2 Samuel 3 - Mbeti ti Nzapa - Tënë so amu fini

¹ Bira ni aninga mingi na popo ti azo ti Saul na ti azo ti David. Ngangu ti David ayeke gue guengo na nduzu, me ngangu ti azo ti Saul ayeke woko wokongo.

Amolenge-koli so David adu ala na gbata ti Hebron

² David adu amolenge-koli na gbata ti Hebron. Kozo molenge ni ayeke Amnon; mama ti lo ayeke Ahinoam, zo ti Yizreel.

³ Use molenge ni ayeke Kilab; mama ti lo ayeke Abigail, wali-mua ti Nabal, zo ti kodro ti Karmel. Ota molenge ni ayeke Absalom; mama ti lo ayeke Maaka, molenge ti Talmai, gbia ti Geshur.

⁴ Osio molenge ni ayeke Adonia; mama ti lo ayeke Hagite. Oku molenge ni ayeke Shefatia; mama ti lo ayeke Abital.

⁵ Omene molenge ni ayeke Itream; mama ti lo ayeke Egla, wali ti David. So ayeke amolenge so David adu ala na gbata ti Hebron laa.

Abner na Ishebaal apapa

⁶ Na ngoi so bira angba na popo ti azo ti Saul na ti David, ngangu ti Abner ayeke gue guengo na nduzu na popo ti azo ti Saul.

⁷ Saul ayeke na mbeni wali ti lo so iri ti lo ayeke Rispa, molenge ti Aya. Mbeni lâ, Ishebaal atene na Abner: “Mo gi wali ti babâ ti mbi ngbanga ti nyen?”

⁸ Abner asara ngonzo mingi ndali ti tënë so Ishebaal atene. Nilaa lo kiri tënë, lo tene: “Mbi yeke mbo so ayeke mu gi peko ti azo ti Juda? Mbi sara nzoni be na azo ti da ti babâ ti mo Saul, na a-ita ti lo nga na amba ti lo ngbii asi laso. Mbi sara kue titene mo ti na maboko ti David pepe si laso mo ye ti bi tënë na li ti mbi ndali ti wali so?

⁹ Ye so *KOTA GBIA adeba yanga ti lo ti sara na David, tongana mbi sara ni pepe, ayeke nzoni Nzapa asara ye ti ngangu mingi na mbi Abner!

¹⁰ KOTA GBIA adeba yanga ti lo atene, fade lo yeke zi kua ti gbia na maboko ti azo ti sewa ti Saul si lo yeke zia David titene lo duti gbia na ndö ti Israel nga na ndö ti Juda, ti londo na Dan ngbii asi na Bersheba.”

¹¹ Ishebaal alingbi ti kiri tënë na Abner pepe, ngbanga ti so lo sara mbeto ti Abner mingi.

Abner akiri na peko ti David

¹² Abner atokua azo na David ti tene na lo: “Kodro ni ayeke ti zo wa? Tongana mo yeda, mbi na mo, e sara *mbuki si fade mbi mu maboko na mo titene azo ti Israel kue akiri na peko ti mo.”

¹³ David akiri tënë: “Nzoni! Fade mbi na mo, e yeke sara *mbuki; me mbi hunda na mo gi ye oko: Kozo titene mbi na mo, e wara tere, ayeke nzoni mo tokua wali ti mbi Mikal, molenge ti Saul si.”

¹⁴ Na pekoni, David atokua azo na Ishebaal, molenge ti Saul ti tene na lo: “Kiri na mbi wali ti mbi Mikal so lani mbi vo lo na *pito ngbangbo oko ti azo ti Filistii so.”

¹⁵ Ishebaal atokua si a mu Mikal na ndo ti koli ti lo Paltiel, molenge ti Laish.

¹⁶ Paltiel amu peko ti lo gi na toto ngbii lo si na Bahurim. Na ndo so, Abner atene na lo: “Hon kâ, kiri na ndo ti mo!” Paltiel akiri na ndo ti lo.

¹⁷ Abner atene tënë na *akangba ti Israel atene: “Aninga so ala ye titene David aga gbia ti ala.

¹⁸ Fadeso, ala sara ye! Biani, *KOTA GBIA atene na ndö ti David, atene: ‘Na lege ti David, zo ti kua ti mbi laa mbi yeke zi azo ti Israel, azo ti mbi na maboko ti azo ti Filistii nga na maboko ti awato ti ala kue.’ ”

¹⁹ Abner atene nga tënë na azo ti mara ti Benjamin. Na pekoni, Abner ague na Hebron si lo tene na David ye so azo ti Israel na azo ti Benjamin kue aleke na be ti ala ti sarango ni.

²⁰ Abner na azo baleuse so amu peko ti lo ague, awara David na Hebron. David aleke matanga ti tengo kobe ndali ti Abner na azo so amu peko ti lo.

²¹ Abner atene na David: “Gbia ti mbi, mbi yeke gue ti bongbi azo ti Israel kue titene ala duti na gbe ti mo. Fade ala na mo ayeke sara *mbuki si mo yeke le-gbia na ndö ti kodro ni kue tongana ti so be ti mo aye.” David azia lege na Abner si Abner akiri na siriri.

Yoab afâ Abner

²² Kete na pekoni, Yoab na aturugu ti David alondo na bira si ala kiri. Ala ga na aye mingi so ala gbu na peko ti bira. Abner ayeke na Hebron na tere ti David mbeni pepe, ngbanga ti so David azia lege na lo si lo kiri na siriri.

²³ So Yoab na aturugu ti lo kue asi awe, mbeni zo atene na Yoab: “Abner, molenge ti Ner aga na ndo ti gbia si gbia azia lege na lo, lo kiri na siriri.”

²⁴ Yoab ague na ndo ti gbia si atene na lo: “Nyen laa mo sara so? Abner aga na ndo ti mo si mo zia lege na lo, lo kiri senge tongaso?

²⁵ Mo hinga Abner, molenge ti Ner kue! Lo ga ti handa mo, ti hinga nda ti mo, ti hinga nga aye so kue mo yeke sara.”

²⁶ So Yoab alondo na ndo ti David akiri awe, lo tokua azo na peko ti Abner. Azo ni amu lo kâ na du ti ngu ti Sira, akiri na lo; David ahinga tënë ni oko pepe.

²⁷ So Abner akiri na Hebron awe, Yoab amu lo yeke, ala hon yongoro kete, na yanga ti gbagba ti gbata ni, mo baa mo tene, lo ye ti tene mbeni tënë na lo so abaa gi ala use. Kâ, Yoab akpo ya ti Abner, lo fâ lo ndali ti ita ti lo Asael so lani Abner afâ lo so.

²⁸ Na ndembe so David ama tënë ni, lo tene: “Na dawa ti *KOTA GBIA, ngbanga ti mene ti Abner, molenge ti Ner ayeke na ndö ti mbi pepe nga na ndö ti kodro-gbia ti mbi oko pepe.

²⁹ Ayeke nzoni ngbanga ti mene ti Abner akiri na ndö ti Yoab na asewa ti lo kue! Na ya ti sewa ti lo, ayeke nzoni mbeni zo aduti daa lakue so kobela so ayeke yuru na lege ti tere ti koli wala ti wali ayuru na tere ti lo, wala mbeni zo so kobela ti buruma asara lo, wala mbeni koli so aga zo ti sarango kua ti awali, wala mbeni zo so akui kuâ ti yongoro zeme wala zo so kobe atia lo.”

³⁰ Yoab na ita ti lo Abishai afâ Abner, ngbanga ti so Abner afâ lani ita ti ala Asael na ya ti bira ti Gabaon.

³¹ David atene na Yoab nga na azo so kue amu peko ti lo: “Ala suru bongo ti ala, ala yu agbagba bongo, ala toto kuâ ti Abner!” Ti gbia David, lo yeke tambula na peko ti kuâ ni.

³² A lu Abner na Hebron. Na yanga ti du ti kuâ ni, gbia ati na kota toto si azo ti kodro kue atoto nga.

³³ Na pekoni, gbia aleke mbeni bia ti totongo kuâ ndali ti Abner, atene: “Ae, Abner alingbi fade ti kui kuâ tongana ti buba zo?

³⁴ A kanga maboko ti mo pepe wala a kanga gere ti mo na ya ti zingiri ti bengba wen pepe. Kuâ ti mo ayeke tongana kuâ ti zo so azo ti sarango sioni afâ lo.” Azo ti kodro kue akiri atoto Abner.

³⁵ Na pekoni, so ndo ade ti vuko pepe, azo ni aga na kobe na David. Me David adeba yanga ti lo, atene: “Tongana lâ ade ti kui pepe si mbi te mbeni ye wala mbeni kobe andu yanga ti mbi, ayeke nzoni Nzapa asara ye ti ngangu mingi na mbi.”

³⁶ Azo ni kue ama tënë ti ye so si ala yeda na ni. Aye so kue gbia ayeke sara, ala yeda na ni.

³⁷ Na lango ni so, azo ti Juda kue na azo ti Israel kue ahinga atene, gbia laa amu yanga pepe si a fâ Abner, molenge ti Ner.

³⁸ Gbia atene na azo ti yangbo ti lo, atene: “Ala hinga atene mbeni makonzi, mbeni kota makonzi akui laso na Israel pepe?

³⁹ A tuku mafuta na li ti mbi titene mbi ga gbia awe; me fadeso, ade mbi wara ngangu mingi pepe si akoli so iri ti mama ti ala ayeke Seruya ayeke azo ti sarango ngangu mingi ahon mbi. Ayeke nzoni KOTA GBIA akiri sioni na zo ti sioni alingbi na sioni ti lo.”