2 Samuel 10 - Mbeti ti Nzapa - Tënë so amu fini

A zia kamene na le ti akota zo ti kua ti David

¹ Na pekoni, gbia ti azo ti Amon akui; molenge ti lo Hanun aga gbia na peko ti lo.

² David atene: “Mbi ye ti sara nzoni be na Hanun, molenge ti Nahash tongana ti so babâ ti lo asara ando nzoni be na mbi.” Nilaa David atokua azo ti kua ti lo ti kangbi mua na lo ndali ti kuâ ti babâ ti lo. So azo ti kua ti David asi na kodro ti azo ti Amon awe,

³ akota zo ti kodro ti Amon atene na Hanun, wa ti ala: “Mo baa ti mo, mo tene, David aye ti ne kuâ ti babâ ti mo si lo tokua azo ti kangbi mua na mo so? Lo tokua azo ti lo so ti tambula, ti *bembe ndo na ya ti gbata ni si mbeni lâ, ala mu ni pepe?”

⁴ Tongaso, Hanun agbu azo ti kua ti David, lo kio mbage ti kua ti yanga ti ala, lo fâ bongo ngbii asi na ngbonda ti ala si lo tumba ala.

⁵ A tene tënë ni na David; lo tokua azo ti wara ala, ngbanga ti so kamene ahon ndö ti ala. Gbia David atokua yanga na ala, atene: “Ala ngba na Jéricho ngbii kua ti yanga ti ala asigigi si fade ala kiri na kodro.”

Bira na azo ti Amon nga na azo ti Sirii

⁶ Azo ti Amon ahinga atene, ala ga sioni na le ti David awe. Ala futa aturugu 20 000 ti Sirii ti Bet-Rehob nga na ala ti Soba; aturugu ti gbia Maaka 1 000 na ala ti Tob 12 000.

⁷ So David ama tënë ni, lo tokua Yoab, lo na akpengba turugu.

⁸ Azo ti Amon asigigi, ala leke tere ti ala na yanga ti gbata ni ti sara bira. Azo ti Sirii so alondo na Soba na ala ti Bet-Rehob, na aturugu ti Tob na ala ti Maaka aluti ti ala nde na ya ti ngonda.

⁹ Yoab ahinga atene, ambeni zo ti bira ni aluti na dawa ti lo ti tiri na lo si ambeni aluti na peko ti lo. Lo soro akpengba turugu na popo ti azo ti Israel si lo zia ala ti tiri bira na aturugu ti Sirii.

¹⁰ Lo zia tanga ti aturugu ni na maboko ti ita ti lo Abishai; lo zia lo, lo luti le na le na azo ti Amon.

¹¹ Yoab atene: “Tongana azo ti Sirii ahon ndö ti mbi, fade mo yeke ga ti mu maboko na mbi. Me tongana azo ti Amon laa ahon ndö ti mo, fade mbi yeke ga ti mu maboko na mo.

¹² Mo gbu ngangu, e sara ye ti koli ndali ti azo ti e nga ndali ti agbata ti Nzapa ti e. Ayeke nzoni *KOTA GBIA asara ye so be ti lo aye.”

¹³ Yoab na aturugu ti lo ague na dawa ti azo ti Sirii ti tiri bira na ala; azo ti Sirii ni akpe na dawa ti lo.

¹⁴ So azo ti Amon abaa so azo ti Sirii akpe awe, ala nga, ala kpe na dawa ti Abishai si ala kiri na ya ti gbata ti ala. Tongaso, Yoab azia lege ti tiringo bira na azo ti Amon si lo kiri na Jérusalem.

¹⁵ So azo ti Sirii abaa so azo ti Israel ahon ndö ti ala na bira awe, ala bongbi aturugu ti ala kue.

¹⁶ Hadadezer atokua ndo ti bongbi azo ti Sirii, ala so ayeke na mbage ti kota ngu ti Efrate. Azo ti Sirii ni asi na Helam. Zo so ayeke na li ti ala ayeke Shobak, makonzi ti aturugu ti Hadadezer.

¹⁷ A tene tënë ni na David; lo bongbi aturugu ti Israel kue, lo na ala afâ ngu ti Jourdain si ala si na Helam. Azo ti Sirii aleke tere ti ala abaa le na David tiri bira na lo.

¹⁸ Me azo ti Sirii agbu le ni pepe si ala kpe na dawa ti azo ti Israel. David na aturugu ti lo afâ azo ti kpengo na apusu ti mbarata ti azo ti Sirii 700, azo ti kpengo na mbarata 40 000. Lo zia ka na tere ti Shobak, makonzi ti aturugu ti Sirii si lo kui gi na ndo so.

¹⁹ So agbia so kue ayeke na gbe ti gbia Hadadezer abaa so azo ti Israel ahon ndö ti ala na bira awe, ala leke tënë ti siriri na azo ti Israel si ala duti na gbe ti azo ti Israel ni. Mbeto ti kiri ti mu maboko na azo ti Amon asara azo ti Sirii.