2 Samuel 22 - Mbeti ti Nzapa - Tënë so amu fini

David amu singila na Nzapa na peko ti songo benda

¹ David ahe bia so na ngoi so *KOTA GBIA azi lo na maboko ti awato ti lo kue, nga na maboko ti Saul,

² lo tene: KOTA GBIA ayeke tongana kota têne so mbi luti na ndö ni, lo yeke tongana ngangu gbagba na tere ti mbi, lo laa lo yeke zi mbi na ya ti ye ti ngangu.

³ Nzapa ayeke tongana kota têne so mbi honde tere ti mbi na peko ni; lo yeke tongana *vala ti mbi, lo yeke tongana ye ti bira ti mbi so mbi yeke hon awato ti mbi na ni; lo yeke tongana ngangu da so ayo na nduzu so mbi kpe daa ti honde tere ti mbi; lo yeke ndo so mbi kpe daa ti honde tere ti mbi, lo yeke wasongo mbi na kuâ, lo yeke soo mbi na maboko ti azo so ayeke sara ngangu na mbi.

⁴ Mbi gonda KOTA GBIA! Mbi dekongo na lo; lo zi mbi na maboko ti awato ti mbi.

⁵ *Amapo ti kuâ akanga mbi; mbeto ti kuâ asara mbi kota ngu so ayeke zia mbeto na be ti zo; asara si mbeto ahon ndö ti mbi.

⁶ Kamba ti ndo ti akuâ agbu mbi, gbanda ti kuâ ayeke na dawa ti mbi.

⁷ Na ya ti aye ti ngangu so asi na mbi, mbi iri KOTA GBIA titene lo mu na mbi maboko; mbi iri Nzapa ti mbi. Kâ na ya ti kota da ti lo, lo ma go ti mbi; dekongo ti mbi asi na mê ti lo.

⁸ Tongaso sese ayingi si ado; gere ti yayu ado kirikiri si ayingi na ndembe so KOTA GBIA asara ngonzo.

⁹ Guru ti wâ asigigi na hon ti lo, kota wâ so ayeke gbi aye kue asigigi na yanga ti lo; ale ti wâ so aza ngangu asigigi na yanga ti lo.

¹⁰ Lo dingi le ti nduzu si lo zu na sese, vukongo mbinda ayeke na gbe ti gere ti lo.

¹¹ Lo ko na ndö ti *sheruben si lo huru na le ti nduzu, lo yeke hon na ndö ti kpangi ti pupu.

¹² Lo sara si vukongo ndo aga ndo ti hondengo tere ti lo, lo honde tere ti lo na ya ti ngbongboro mbinda na ya ti mbinda so ngu asi singo daa!

¹³ Zango ndo ayeke na dawa ti lo; akete kete le ti wâ ayeke sigigi daa.

¹⁴ KOTA GBIA adekongo na yayu kâ, go ti Nzapa so ayeke na ndö ti aye kue atoto ngangu.

¹⁵ Lo tokua ale ti kokora, awato ti lo akangbi kirikiri; lo tokua wâ ti bekpa, ala kpe kirikiri.

¹⁶ So KOTA GBIA asara sioni ngonzo, guru asigigi na hon ti lo; asara si azo abaa taa gbe ti akota ngu-ingo; azo abaa agere ti sese polele.

¹⁷ Na nduzu kâ, KOTA GBIA ayoro maboko ti lo si lo gbu mbi; lo gboto mbi na ya ti kota ngu sigigi na ni.

¹⁸ Lo zi mbi na maboko ti angangu wato ti mbi; lo zi mbi na maboko ti azo so ake mbi, ala so ayeke ngangu mingi ahon mbi.

¹⁹ Na lango so ye ti ngangu asi na mbi, awato ti mbi alondo ti tiri na mbi; me KOTA GBIA aga amu maboko na mbi.

²⁰ Lo zi mbi, lo zia mbi yamba; lo zi mbi, ngbanga ti so lo ye mbi.

²¹ KOTA GBIA asara na mbi aye so, ngbanga ti so sarango ye ti mbi ayeke mbirimbiri; lo sara nzoni na mbi, ngbanga ti so mbi sara ye na lege ti taa tënë.

²² Biani, mbi ngba na lege ti KOTA GBIA, mbi sara mbeni ye ti ke Nzapa ti mbi pepe.

²³ Andia ti lo kue ayeke na dawa ti mbi, mbi hon yongoro na atënë ti ndia ti lo pepe.

²⁴ Mbi sara aye ti lo kue na legeni, mbi ke lege ti sarango ye ti sioni.

²⁵ KOTA GBIA asara nzoni na mbi, ngbanga ti so sarango ye ti mbi ayeke mbirimbiri; lo kiri nzoni na mbi, ngbanga ti so mbi sara ye na lege ti taa tënë.

²⁶ Zo so angba na lege ti mo, mo yeke ngba ti sara na lo; zo ti ngangu so asara ye na legeni, mo yeke sara ye na lo na legeni.

²⁷ Zo so ayeke na vuru be, mo yeke sara na lo na vuru be; me zo so ayeke na sioni be, mo yeke na kode ti sara sioni na lo.

²⁸ Mo yeke soo azo so ayeke na ngangu pepe mo baa azo ti baba, mo yeke bi le ti mo na ngonda.

²⁹ KOTA GBIA, mo laa mo yeke lamba ti mbi. KOTA GBIA asara si vukongo ndo so mbi yeke na ya ni aga vurungo ndo.

³⁰ Na ngangu ti mo, mbi lingbi ti ti na ndö ti awato ti mbi. Na ngangu ti Nzapa ti mbi, mbi lingbi ti hon na ndö ti gbagba ti bira.

³¹ Lege ti Nzapa ayeke nzoni kue, a tara tënë ti KOTA GBIA, tënë ni ayeke taa-tënë. Lo yeke *vala ti azo so akpe na lo ti bata tere ti ala.

³² Zo wa laa ayeke Nzapa, zo wa? Gi KOTA GBIA pepe? Zo wa laa ayeke kota têne so e luti na ndö ni ti bata tere ti e, zo wa? Gi Nzapa ti e pepe?

³³ Nzapa so ayeke tongana ngangu gbagba na tere ti mbi, lo yeke leke lege na dawa ti mbi.

³⁴ Lo sara si gere ti mbi aga tongana ti tagba; lo sara si mbi luti mbirimbiri na ndö ti ahoto.

³⁵ Lo yeke fa na mbi lege ti tiringo bira, lo sara si mbi gboto ya ti kamba ti kokora ti wen.

³⁶ Ndali ti vala ti mo, mbi wara lege ti so benda, nzoni be ti mo na mbage ti mbi asara si mbi ga kota zo.

³⁷ Mo sara si mbi kpe loro hio hio, gere ti mbi ayeke *zene pepe.

³⁸ Mbi yeke tumba peko ti awato ti mbi, mbi yeke hunzi ala kue; mbi yeke kiri gi tongana mbi fâ ala kue si.

³⁹ Mbi yeke hunzi ala kue, mbi yeke fâ ala kue, ala yeke kiri ti londo pepe; ala ti na gbe ti gere ti mbi awe.

⁴⁰ Mo mu na mbi ngangu ti tiri na bira, azo so alondo ti tiri na mbi, mo yeke sara si ala ti na gbe ti mbi.

⁴¹ Mo sara si awato ti mbi akpe na dawa ti mbi; mbi yeke fâ awato ti mbi, mbi hunzi ala kue.

⁴² Ala yeke dekongo, me zo oko ti mu maboko na ala ayeke daa pepe; ala yeke dekongo na KOTA GBIA, me lo kiri tënë na ala pepe.

⁴³ Mbi nika ala tongana fuku ti sese; mbi do ala na gbe ti gere ti mbi tongana ti so zo ayeke do potopoto ti ndö ti lege.

⁴⁴ Azo ti kodro ti mbi so atomboka na tere ti mbi so mo yeke zi mbi na maboko ti ala; mo zia mbi na ndö ti amara nde. Azo ti mara so mbi hinga ala pepe aga azo ti gbe ti mbi.

⁴⁵ Awande awoko mbi na anzerengo tënë; mbi tene gi tënë oko, ala sara ye alingbi na ni.

⁴⁶ Be ti awande ni awoko kue awe; tongana ala londo na ya ti gbagba ti bira ti ala ti sigigi, tere ti ala ayeke do dongo.

⁴⁷ KOTA GBIA ayeke na fini! Mbi gonda lo, lo so lo yeke Kota Têne so mbi luti na ndö ni ti bata tere ti mbi. Ayeke nzoni azo amu iri ti Nzapa na nduzu, lo so lo yeke kota têne so mbi luti na ndö ni ti bata tere ti mbi, lo so lo yeke wasongo mbi.

⁴⁸ Nzapa so ayeke mu lege na mbi ti kiri na awato ti mbi peko ti sioni so ala sara na mbi, lo yeke zia amara na gbe ti mbi.

⁴⁹ Mo laa mo yeke zi mbi na maboko ti awato ti mbi; mo yeke sara si mbi hon ndö ti azo so alondo ti ke mbi; mo yeke zi mbi na maboko ti azo ti sarango ngangu na zo.

⁵⁰ Ndani laa, KOTA GBIA, mbi ye ti mu singila na mo na popo ti amara nde; mbi yeke gonda mo na lege ti bia ti mbi

⁵¹ KOTA GBIA asara akota ye mingi ndali ti gbia so lo soro lo, lo sara nzoni be na zo so lo tuku mafuta na li ti lo: lo sara ni ndali ti David na *ahale ti lo kpu na kpu.