2 Samuel 21 - Mbeti ti Nzapa - Tënë so amu fini

Azo ti gbata ti Gabaon na ahale ti Saul

¹ Na ngoi ti lengo-gbia ti David, kota nzara ati na ya ti kodro, asara ngu ota. David ahunda *KOTA GBIA si KOTA GBIA akiri tënë na lo, atene: “Ye ni asi ndali ti so Saul na asewa ti lo afâ azo ti gbata ti Gabaon.”

² Gbia airi azo ti Gabaon ti tene tënë na ala. Azo ti Gabaon ayeke azo ti Israel pepe; me ala yeke tanga ti azo ti Amori so angba na fini. Azo ti Israel adeba yanga ti ala lani ti bata fini ti azo ti Gabaon. Me Saul, so tënë ti azo ti Israel na ti Juda agbu be ti lo ahon ndoni agi lege ti fâ azo ti Gabaon ti hunzi ala.

³ David ahunda ala, atene: “Nyen laa mbi lingbi ti sara ndali ti ala, nyen? Mbi lingbi ti sara nyen ti leke na sioni so azo asara na ala, tongaso si ala wara lege ti sara tufa na ndö ti azo ti KOTA GBIA?”

⁴ Azo ti Gabaon akiri tënë na lo: “Tënë so ayeke na popo ti e na Saul nga na asewa ti lo, alingbi ti leke ni pepe na nginza wala na lôro; alingbi nga ti leke ni pepe na fango mbeni zo ti Israel.” Gbia akiri atene: “Ala tene na mbi ye so ala ye, fade mbi yeke sara ni na ala.”

⁵ Azo ti Gabaon atene na gbia: “Saul aye lani ti fâ e kue ti hunzi e; lo ye ti mingo mara ti e na sese ti Israel kue.

⁶ Ayeke nzoni ala zia na maboko ti e azo mbarambara ti ya ti *hale ti lo, e kanga kamba na go ti ala na nduzu na dawa ti KOTA GBIA na Gibea, gbata so Saul aduti ando daa, Saul so KOTA GBIA asoro lo so.” Gbia akiri tënë: “Fade mbi yeke zia azo ni na maboko ti ala.”

⁷ Gbia abata Mefibaal, molenge ti Jonatan, ata ti Saul, ngbanga ti so lo na Jonatan asara lani *mbuki na dawa ti KOTA GBIA.

⁸ Me gbia amu Armoni na Mefiboshet, amolenge use so lani Rispa adu na Saul; Rispa ayeke molenge ti Aya. Gbia akiri amu amolenge-koli oku so lani Mikal, molenge ti Saul adu na Adriel, molenge ti Barzilai, zo ti kodro ti Abel-Mehola.

⁹ Gbia azia ala na maboko ti azo ti Gabaon si azo ti Gabaon akanga kamba na go ti ala na nduzu na li ti mbeni hoto na dawa ti KOTA GBIA. Azo ni mbarambara kue akui legeoko. Azo ti Gabaon afâ ala lani na ya ti akozo lango ti fango ale ti *orze.

¹⁰ Rispa, molenge-wali ti Aya, amu bongo ti mua so lo yu so, lo gbara na ndö ti kota têne si lo yeke lango na ndö ni, ti londo na ngoi so azo ato nda ti fa ale ti kobe ngbii asi na ngoi so ngu-Nzapa ato nda ti pika na ndö ti kuâ ti azo ni. Na kota lâ, Rispa ayeke tumba andeke ti nduzu titene ala ga aduti na ndö ti akuâ ni pepe; na bi, lo yeke tumba anyama ti ngonda yongoro na tere ti akuâ ni.

¹¹ Ye so Rispa, molenge-wali ti Aya, mbeni wali ti Saul, asara so, azo ague, atene tënë ni na David.

¹² Tongaso, David ague na ndo ti azo ti Yabesh, na sese ti Galaad titene lo ro abio ti Saul na ti molenge ti lo Jonatan. Biani, na ndembe so lani azo ti Filistii akinda Saul na hoto ti Gilboa, ala kanga kuâ ti lo na ti Jonatan na tere ti gbagba ti Bet-Shean. Kâ laa azo ti Yabesh aga anzi kuâ ti Saul na ti Jonatan.

¹³ David aro abio ti Saul na ti Jonatan, lo gue na ni. Na pekoni, a bongbi abio ti azo mbarambara so lani a kanga kamba na go ti ala na nduzu si ala kui so.

¹⁴ A lu abio ti ala, ti Saul na ti Jonatan na du ti kuâ ti Kish, babâ ti Saul na kodro ti Sela, na sese ti Benjamin. Na peko ti so azo asara ye so kue gbia amu yanga daa, Nzapa abaa mawa ti kodro ni.

Bira na azo ti Filistii

¹⁵ Azo ti Filistii akiri alondo na bira na azo ti Israel. David na azo ti lo alondo ague, atiri bira na azo ti Filistii. Tere ti David awoko.

¹⁶ Ishebi-Benob, mbeni *hale ti Harafa akanga afini ye ti bira na tere ti lo; bengba wen so a sara na likongo ti lo ane ahon kilo ota. Lo leke na be ti lo ti fâ David.

¹⁷ Me Abishai, so iri ti mama ti lo ayeke Seruya aga amu maboko na David si lo fâ zo ti Filistii ni. Nilaa aturugu ahunda na David ti deba yanga ti lo, atene: “Fade mo yeke kiri ti gue na bira na e pepe, tongaso pepe, gbia ayeke duti na Israel mbeni pepe.”

¹⁸ Na pekoni, bira akiri alondo na popo ti azo ti Israel na azo ti Filistii na kodro ti Gob. Lani Sibkai, zo ti mara ti Husha afâ Saf, mbeni *hale ti Harafa.

¹⁹ Mbeni bira akiri alondo na popo ti azo ti Israel na azo ti Filistii na kodro ti Gob. Elanan, molenge ti Yari, zo ti Betlehem afâ Goliat, zo ti kodro ti Gat. Keke ti likongo ti lo akono tongana keke ti masini ti awasarango-bongo.

²⁰ Mbeni bira akiri alondo na kodro ti Gat. Mbeni yongoro koli ayeke kâ, ali ti maboko ti lo ayeke omene, omene, ali ti gere ti lo ayeke nga omene, omene; wungo ni kue ayeke baleuse na osio. Lo yeke mbeni *hale ti Harafa.

²¹ Lo gi yanga ti azo ti Israel. Tongaso, Jonatan, molenge ti Shama afâ lo. Shama ayeke ita ti David.

²² Aturugu osio ti gbata ti Gat so ayeke ahale ti Harafa. David na aturugu ti lo afâ ala.