2 Samuel 16 - Mbeti ti Nzapa - Tënë so amu fini

David na Siba

¹ So David ahon gi li ti hoto ni kete awe, Siba, zo ti kua ti Mefibaal aga na mbage ti lo. Lo yeke na alele use so ayo mapa ngbangbo use, gba ti aholengo le ti *vinye ngbangbo oko so akpa gatoo, ale ti keke ngbangbo oko so abe awe nga na bozo oko ti poro so vin ayeke na ya ni.

² Gbia ahunda Siba, atene: “Nyen laa mo ye ti sara na ye so kue, nyen?” Siba akiri tënë, atene: “Alele so ayeke ti yo asewa ti gbia ti tambula na ala, mapa ni na ale ti keke ni ayeke kobe ti aturugu, vin ni ayeke titene azo so awoko na benyama anyon ni.”

³ Gbia akiri ahunda lo, atene: “Mefibaal, ata ti wa ti mo ayeke na ndo wa?” Siba akiri tënë na gbia, atene: “Lo ngba na Jérusalem. Biani, lo tene: ‘Laso laa azo ti Israel ayeke zia mbata ti gbia ti ata ti lo na lo.’ ”

⁴ Gbia atene na Siba: “Tongaso, aye ti Mefibaal kue ayeke fadeso ti mo.” Siba akuku akpo li ti lo na sese si lo tene: “Gbia ti mbi, ayeke nzoni mo sara nzoni be na mbi lakue.”

Shimei adeba David

⁵ So David asi nduru na Bahurim awe, mbeni koli asigigi, lo na Saul ayeke mara oko, iri ti lo ayeke Shimei, molenge ti Gera. Lo sigigi na ya ti kodro ni si lo yeke deba David.

⁶ Lo bi têne na David nga na azo ti yangbo ti lo; andaa azo ti kodro ni nga na akpengba turugu ayeke tambula na tere ti David, ambeni na mbage ti maboko ti koli, ambeni na mbage ti maboko ti wali.

⁷ Shimei adeba David, atene: “Hon kâ, hon kâ, buba zo, zo ti fango zo!

⁸ *KOTA GBIA afâ ngbanga na li ti mo ndali ti mene ti azo ti da ti Saul so mo tuku so. Mo nzi mbata ti gbia na maboko ti Saul, nilaa KOTA GBIA amu ni na molenge ti mo Absalom. Ti mo, mo ga fadeso zo ti mawa, ngbanga ti so mo yeke zo ti fango zo!”

⁹ Abishai, so iri ti lo ayeke Seruya atene na gbia: “Gbia ti mbi, kuâ ti mbo so ayeke deba mo ngbanga ti nyen? Zia mbi gue, mbi de go ti lo.”

¹⁰ Me gbia atene: “Abishai, mo na ita ti mo Yoab, ti ala na mbi nyen? Tongana lo deba mbi, e hinga pepe, KOTA GBIA laa amu yanga na lo ti deba mbi. Zo wa laa alingbi ti tene na lo, atene: ‘Mo sara tongaso ngbanga ti nyen?’ ”

¹¹ David atene na Abishai nga na azo ti yangbo ti lo kue, atene: “So molenge ti mbi so asigigi na ya ti mbi aye ti fâ mbi so, fade zo ti mara ti Benjamin so asara ye tongaso pepe? Ala zia lo, lo deba mbi tongana KOTA GBIA laa amu yanga na lo.

¹² E hinga pepe, fade KOTA GBIA ayeke baa mawa ti mbi. E hinga pepe, lo yeke sanze dengo ba ti laso titene aga nzoni ye ndali ti mbi.”

¹³ David na aturugu ti lo ayeke hon ti ala hongo. Me Shimei ayeke hon na tere ti hoto ni, lo yo na David na aturugu ti lo pepe. Lo ngba ti deba David, lo yeke bi atêne na mbage ti lo, lo yeke tuku fuku ti sese na le ti nduzu.

¹⁴ Gbia na azo so amu peko ti lo asi na yanga ti ngu ti Jourdain. Ala woko kue; kâ, ala yeke wu tere ti ala.

Hushai asi na ndo ti Absalom

¹⁵ Absalom na gba ti azo ti Israel asi na Jérusalem. Ahitofel ayeke nga na tere ti lo.

¹⁶ So Hushai, zo ti mara ti Arki, wamungo-wango ti David aga nduru na tere ti Absalom awe, lo tene na Absalom: “Gbia na nduzu! Gbia na nduzu!”

¹⁷ Absalom ahunda lo, atene: “Yengo so mo ye na mba ti mo ni laa? Mo mu peko ti lo pepe ngbanga ti nyen?”

¹⁸ Hushai akiri tënë, atene: “Ên-en! Mbi yeke duti na mbage ti zo so *KOTA GBIA na azo ti Israel kue asoro lo. Lo laa mbi ye ti ngba na lo.

¹⁹ Na mbage nga, zo wa laa mbi yeke sara kua na lo, zo wa? Mo laa mo yeke molenge ti mba ti mbi pepe? Kua so lani mbi sara na babâ ti mo, gi ni laa mbi yeke sara ande na mo.”

Absalom na awali ti David

²⁰ Absalom atene na Ahitofel: “Ala gbu li ti ala na ndö ti ye so e lingbi ti sara.”

²¹ Ahitofel akiri tënë na Absalom: “Ambeni wali so babâ ti mo azia ala ti bata yangbo so, ayeke nzoni mo gue, mo lango na ala. Tongaso si azo ti Israel ahinga atene, mo ga sioni na le ti babâ ti mo awe si be ti azo so amu peko ti mo so akpengba.”

²² Azo asara mbeni da ti bongo na li ti da ti yangbo ndali ti Absalom. Kâ, Absalom alango na awali ti babâ ti lo, na le ti azo ti Israel kue.

²³ Na ngoi ni so, wango so Ahitofel amu na azo, ala yeke ma ni tongana tënë ti Nzapa. Tongaso laa, ataa David, ataa Absalom, ala yeke sara ye alingbi gi na awango ti lo kue.