2 Samuel 17 - Mbeti ti Nzapa - Tënë so amu fini

Hushai ake wango ti Ahitofel

¹ Ahitofel atene na Absalom: “Zia mbi mu azo saki baleoko na use, mbi tumba peko ti David gi na bi so.

² Mbi yeke wara lo na ndembe so lo woko si be ti lo awoko awe. Mbi yeke bi kota mbeto na be ti lo si azo so kue ayeke na tere ti lo ayeke kpe; mbi yeke fâ gi lo oko.

³ Na pekoni, mbi yeke sara titene azo ni kue akiri na mbage ti mo. Zo so mo ye gi kuâ ti lo so, tongana lo kui awe, fade azo ti kodro kue ayeke kiri na mo si ala yeke duti na siriri.”

⁴ Absalom na *akangba kue ti Israel abaa so tënë ti Ahitofel ayeke na legeni.

⁵ Me Absalom atene: “Ayeke nzoni a iri nga Hushai, zo ti mara ti Arki, e ma tënë ti lo si.”

⁶ So Hushai asi, Absalom atene na lo atënë so Ahitofel atene. Na pekoni, lo hunda lo: “Alingbi e sara ye tongana ti so lo tene so? Mo tene ti mo daa nyen?”

⁷ Hushai akiri tënë na Absalom, atene: “Ti so ni, wango so Ahitofel amu so ayeke nzoni pepe.

⁸ Mo hinga babâ ti mo na azo ti lo kue: ala kue ayeke akpengba turugu, ala sara ngonzo mingi tongana ti *urse so a nzi molenge ti lo na ya ti ngonda. Babâ ti mo ayeke zo ti bira; na bi, lo na tanga ti azo ti lo ayeke lango na ndo oko pepe.

⁹ Fadeso, lo honde tere ti lo na ya ti mbeni du ti têne wala na mbeni ndo. Tongana a fâ azo na mbage ti e kozo, fade tënë ni ayeke mu ndo kue si azo ayeke tene: ‘A fâ azo mingi so amu peko ti Absalom.’

¹⁰ Tongaso, ataa turugu so ayeke na ngangu mingi si be ti lo akpengba tongana ti bamara, tongana lo ma tënë so, be ti lo ayeke fun kue, ngbanga ti so azo ti Israel kue ahinga atene, babâ ti mo ayeke mbeni kpengba turugu si aturugu so amu peko ti lo ayeke angangu zo ti bira.

¹¹ Ti mbi, wango so mbi ye ti mu ayeke so: ayeke nzoni mo bongbi aturugu kue ti Israel na tere ti mo, ti londo na Dan ngbii asi na Bersheba. Alingbi wungo ti ala aduti tongana wungo ti mbutu ti yanga ti kota ngu-ingo. Na pekoni, mo wani, mo duti na li ti ala ti gue na bira ni.

¹² Ndo so kue David ayeke daa, e yeke wara lo, e yeke ti na ndö ti lo tongana ti so ngu ti pere ayeke ti na ndö ti sese. Zo oko ayeke ngba na fini pepe, ataa lo, ataa aturugu ti lo.

¹³ Tongana ala honde tere ti ala na ya ti mbeni gbata, azo ti Israel kue ayeke ga na kamba, e yeke gboto gbata ni ngbii asi na ya ti mbeni ngu; e yeke gboto ni ngbii têne oko ti gbata ni angba pepe.”

¹⁴ Absalom na azo ti Israel kue atene: “Wango so Hushai, zo ti mara ti Arki amu so ayeke nzoni mingi ahon wango ti Ahitofel.” Andaa *KOTA GBIA aye ti buba ya ti nzoni wango so Ahitofel amu si fade Absalom awara kpale.

David afâ ngu ti Jourdain

¹⁵ Hushai atene na awayango-sandaga Sadok nga na Abiatar peko ti wango so Ahitofel amu na Absalom nga na *akangba ti Israel. Lo tene nga na ala peko ti wango so lo wani, lo mu.

¹⁶ Na pekoni, lo kiri lo tene: “Fadeso, ala tokua mbeni zo na David hio ti tene na lo, atene: ‘Ayeke nzoni mo lango na lando ti Jourdain pepe; mo gue yongoro, tongaso pepe, a yeke fâ mo, mo na azo ti mo kue ahunzi ala.’ ”

¹⁷ Jonatan, molenge ti Abiatar na Ahimaas, molenge ti Sadok aluti nduru na li ti ngu ti En-Rogel. Mbeni zo ti kua ti wali ayeke daa so ayeke gue ti tene atënë na ala si ala wani ayeke gue ti tene peko ni na gbia David. Biani, Jonatan na Ahimaas alingbi pepe ti li na ya ti gbata ni, ngbanga ti azo abaa ala.

¹⁸ Me mbeni maseka-koli abaa ala si lo tene tënë ni na Absalom. Ala use kue ague hio, ala si na da ti mbeni koli so ayeke lango na kodro ti Bahurim. Du ti ngu ayeke na ya ti gbagba ti lo. Ala zu ti honde tere ti ala na ya ti du ti ngu ni.

¹⁹ Wali ti da ni amu mbeni konza abi na ndö ti yanga ti du ti ngu ni si lo gbara ale ti kobe na ndö ni. Lo sara tongaso titene zo ahinga pepe atene, du ti ngu ayeke na ndo so.

²⁰ Azo so Absalom atokua ala ali na da ti wali ni si ala hunda lo, atene: “Ahimaas na Jonatan ayeke na ndo wa?” Wali ni akiri tënë na ala: “Ala fâ ngu awe.” Azo ti tokua ni agi ala gbaa si ala kiri na Jérusalem.

²¹ So azo ti tokua ni ahon awe, Ahimaas na Jonatan asigigi na ya ti du ti ngu ni si ala gue, atene tënë ni na David; ala tene na lo peko ti wango so Ahitofel amu na tere ti ala. Na pekoni, ala tene na lo: “Ala londo afâ ngu!”

²² Tongaso, David na azo so ayeke na lo alondo afâ ngu ti Jourdain. Na kota ndaperere, azo kue afâ ngu, zo oko angba na peko pepe.

²³ So Ahitofel abaa so azo ake ti ma wango ti lo, lo mu lele ti lo, lo ko na ndö ni si lo kiri na gbata ti lo. Lo leke tënë ti aye ti da ti lo, na pekoni, lo kanga kamba na go ti lo si lo kui. A lu lo na ya ti du ti kuâ ti babâ ti lo.

David asi na Mahanaim

²⁴ David asi na kodro ti Mahanaim. Absalom na aturugu kue ti Israel afâ ngu ti Jourdain.

²⁵ Absalom azia Amasa na li ti aturugu na plase ti Yoab. Amasa ayeke molenge ti mbeni zo ti Israel so iri ti lo ayeke Yeter so amu lani Abigal ti ga wali ti lo. Abigal ayeke molenge ti Nahash, ita ti Seruya, mama ti Yoab.

²⁶ Absalom na azo ti Israel asara bâbâ ti ala na Galaad.

²⁷ So David asi na Mahanaim awe, Shobi, molenge ti Nahash, zo ti Raba, na Makir, molenge ti Amiel, zo ti Lo-Dabar nga na Barzilai, zo ti Rogelim, na sese ti Galaad, ala kue aga na tere ti David.

²⁸ Ala ga na agbogbo, akota sembe, akopo, asembe, akobe ti tengo ni: *ble, *orze, farini, ale ti kobe so a yoro ni yorongo, lantii,

²⁹ mafuta ti wotoro, mafuta so a sara ni na ngu ti mê ti bagara, ataba na fromaze so a sara na ngu ti me ti bagara. Ala ga na aye so kue na David nga na azo so ayeke na tere ti lo titene ala te. Ala tene na be ti ala, atene: “E hinga pepe, azo so ate kobe pepe, ala nyon ngu pepe si ala woko kue na ya ti benyama.”