agbu le ti mbi pepe, mbi yeke tongana kete ndeke so ayeke gi lo oko na li ti da.

⁹ Lakue awato ti mbi ayeke zonga mbi; ngonzo agbu ala sioni sioni na tere ti mbi si ala mu iri ti mbi ti deba na azo.

¹⁰ Mburu ti wâ aga kobe ti mbi ti tengo ni, ye so kue mbi yeke nyon abongbi na ngu ti le ti mbi.

¹¹ Be ti mo aso si mo sara ngonzo na tere ti mbi, nilaa mo yo mbi na nduzu, mo bi mbi yongoro.

¹² Lango ti fini ti mbi aga nduru ti hon tongana gbe ti de ti lakui, mbi yeke tongana pere so ahole.

¹³ Me ti mo KOTA GBIA, mo yeke ngba gbia kpu na kpu si azo ti angoi kue ayeke dabe ti ala na mo.

¹⁴ Mo ye *Sion; fade mo yeke londo ti sara na lo, ngbanga ti so ngoi ti baa mawa ti lo asi awe. Biani, taa ngoi ni alingbi awe!

¹⁵ Ataa so atêne ti gbata ni atuku awe, be ti azo ti kua ti mo angba ti ye atêne ni; ala ngba ti baa mawa ti fuku ti sese ti gbata ni.

¹⁶ Fade amara nde ayeke kpe mbeto ti KOTA GBIA, agbia ti sese kue ayeke kpe mbeto ti gonda ti mo.

¹⁷ Na ndembe so KOTA GBIA ayeke kiri ti leke gbata ti Sion, azo ayeke baa lo na ya ti gonda ti lo.

¹⁸ Lo yeke ma sambela ti azo so ye atia ala, lo yeke ke ti ma sambela ti ala pepe.

¹⁹ Ayeke nzoni a su tënë ti ye so na mbeti ndali ti azo ti angoi so ayeke ga, tongaso si azo so akiri aga azo ti kodro oko ayeke sepela KOTA GBIA.

²⁰ Na nduzu kâ, na ndo ti lo so ayeke nde si ayeke nzoni kue, KOTA GBIA aba tere ti lo ti baa ndo na ndö ti sese. Na yayu kâ, lo baa ndo na sese

²¹ ti ma demango tere ti azo ti kanga, ti zi azo so a fâ ngbanga ti kuâ na li ti ala.

²² Tongaso, fade azo ayeke vunga iri ti KOTA GBIA na ya ti gbata ti Sion kue; ala yeke vunga tënë ti sepelango lo na Jérusalem

²³ na ndembe so azo ti amara nde na ti akodro kue ayeke bongbi ti voro KOTA GBIA.

²⁴ Gi so mbi de na lege, KOTA GBIA asara si ngangu ti mbi ahunzi, lo kiri na lango ti fini ti mbi nduru.

²⁵ Mbi tene: “Nzapa ti mbi, mo yeke na fini kpu na kpu! Mbi de ti si na ndambo ti lango ti fini ti mbi pepe; zi fini ti mbi ni hio tongaso pepe!”

²⁶ Mo laa mo lu gere ti sese ando giriri, yayu ayeke ye so maboko ti mo asara.

²⁷ Fade aye so kue ayeke buba, me ti mo, mo yeke ngba. Ala kue ayeke woko tongana gbagba bongo. Tongana ti so zo ayeke zi gbagba bongo ti yu mbeni nde, fade mo yeke sara si ala ga nde.

²⁸ Me ti mo, mo yeke lakue tongana ti so mo yeke, alango ti mo ayeke hunzi pepe.

²⁹ Fade amolenge ti azo ti kua ti mo ayeke wara ndo ti duti daa si ahale ti ala ayeke ngba ande ngangu na le ti mo.