2 Samuel 15 - Mbeti ti Nzapa - Tënë so amu fini

Absalom aye ti mu mbata ti gbia

¹ Na pekoni, Absalom aleke pusu ti mbarata na ambarata, lo mu azo baleoku so ayeke kpe na dawa ti lo.

² Na kota ndaperere, lo yeke luti na tere ti lege, na ndo so a yeke li daa na ya ti gbata ni. Lakue, tongana mbeni zo ayeke na tënë si lo ye ti gue ti baa gbia titene gbia afâ ya ti ngbanga ni, Absalom ayeke iri zo ni si ayeke hunda lo, atene: “Mo yeke zo ti gbata wa?” Tongana zo ni akiri tënë: “Mbi yeke zo ti mara ti Israel tongaso”.

³ Absalom ayeke tene na lo: “Mo baa, tënë ti mo ayeke nzoni si ayeke na legeni. Me mbeni zo ti ma mo ande na ndo ti gbia ayeke daa pepe.”

⁴ Absalom akiri atene: “Tongana mbi yeke fade wafango-ngbanga na ya ti kodro so, ka ayeke nzoni mingi! Ka azo so kue ayeke na tënë wala ala yeke na ngbanga titene a fâ ya ni, ala yeke ga na mbi titene mbi fâ ya ti ngbanga ti ala na legeni!”

⁵ Tongana mbeni zo aga ti kuku na gbe ti Absalom, lo yeke yoro maboko ti lo, lo gbu zo ni si lo su ngbangba ti lo.

⁶ Absalom ayeke sara gi tongaso na azo ti Israel so kue ague na ndo ti gbia titene gbia afâ ya ti ngbanga ti ala. Tongaso Absalom asara ye na lege ti handa si be ti azo ti Israel kue aye lo.

⁷ Na peko ti ngu baleosio, Absalom atene na gbia: “Zia lege na mbi titene mbi gue na Hebron, mbi sara ye so mbi deba yanga ti mbi ti sara na *KOTA GBIA.

⁸ Biani, na ndembe so lani mbi yeke na Geshur, na sese ti Sirii, mbi deba yanga ti mbi, mbi tene: ‘Tongana KOTA GBIA akiri na mbi na Jérusalem, mbi yeke mu na lo *asandaga.’ ”

⁹ Gbia akiri tënë na lo: “Gue nzoni!” Absalom amu lege si lo gue na Hebron.

¹⁰ Kâ, Absalom atokua azo ti lo na hondengo ni na amara ti Israel kue ti tene na ala, atene: “Tongana ala ma toto ti tatalita, ala tene: Absalom aga gbia na Hebron awe.”

¹¹ Azo ti Jérusalem ngbangbo use so Absalom atisa ala, ala na lo ague; ala gue na vuru be, ala hinga ti ala pepe nda ti ye so lo leke.

¹² Na ndembe so Absalom ayeke mu asandaga, lo tokua azo na gbata ti Gilo ti iri Ahitofel, wamungo-wango ti David. Azo so amu peko ti Absalom, wungo ti ala ayeke gue guengo na nduzu, asara si lekengo tënë na hondengo ni na tere ti gbia aga ngangu mingi.

David akpe na Jérusalem ahon

¹³ Mbeni zo ague, atene na David: “Be ti azo ti Israel kue akiri na mbage ti Absalom.”

¹⁴ Tongaso David atene na azo ti yangbo ti lo so kue ayeke na tere ti lo na Jérusalem, atene: “E kpe, tongaso pepe fade Absalom ayeke fâ e kue. Ala sara hio ndali ti so, tongana lo ga ti tiri bira na e, fade lo yeke fâ azo ti kodro ni kue ti hunzi ala.”

¹⁵ Azo ti yangbo ti lo atene na lo: “Gbia, ye so kue mo ye titene e sara, e azo ti gbe ti mo, e yeke sara ni.”

¹⁶ Tongaso, gbia na asongo ti lo kue asigigi na yangbo ti gbia na gere si ala hon. Gbia azia gi ambeni wali ti lo baleoko ti bata yangbo ni.

¹⁷ So gbia na azo so kue amu peko ti lo asigigi na Jérusalem ti hon, ala gue, aluti kete na tere ti ndangba da ti gbata ni.

¹⁸ Aturugu kue ti gbia atambula na gbe ti le ti lo: ala ti Kereti na ti Peleti, na aturugu ti Gat so wungo ti ala ngbangbo omene so amu lani peko ti David, ala yeke tambula na gbe ti le ti lo.

¹⁹ Gbia atene na Itai, makonzi ti aturugu ti Gat, atene: “Mo nga, mo ye ti ga na peko ti e ngbanga ti nyen? Kiri, mo ngba na tere ti fini gbia, ngbanga ti so mo yeke wande; mo yeke zo so mo kpe kodro ti mo awe.

²⁰ Mo si gi biri biri si laso, mbi lingbi ti mu mo ti hon na mo kirikiri? Ti mbi, mbi hinga ndo so mbi yeke gue daa pepe! Kiri na Jérusalem, mo mu a-ita ti mo na tere ti mo, mo gue na ala. Ayeke nzoni *KOTA GBIA asara nzoni be na mo, lo baa mawa ti mo!”

²¹ Itai akiri tënë na gbia: “KOTA GBIA ayeke na fini! Gbia, kota zo ti mbi ayeke nga na fini! Ndo so kue gbia ti mbi ayeke gue daa, ataa ayeke ti kui wala ti ngba na fini, mbi yeke gue daa.”

²² David atene na Itai: “Nzoni! Hon na dawa, e gue!” Nilaa Itai ahon na dawa, lo na aturugu ti lo kue nga na asewa ti ala.

²³ Azo kue ati na kota toto na hongo ti azo ni. Gbia afâ ngu ti Sedron, lo na tanga ti azo so kue amu peko ti lo; ala mu lege so ague na benyama.

²⁴ Wayango-sandaga Sadok ayeke daa, lo na azo ti mara ti Lévi so kue ayo sanduku ti *mbuki ti Nzapa. Ala zia sanduku ni na sese si Abiatar amu *sandaga na Nzapa ngbii azo so kue asigigi na ya ti gbata ni ahon kue.

²⁵ Gbia atene na Sadok: “Mu sanduku ti *mbuki ti Nzapa, mo kiri na ni na ya ti gbata. Tongana KOTA GBIA asara nzoni be na mbi, fade lo yeke kiri na mbi na gbata ni si mbi yeke kiri ti baa sanduku ni nga na da so a zia nde ndali ni.

²⁶ Me tongana KOTA GBIA aye tënë ti mbi pepe, ayeke nzoni lo sara na mbi tongana ti so be ti lo aye.”

²⁷ Gbia akiri atene na wayango-sandaga Sadok: “Baa ye! Mo kiri na siriri na ya ti gbata, mo na molenge ti mo Ahimaas nga na Abiatar, lo na molenge ti lo Jonatan.

²⁸ Ala baa! Ti mbi, mbi yeke ngba ti ku na ya ti benyama, na ndo so azo ayeke fâ ngu ti Jourdain daa, ngbii mbi ma sango ti ala si.”

²⁹ Tongaso Sadok na Abiatar amu sanduku ti mbuki ti Nzapa, ala kiri na ni na Jérusalem si ala ngba kâ.

David atokua Hushai ti bembe Absalom

³⁰ David ayeke ma hoto ti a-olive na toto na yanga ti lo. Lo kanga bongo na li ti lo si lo yeke tambula gere senge. Azo so kue ayeke na tere ti lo ti gue na li ti hoto ni, ala nga akanga bongo na li ti ala si ala yeke toto.

³¹ Azo ague, atene na David: “Ahitofel ayeke na popo ti azo so ala na Absalom aleke tënë na hondengo ni na tere ti gbia.” David atene: “*KOTA GBIA, mbi voro mo, sara si wango ti Ahitofel aga buba wango!”

³² So David asi na li ti hoto ni awe, na ndo so azo ayeke voro Nzapa daa, Hushai, zo ti mara ti Arki ayeke ga na mbage ti lo. Lo suru bongo na tere ti lo, ya ti li ti lo kue gi na sese.

³³ David atene na lo: “Tongana mo ga na peko ti mbi, fade mo yeke ga kungba na ndö ti mbi.

³⁴ Me tongana mo kiri na ya ti gbata si mo tene na Absalom: ‘Gbia, mbi yeke zo ti kua ti mo. Lani mbi yeke zo ti kua ti babâ ti mo, me fadeso mbi ga zo ti kua ti mo awe.’ Tongaso, fade mo yeke mu maboko na mbi ti kanga lege na wango ti Ahitofel.

³⁵ Awayango-sandaga Sadok na Abiatar ayeke kâ na tere ti mo! Atënë so kue mo yeke ma na yangbo ti gbia, fade mo yeke tene tënë ni na ala.

³⁶ Ahimaas, molenge ti Sadok na Jonatan, molenge ti Abiatar, ala use kue ayeke na tere ti ala. Atënë so kue ala yeke ma, fade ala yeke tene na amolenge ni ti ga ti tene peko ni na mbi.”

³⁷ Hushai, wamungo-wango ti David akiri na Jérusalem gi na oko ngoi so Absalom ayeke si na Jérusalem.