Abia (Psaumes) 101 - Mbeti ti Nzapa - Tënë so amu fini

Gbia ti kodro aleke be ti lo ti sara ye ti mbirimbiri

1 Bia ti David.

¹ Bia ti David. Mbi ye ti he bia ti tene tënë ti nzoni be ti mo, ti tene tënë ti fango ngbanga ti mo ti mbirimbiri. *KOTA GBIA, mbi ye ti he bia ti sepela mo.

² Mbi ye ti hinga lege ti sarango ye ti azo so alingbi kue. Lawa laa mo yeke ga ande na mbage ti mbi? Na ya ti da ti mbi, mbi yeke sara ye na be so alingbi kue.

³ Fade mbi yeke zia le ti mbi angba na ndö ti ye ti sioni pepe. Be ti mbi ake sarango ye ti azo so ake mo, ngbanga ti mbi ayeke na sarango ye ti ala ni pepe.

⁴ Zo so be ti lo asi singo na atënë ti mayere, mbi ye lo ga nduru na tere ti mbi pepe; mbi ye ti hinga sioni ye oko pepe.

⁵ Zo ti tenengo mvene na iri ti amba ti lo na hondengo ni, fade mbi yeke kanga yanga ti lo. Zo so abaa amba ti lo tongana mbumbuse ye si baba ahon ndö ti lo, mbi lingbi ti kanga be ti mbi na lo pepe.

⁶ Na ya ti kodro, fade mbi yeke soro azo so alingbi titene ala duti na tere ti mbi; zo so tambula ti lo alingbi kue, lo laa lo yeke sara ande kua na mbi.

⁷ Zo so kua ti lo ayeke ti handango azo, fade lo yeke duti na ya ti da ti mbi pepe. Zo ti tenengo mvene ayeke ngba na le ti mbi pepe.

⁸ Lakue na ndaperere, mbi yeke kanga yanga ti azo ti sioni kue ti kodro; tongaso si mbi yeke zi azo ti sarango sioni so kue ayeke na gbata ti KOTA GBIA.