2 Samuel 19 - Mbeti ti Nzapa - Tënë so amu fini

David asara mawa ti molenge ti lo

¹ Na mango tënë so, mawa ahon ndö ti gbia David. Lo gue na ya ti kubu so ayeke na ndö ti gbagba ti gbata ni si lo yeke toto. Lo yeke tambula si lo yeke tene: “Absalom, molenge ti mbi-oo! Absalom, molenge ti mbi-oo! Mbi laa mbi kui fade na plase ti mo, ka ayeke nzoni! Oo, Absalom molenge ti mbi, molenge ti mbi!”

² A tene na Yoab, atene: “Gbia ayeke toto si lo yeke dema tere ndali ti Absalom.”

³ Na lango ni so, ngia so fade aturugu alingbi ti sara ngbanga ti kindango awato ti ala so, ngia ni akiri aga vundu. Ala sara vundu, ngbanga ti so ala ma a tene, gbia asara mawa mingi ndali ti kuâ ti molenge ti lo.

⁴ Na lango ni so, aturugu akiri na kodro na hondengo ni tongana aturugu so akpe bira si kamene ahon ndö ti ala.

⁵ Gbia akanga le ti lo na bongo si lo yeke dekongo ngangu, lo tene: “Absalom, molenge ti mbi-oo! Absalom molenge ti mbi-oo! Molenge ti mbi!”

⁶ Yoab ali na ya ti kubu so gbia ayeke daa si atene na lo: “So mo sara tongaso, mo zia kamene laso na le ti aturugu ti mo so asoo mo na kuâ, mo na amolenge ti mo ti koli, na ala ti wali nga na awali ti mo kue.

⁷ Mo fa so mo ye azo so ake mo si mo ke azo so aye mo. Biani, mo ye ti fa atene, amakonzi ti aturugu ti mo na azo so kue ayeke sara kua na mo ayeke mbeni ye na le ti mo oko pepe. Fadeso mbi hinga awe: tongana e kue, e kui laso si Absalom angba fade na fini, ka ayeke nzoni na le ti mo!

⁸ Londo, mo sigigi, mo tene mbeni tënë ti zia ngia na be ti aturugu ti mo si. Na iri ti *KOTA GBIA! Tongana mo sigigi pepe, zo oko ayeke ngba na bi so na tere ti mo pepe. Fade kpale ti mo ayeke kiri ti hon akpale so asi na mo, ngbene ye so mo yeke maseka ngbii asi laso.”

⁹ Nilaa gbia ague, aduti na yanga ti gbata ni. A gue, atene tënë ni na aturugu; ala kue ague, abongbi tere ti ala na dawa ti gbia. Aturugu ti Absalom akpe si zo oko oko akiri na da ti lo.

Azo ahunda na David ti kiri na Jérusalem

¹⁰ Na popo ti azo ti mara ti Israel kue, azo ayeke *bingbi tënë mingi mingi na popo ti ala, atene: “Gbia David laa azi e na maboko ti awato ti e; lo laa lo soo e na maboko ti azo ti Filistii. Fadeso lo kpe kodro ni ndali ti Absalom.

¹¹ Me Absalom, lo so lani e mu lo ti ga gbia ti e so, lo kui na bira awe. Nyen laa e yeke ku ti sara titene gbia akiri?”

¹² Ti gbia David, lo tokua na awayango-sandaga Sadok na Abiatar, lo tene: “Ala tene na *akangba ti Juda atene: ‘Ala ye ti duti andangba zo so ayeke sara titene gbia akiri na kodro ti lo? Andaa gbia ahinga ye so tanga ti azo ti Israel aye ti sara.

¹³ Ala azo ti Juda, ala yeke a-ita ti lo, taa a-ita ti lo. Ala laa alingbi ti duti andangba zo so ayeke mu gbia ti kiri na lo?’

¹⁴ Fade ala yeke tene nga na Amasa: ‘Mo yeke taa ita ti mbi pepe? Tongana mbi zia mo makonzi na li ti aturugu biani biani na plase ti Yoab pepe, ayeke nzoni Nzapa asara ye ti ngangu mingi na mbi!’ ”

¹⁵ Tënë so David atene agbu be ti azo ti Juda kue. Na beoko, ala tokua na gbia, atene: “Mo kiri ge, mo na azo ti mo kue!”

¹⁶ Tongaso gbia amu lege ti kiri na kodro, lo si na yanga ti ngu ti Jourdain. Azo ti Juda asi na Gilgal; ala wara gbia ti mu maboko na lo ti fâ ngu ti Jourdain.

David ake ti fâ Shimei

¹⁷ Shimei, molenge ti Gera, zo ti mara ti Benjamin so ayeke na kodro ti Bahurim, ague hio, lo wara azo ti Juda si ala gue, awara gbia David.

¹⁸ Azo ti mara ti Benjamin saki oko amu peko ti Shimei. Siba, zo ti kua ti Saul na amolenge ti lo baleoko na oku, na azo ti kua ti lo baleuse amu nga peko ti Shimei. Ala ye fade titene ala si na yanga ti ngu ti Jourdain ti wara gbia

¹⁹ kozo titene ngo so ayo gbia na asewa ti lo afâ ngu. Azo ni aye fade ti sara ye alingbi na yanga so gbia amu. So gbia afâ ngu awe, Shimei, molenge ti Gera ati na sese na gbe ti gbia

²⁰ si atene na lo: “Gbia ti mbi, ayeke nzoni mo zia be ti mo pepe na ndö ti sioni so mbi sara na mo. Mo dabe ti mo pepe na sioni so mbi sara na mo na ndembe so mo londo na Jérusalem ti sigigi. Mo bata tënë so na be ti mo pepe!

²¹ Gbia ti mbi, mbi hinga so mbi sara siokpari awe. Me laso, mbi yeke kozo zo na popo ti azo ti Israel kue ti Banga ti ga ti wara mo.”

²² Abishai, so iri ti mama ti lo ayeke Seruya amu tënë si lo tene: “Shimei so lani azonga gbia so *KOTA GBIA asoro lo so, tënë so lo tene so laa alingbi ti kanga lege ti fâ lo?”

²³ Me David atene: “Ala amolenge ti Seruya, ala yoro yanga ti ala na ya ti tënë ti mbi ngbanga ti nyen? Ngbanga ti nyen si laso ala ga awato ti mbi? Laso mbi hinga biani mbi tene, mbi yeke gbia ti Israel. Ndani laa, mbi ye pepe titene a fâ zo laso na sese ti Israel.”

²⁴ Na pekoni, gbia atene na Shimei: “Fade a yeke fâ mo pepe, mbi deba yanga ti mbi awe.”

David na Mefibaal akiri aleke songo na popo ti ala

²⁵ Mefibaal, ata ti Saul aga nga na lango ni so ti wara gbia. Ti londo na lango so gbia alondo na kodro ahon, ngbii asi na lango so lo kiri na nzoni tere na Jérusalem, Mefibaal afâ kua ti yanga ti lo pepe, lo sukula gere ti lo pepe, lo sukula nga bongo ti lo pepe.

²⁶ So lo si na Jérusalem ti wara gbia, gbia ahunda lo, atene: “Mefibaal, mo mu lani peko ti mbi pepe ngbanga ti nyen?”

²⁷ Mefibaal akiri tënë, atene: “Gbia ti mbi, zo ti kua ti mbi laa ahanda mbi. Mbi tene na be ti mbi, mbi tene: ‘So mbi yeke ti mbi zo ti bubango gere so, fade mbi yeke mu yanga titene a leke lele ti mbi, mbi ko na ndö ni si mbi mu peko ti gbia.’

²⁸ Zo ti kua ti mbi ague, atene mvene na iri ti mbi na mo gbia. Me gbia ti mbi, mo yeke tongana *ange ti Nzapa; mo sara ye so mo baa nzoni na le ti mo.

²⁹ Ti mo, azo kue ti ya ti sewa ti ata ti mbi Saul alingbi fade na kuâ. Me ti mbi, mo zia mbi na popo ti azo so alingbi ti te kobe na ndö ti meza ti mo. Mbeni ye ayeke daa so alingbi ti mu lege na mbi ti kiri ti hunda ye na maboko ti mo?”

³⁰ Gbia atene na lo: “Mo ngba ti diko atënë so kue ngbanga ti nyen? Mbi mu yanga titene mo na Siba akangbi asese ti Saul.”

³¹ Mefibaal atene na gbia: “Siba alingbi ti mu ni kue senge! Kota ye ni ayeke so, gbia akiri na nzoni tere na kodro awe.”

David akiri na Barzilai peko ti nzoni so lo sara na lo

³² Barzilai, zo ti Rogelim, na sese ti Galaad ague nga na yanga ti ngu ti Jourdain. Lo na gbia afâ ngu ni si gi na yanga ti ngu ni, lo zia gbia ti kiri.

³³ Barzilai aga mbakoro mingi, lo yeke na ngu balemiombe. So lani gbia ayeke na kodro ti Mahanaim, Barzilai amu na lo aye so kue alingbi na lo, ngbanga ti so Barzilai ayeke na mosoro mingi.

³⁴ Gbia atene na lo: “Barzilai, e na mo, e gue na Jérusalem. Kâ, mbi yeke mu na mo aye so kue alingbi na mo.”

³⁵ Barzilai akiri tënë na gbia, atene: “Gbia, mbi yeke kiri ti ngba na fini ngu oke titene mbi na mo, e gue na Jérusalem?

³⁶ Fadeso mbi yeke na ngu balemiombe. Mbi lingbi ti kangbi popo ti nzoni ye na sioni ye? Kobe so mbi yeke te, na ye so mbi yeke nyon, mbi lingbi ti ma nzerengo ni? Abia so akoli na awali ayeke he, mbi lingbi ti hinga tongana nyen atene, go ni ayeke nzoni wala ayeke sioni? Ngbanga ti nyen laa mbi yeke kiri ti ga kungba na ndö ti mo, gbia ti mbi?

³⁷ Mbi lingbi ti fâ gi ngu ti Jourdain na mo; awe. Gbia, mbi kpa titene mo sara mara ti nzoni ye tongaso na mbi?

³⁸ Zia lege na mbi, mbi kiri na gbata ti mbi; fade mbi kui kâ, nduru na du ti kuâ ti babâ ti mbi na ti mama ti mbi. Me baa, molenge ti mbi ti koli Kimham laa: fade mo na lo ayeke gue. Mo sara na lo tongana ti so mo baa nzoni na le ti mo.”

³⁹ Gbia atene: “Nzoni! Fade mbi na Kimham, e yeke gue; mbi yeke sara na lo tongana ti so anzere na be ti mo. Ye so kue mo yeke hunda na mbi, mbi yeke mu na mo.”

⁴⁰ Azo kue afâ ngu ti Jourdain na peko ti so gbia afâ ti lo ngu ni awe. David asu ngbangba ti Barzilai, lo sara tufa na ndö ti lo; na pekoni, Barzilai akiri na ndo ti lo.

⁴¹ Gbia amu lege ague na Gilgal, Kimham amu peko ti lo. Azo ti Juda kue na ndambo ti azo ti Israel ti Banga, ala na gbia David ague legeoko.

Papa na popo ti azo ti Juda na azo ti Israel

⁴² Azo ti Israel aga nduru na gbia si ala hunda lo, atene: “Ngbanga ti nyen si a-ita ti e, azo ti Juda, amu mo na maboko ti e? Ngbanga ti nyen si ala sara titene mo fâ ngu ti Jourdain, mo na asewa ti mo nga na aturugu ti mo so?”

⁴³ Azo ti Juda akiri tënë na azo ti Israel, atene: “Ngbanga ti so gbia ayeke taa sewa ti e! Ala sara ngonzo ngbanga ti nyen? Gbia laa abata e? Lo mu na e akadoo?”

⁴⁴ Azo ti Israel akiri tënë na azo ti Juda, atene: “Gbia ayeke ti e fani baleoko ahon ti ala! Biani, David ayeke ti e fani baleoko ahon ti ala! Ala baa e tongana ambumbuse zo ngbanga ti nyen? E laa e yeke akozo so asara titene gbia ti e akiri.” Me yanga ti azo ti Juda akpengba ahon ti azo ti Israel.