2 Samuel 11 - Mbeti ti Nzapa - Tënë so amu fini

David na Batsheba

¹ Na tongo nda ti ngu, na ngoi so agbia ayeke gue ka ti tiri bira, David atokua Yoab, na aturugu ti kota kamba nga na aturugu ti Israel kue ti fâ azo ti Amon, ti ngoro Raba, li-kodro ni ti mu ni na bira. Me David angba ti lo na Jérusalem.

² Mbeni lâ, na lakui, David alondo na ndö ti gbogbo ti lo, lo yeke fono na mbeni ndo so a leke na li ti da ti lo si azo ayeke duti daa. Kâ, lo baa mbeni wali so ayeke sukula ngu; wali ni apendere mingi.

³ David atokua azo ti hunda tënë na ndö ti wali so. Azo atene na lo: “So Batsheba, molenge ti Eliam, wali ti Urii, zo ti mara ti Het laa.”

⁴ David atokua azo ti ga na wali ni. Wali ni aga na da ti lo si lo lango na lo; na pekoni, wali ni akiri na da ti lo. Andaa lo *sukula fade *sioni na tere ti lo na peko ti so lo baa ya ti lo.

⁵ Batsheba amu ngo. Lo tokua ndo na David, lo tene: “Mbi yeke na ngo.”

⁶ Tongaso, David atokua ndo na Yoab, atene: “Tokua na mbi Urii, zo ti mara ti Het.” Yoab atokua lo na David.

⁷ So Urii asi na dawa ti David, David ahunda lo, atene: “Yoab na tanga ti azo ni ayeke daa? Bira ni kâ ayeke tongana nyen?”

⁸ Na pekoni, David atene na Urii: “Gue na da ti mo, mo wu tere ti mo kete si.” Urii alondo na ndo ti gbia asigigi si na pekoni, gbia atokua mbeni kadoo na lo.

⁹ Me Urii alango na yanga ti yangbo, na ndo so aturugu ti batango gbia kue ayeke lango daa; lo gue na da ti lo pepe.

¹⁰ Azo ague, atene tënë ni na David, atene: “Urii ague na da ti lo pepe.” David atene na Urii: “Mo londo na yongoro ndo laa mo ga so pepe? Ngbanga ti nyen laa mo gue na da ti mo pepe?”

¹¹ Urii akiri tënë na David, atene: “Sanduku ti *mbuki ti *KOTA GBIA, aturugu ti Israel na ala ti Juda kue ayeke lango na gbe ti da ti bongo. Makonzi ti aturugu Yoab na aturugu ti lo ti kota kamba ayeke lango na ya ti ngonda si mbi, mbi gue ti mbi na da ti mbi ti te kobe, ti nyon ye, ti lango na tere ti wali ti mbi? Gbia ayeke na fini! Mbi yeke sara mara ti ye tongaso laoko pepe.”

¹² David atene na Urii: “Ngba mo lango na ndo so laso si; kekereke mbi yeke zia lege na mo ti gue.” Nilaa Urii angba na Jérusalem na lango ni so ngbii asi na ndade ni.

¹³ David atisa Urii ti te kobe na ti nyon ye; lo mu samba na Urii ahon ndoni. Me na lakui ni, Urii ague, alango na ndo so aturugu ti batango gbia ayeke lango daa; lo gue na da ti lo pepe.

¹⁴ Na ndade ni, David asu mbeti na Yoab, lo tokua ni na maboko ti Urii.

¹⁵ Lo su na ya ti mbeti ni, lo tene: “Ala zia Urii na mbeni ndo so bira ayeke kporo daa ngangu; ala kiri ti ala na peko, ala zia gi lo oko si awato apika lo afâ lo.”

Kuâ ti Urii, koli ti Batsheba

¹⁶ Yoab abaa gbata ni nzoni awe, gbata so a ngoro ni na bira awe. Lo zia Urii na ndo so lo hinga lo tene, akpengba turugu ti awato ayeke daa.

¹⁷ Azo ti gbata ni asigigi ti tiri bira na Yoab. Ala fâ ambeni turugu na ambeni turugu ti kota kamba ti David. Ala fâ nga Urii, zo ti mara ti Het.

¹⁸ Yoab atokua mbeni zo na David ti fa na lo peko ti aye so kue asi na ya ti bira ni.

¹⁹ Lo tene na zo ti tokua ni, lo tene: “Tongana mo fa peko ti tënë ti bira ni na gbia awe,

²⁰ tongana lo sara ngonzo, lo tene: ‘Ala gue nduru na gbata ni kâ ti tiri bira ngbanga ti nyen? Ala hinga pepe atene, azo ayeke luti na ndö ti gbagba si ayeke bi aye ti bira?

²¹ Zo wa laa afâ Abimelek, molenge ti Yerubaal so? Ayeke mbeni wali pepe? Wali ni abi kota têne na li ti gbagba, ati na ndö ti lo si lo kui na gbata ti Tebes! Ala gue nduru na tere ti gbagba ni ngbanga ti nyen?’ Tongana gbia atene na mo tongaso, fade mo yeke tene na lo, mo tene: ‘Turugu ti mo ti kota kamba Urii, zo ti mara ti Het nga akui.’ ”

²² Zo ti tokua ni ague, atene na David peko ti tënë ti aye so kue Yoab atene na lo.

²³ Lo tene na David: “Ngangu ti azo ni ahon ti e. Ala sigigi na ya ti gbata ni ti ga na tere ti e, me e pusu ala na peko ngbii e si na yanga ti gbata ni.

²⁴ Azo ti pikango kokora aluti na li ti gbagba ni si ala pika le ti kokora na ndö ti azo ti mo. Gi tongaso laa ambeni turugu ti mo ti kota kamba akui; Urii, zo ti mara ti Het nga akui.”

²⁵ David atene na zo ti tokua ni: “Gue mo tene na Yoab, mo tene: ‘Ye so asi so, ayeke nzoni mo zia be ti mo na ndö ni mingi pepe. Na ya ti bira kue, kuâ ayeke kui ka mbage na mbage. Ayeke nzoni mo sara kue ti sara bira na gbata ni, mo buba ni kue.’ Ti mo, zo ti tokua ni, mo mu ngangu na be ti lo.”

²⁶ So Batsheba, wali ti Urii ama a tene, koli ti lo akui awe, lo sara mua ti lo.

²⁷ Me so lango ti sarango mua ni ahunzi awe, David atokua titene a ga na Batsheba si lo zia lo na da ti lo. Lo ga wali ti lo si lo du molenge-koli na lo. Me ye so David asara so anzere na KOTA GBIA pepe.