2 Samuel 14 - Mbeti ti Nzapa - Tënë so amu fini

Absalom akiri na Jérusalem

¹ Yoab, so iri ti mama ti lo ayeke Seruya ahinga atene, be ti gbia David akiri na mbage ti Absalom awe.

² Nilaa lo tokua azo na gbata ti Tekoa ti iri mbeni wali ti ndara. Lo tene na wali ni, lo tene: “Fade mo sara ye tongana zo so ayeke na mua; yu abongo ti mua, zia yombo na tere ti mo pepe. Mo sara ye tongana mbeni wali so ayeke na mua aninga awe.

³ Na pekoni, mo gue, mo wara gbia. Tënë so mbi yeke tene na mo so, fade mo tene na lo.” Yoab afa na lo tënë so lo lingbi ti tene.

⁴ Wali ti Tekoa ni ague, atene tënë na gbia. Lo kuku, lo kpo li ti lo na sese si lo tene: “Gbia, soo mbi maa!”

⁵ Gbia ahunda lo: “Nyen laa asi na mo, nyen?” Wali ni akiri tënë: “Ae! Mbi yeke wali-mua, koli ti mbi akui awe.

⁶ Mbi yeke na amolenge-koli use; ala tiri na ya ti ngonda. Mbeni apika ita ti lo afâ lo, ngbanga ti so mbeni zo ti kangbi ya ti ala ayeke daa pepe.

⁷ Azo ti kete mara ti mbi kue alondo na tënë na tere ti mbi; ala tene: ‘Zia molenge so afâ ita ti lo so na maboko ti e, e ye ti fâ lo nga tongana ti so lo fâ ita ti lo so. Tongaso laa e yeke zi lo so fade lo yeke mu aye na peko ti kuâ ti babâ ti lo.’ Kete wâ so angba na mbi so, fade ala yeke mingo ni si iri ti koli ti mbi na ti asewa ti lo kue agirisa na ndö ti sese so.”

⁸ Gbia atene na wali ni: “Kiri na da ti mo. Fade mbi yeke mu yanga ndali ti mo.”

⁹ Wali ti Tekoa ni atene na gbia: “Gbia, tongana mbeni tënë ayeke daa si ayeke tongana nyen, fade ayeke ngba gi na li ti mbi na asewa ti mbi. Ayeke nzoni tënë ni ati na ndö ti mo wala na ndö ti lengo-gbia ti mo pepe.”

¹⁰ Gbia atene: “Tongana mbeni zo atene sioni tënë na mo, ayeke nzoni mo ga na lo na mbi. Fade zo ni ayeke kiri ti sara mara ti ye ni na mo pepe.”

¹¹ Wali ni atene: “Ayeke nzoni gbia adeba yanga ti lo na iri ti *KOTA GBIA, Nzapa ti lo titene zo so alingbi ti kiri peko ti fango molenge ti mbi na zo ti fango lo, alingbi lo kiri lo zia vundu na ndö ti vundu pepe na fango tanga ti molenge so angba na mbi!” Gbia ni atene: “KOTA GBIA ayeke na fini! Ataa kua ti li ti molenge ti mo oko ayeke ti pepe!”

¹² Wali ni atene: “Gbia, zia mbi tene mbeni tënë na mo.” Gbia atene: “Tene tënë ni ma!”

¹³ Wali ni atene: “Mo leke na be ti mo ti sara ye tongaso na azo ti Nzapa ngbanga ti nyen? Tënë so asigigi fade na yanga ti mo afa atene, mo sara sioni, ngbanga ti so mo sara pepe titene lo so lani mo tumba lo ti gue na mbeni kodro wande so, lo kiri.

¹⁴ Mbeni lâ, fade e kue, e yeke kui. E yeke tongana ngu so zo atuku na sese si lo lingbi ti kiri ti to ni pepe. Me ye so Nzapa adiko laa pepe ndali ti lo so a tumba lo ti gue na mbeni kodro yongoro; me Nzapa aleke na be ti lo titene zo ni angba yongoro na lo pepe.

¹⁵ Fadeso, mbi ga ti tene tënë so na mo gbia, ngbanga ti so azo azia mbeto na be ti mbi. Mbi tene na be ti mbi, mbi tene: ‘Fade mbi yeke tene tënë na gbia. Mbi hinga pepe, fade gbia ayeke sara ye alingbi na tënë so mbi, zo ti kua ti lo, mbi yeke tene na lo.

¹⁶ Fade gbia ayeke yeda ti soo mbi na molenge ti mbi na maboko ti zo so aye ti zi e na popo ti azo so Nzapa asoro ala.’

¹⁷ Mbi tene na be ti mbi, mbi tene: ‘Gbaa, tënë so gbia ayeke tene, ayeke de be ti zo. Biani, gbia ayeke tongana mbeni *ange ti Nzapa, ngbanga ti so lo hinga ti kangbi popo ti ye so ayeke nzoni na ye so ayeke sioni.’ Ayeke nzoni KOTA GBIA, Nzapa ti mo aduti na mo!”

¹⁸ Gbia akiri tënë na wali ni: “Mbi yeke hunda na mo mbeni tënë oko; mo yeke kiri tënë na mbi, me mo honde mbeni tënë oko na mbi pepe.” Wali ni atene: “Ayeke nzoni gbia ti mbi atene tënë!”

¹⁹ Gbia ahunda wali ni: “Yoab ayeke na gbe ti atënë so mo tene so pepe?” Wali ni akiri tënë: “Gbia ayeke na fini! Mbi lingbi ti handa mo pepe! Biani, zo ti kua ti mo Yoab laa amu na mbi yanga; lo fa na mbi atënë so kue mbi lingbi fade ti tene.

²⁰ Lo sara tongaso titene ye asanze. Me mo gbia ti mbi, ndara ti mo ayeke tongana ti ange ti Nzapa. Mo hinga ye so kue ayeke si na ndö ti sese.”

²¹ Na pekoni, gbia atene na Yoab: “Mbi ye ti sara ye tongana ti so mo tene so. Gue, mo mu maseka-koli Absalom, mo kiri na lo ge.”

²² Yoab akuku akpo li ti lo na sese si lo mu singila na gbia, lo tene: “Gbia, laso mbi hinga, mbi tene, mo baa mbi na nzoni le awe, ngbanga ti so mo yeda ti sara ye alingbi na tënë so mbi tene.”

²³ Yoab amu lege ague na Geshur. Lo mu Absalom, lo kiri na lo na Jérusalem.

²⁴ Me gbia atene: “Ayeke nzoni Absalom ague na da ti lo! Lo ga na dawa ti mbi pepe!” Nilaa Absalom ague na da ti lo, lo si na dawa ti gbia pepe.

David na Absalom aleke songo na popo ti ala

²⁵ Na Israel kue, mbeni zo so apendere si azo ayeke gonda lo tongana Absalom ayeke daa pepe. Ti londo na gere ti lo asi na li ti lo, mbeni sioni ye oko ayeke daa pepe.

²⁶ Na ya ti ngu oko oko, lo yeke fâ kua ti li ti lo, ngbanga ti so ayeke ne lo mingi. Tongana a haka kua ti li ni, nengo ni ahon kilo use, alingbi na ye ti hakango na ye ti gbia.

²⁷ Absalom adu amolenge-koli ota nga na molenge-wali oko. Iri ti molenge-wali ni ayeke Tamar; lo yeke pendere mingi.

²⁸ Absalom asara ngu use na Jérusalem, lo si na dawa ti gbia pepe.

²⁹ Mbeni lâ, lo iri Yoab ti tokua lo na ndo ti gbia; me Yoab ake ti ga. Lo kiri, lo iri lo ti fani use ni, me Yoab akiri ake.

³⁰ Tongaso Absalom atene na azo ti kua ti lo: “Ala baa yaka ti *orze ti Yoab so ayeke na tere ti yaka ti mbi so. Ala gue, abi wâ daa!” Azo ti kua ni asara ye alingbi na yanga so lo mu.

³¹ Yoab ague, awara Absalom si lo hunda lo, lo tene: “Azo ti kua ti mo ague, abi wâ na yaka ti mbi ngbanga ti nyen?”

³² Absalom akiri tënë: “Ala bi wâ daa, ngbanga ti so mbi iri mo ti tokua mo na ndo ti gbia, me mo ke ti ga. Mbi ye fade titene mo gue, mo tene na gbia, mo tene: ‘Mbi londo na Geshur, mbi kiri ge ngbanga ti nyen? Ayeke fade nzoni titene mbi ngba kâ.’ Fadeso mbi ye ti gue na dawa ti gbia. Tongana mbi sara mbeni ye ti sioni, ayeke nzoni lo mu yanga titene a fâ mbi!”

³³ Yoab ague, atene peko ti atënë ti Absalom kue na gbia. Gbia airi Absalom si lo gue na ndo ti gbia; lo kuku, lo kpo li ti lo na sese na dawa ti gbia. Tongaso gbia asu ngbangba ti lo.