2 Timothée 2 - Mbeti ti Nzapa - Tënë so amu fini

Kpengba turugu ti Jésus

¹ Ti mo, molenge ti mbi, mo kpengba na ya ti nzoni be so Nzapa asara na e na lege so e ga oko na Jésus Christ.

² Ye so mo ma na yanga ti mbi na le ti azo mingi, mo zia na maboko ti azo so alingbi ti bata ni mbirimbiri, ala so alingbi ti kiri ti fa ni na ambeni zo.

³ Mo nga, mo yeda ti baa pasi tongana kpengba turugu ti Jésus Christ.

⁴ Zo so ali na kua ti turugu, tongana lo ye titene kota zo ti lo agonda lo, lo yeke zia be ti lo pepe na akua ti asenge zo.

⁵ Wanguru so asara mandako na lege ti ndia ni pepe, lo lingbi nga ti wara kangu ti wen pepe.

⁶ Zo so abaa pasi na fango yaka, alingbi lo laa lo wara ale ti kobe ti yaka ni kozoni.

⁷ Mo ma ya ti atënë so mbi yeke tene na mo so nzoni. Fade *Kota Gbia ayeke sara si mo ma ya ti atënë ni kue.

⁸ Mo dabe ti mo na Jésus Christ so ayeke *hale ti David. Lo zingo na kuâ tongana ti so ala yeke ma na ya ti Nzoni Tënë so mbi yeke fa.

⁹ Ndali ti Nzoni Tënë ni, a kanga mbi na zingiri si mbi yeke baa pasi tongana sioni zo. Me a kanga tënë ti Nzapa pepe.

¹⁰ Ndani laa mbi yeke kanga be ti mbi na ya ti aye so kue ngbanga ti azo so Nzapa asoro ala. Tongaso, ala nga, fade ala yeke wara lege ti soo kuâ na lege ti gango so ala ga oko na Jésus Christ si ala yeke wara gonda so ayeke ngba lakue lakue.

¹¹ Tënë so ayeke taa-tënë: “Tongana e na lo, e kui, fade e na lo kue, e yeke kiri na fini;

¹² tongana e gbu ngangu, fade e na lo kue, e yeke le-gbia; tongana e bere tënë ti lo, fade lo nga, lo yeke bere tënë ti e;

¹³ tongana e sara ye alingbi na tënë ti yanga ti e pepe, ti lo, lo yeke ngba ti sara ye lakue alingbi na tënë ti yanga ti lo. Biani, lo lingbi ti bere tënë ti yanga ti lo wani pepe.”

Zo so alingbi na kua ti Nzapa

¹⁴ Mo dabe ti azo na atënë so kue. Na le ti Nzapa, mo tene na ala ti kai apapa ndali ti lege so azo ayeke di iri ti aye. Apapa so ayeke sara nzoni ye oko na zo pepe, ayeke sara gi sioni na azo so ayeke ma ni.

¹⁵ Mo gi lege ngangu ti duti zo so Nzapa alingbi ti gonda lo, zo so asara kua ti lo nzoni si kamene asara lo na pekoni pepe, zo so ayeke fa taa-tënë na azo na legeni.

¹⁶ Mo kpe lege ti asenge senge tënë so asongo na mabe pepe. Biani, azo so amu tere ti ala na tenengo amara ti tënë so, fade ala yeke hon gi hongo yongoro na tere ti Nzapa.

¹⁷ Tënë ti yanga ti azo ni ayeke tongana sioni ka so ayeke te tere ti zo kue; Himene na Filete ayeke nga na popo ti azo so.

¹⁸ Azo ni so azia lege ti taa-tënë awe si ala yeke tene na azo atene, zingongo ti akuâ ayeke mbeni ye so ahon awe. Na lege ti tënë ti ala, ala yeke kinda mabe ti azo mingi.

¹⁹ Me kpengbango gere ti da so Nzapa aleke so ayeke yingi ande pepe. A su mbeti so na tere ti gere ti da ni, atene: “*Kota Gbia ahinga azo ti lo.” Mbeti ni akiri atene: “Zo so atene, ni yeke zo ti Kota Gbia, ayeke nzoni lo zia lege ti sarango ye ti sioni.”

²⁰ Na ya ti kota da, mo yeke wara gi asembe so a sara na lôro wala na wen ti nginza pepe; mo yeke wara nga asembe so a sara na keke wala na sese. Ambeni sembe ni ayeke asembe so a bata ni ndali ti alango ti matanga, ambeni ayeke ti sarango na ye lakue lakue.

²¹ Zo so azia lege ti sarango aye ti sioni so mbi yeke tene tënë ni so, fade lo yeke ga tongana sembe so a bata ni ndali ti alango ti matanga, lo yeke ga tongana sembe so a zia ni nde titene wa ni asara na kua na ndembe so lo ye ti sara nzoni ye kue.

²² Mo kpe aye nde nde so nzara ni ayeke gbu ka amaseka. Mo sara kue ti ga mbirimbiri na le ti Nzapa, ti duti na mabe, na ndoye nga na siriri na azo so ayeke sambela Kota Gbia na vurungo be.

²³ Me mo ke abuba tënë na atënë ti kirikiri: hinga so, amara ti atënë tongaso ayeke ga gi na papa na popo ti azo.

²⁴ Zo ti kua ti Kota Gbia alingbi ti papa pepe, me alingbi lo duti kpoo na azo kue, lo yeke zo so alingbi ti fa nda ti ye si lo hinga ti kanga be ti lo na kasango ndo ti azo.

²⁵ Azo so ayeke ke tënë na yanga ti lo, ayeke nzoni lo fa ye na ala yeke-yeke. E hinga pepe, Nzapa ayeke sara titene ala zia ngbene lege ti sarango ye ti ala, ala hinga taa-tënë

²⁶ si li ti ala akiri daa. Tongaso, fade ala yeke sigigi na ya ti gbanda ti Zabolo so lani akanga ala titene ala sara gi ye so be ti lo aye.