2 Mbai 7 - Mbeti ti Nzapa - Tënë so amu fini

Asandaga so a mu na KOTA GBIA

¹ So Salomon ahunzi ti sambela awe, mbeni wâ alondo na yayu agbi *sandaga so a yeke gbi ni kue na wâ nga na asandaga ti beoko si gonda ti *KOTA GBIA asi singo na ya ti kota da ti Nzapa.

² Awayango-sandaga awara lege pepe ti li na ya ti kota da ti Nzapa, ngbanga ti so gonda ti KOTA GBIA asi singo na ya ti da ni.

³ Azo ti Israel kue abaa wâ so alondo na yayu azu si gonda ti KOTA GBIA asi singo na ya ti kota da ni. Ala kuku akpo li ti ala na sese so a leke pendere pendere na têne; ala sepela KOTA GBIA, atene: “Biani, lo yeke nzoni; nzoni be ti lo angba kpu na kpu!”

⁴ Gbia na azo ni kue amu asandaga na dawa ti KOTA GBIA.

⁵ Gbia Salomon amu sandaga ti abagara saki baleuse na use, ataba na angasa saki ngbangbo oko na baleuse. Lege so gbia na azo ni kue asara matanga ti ziango kota da ni nde ndali ti Nzapa laa.

⁶ Awayango-sandaga aluti na ndo ti kua ti ala; azo ti mara ti Lévi aluti nga si ala yeke pika aye ti mozoko so David aleke ndali ti KOTA GBIA; ala yeke sepela KOTA GBIA, alingbi na bia so David azia na ala; ala tene: “Biani, nzoni be ti lo angba kpu na kpu!” Awayango-sandaga aluti na dawa ti ala si ala yeke huru atatalita; azo ti Israel kue aluti na nduzu.

⁷ Salomon azia nde ndali ti Nzapa ya ti gbagba so ayeke na dawa ti kota da ti KOTA GBIA. Na ndo so laa lo mu asandaga so a yeke gbi ni kue na wâ, mafuta ti anyama so a yeke mu na sandaga ti beoko, asandaga ti ale ti kobe, ngbanga ti so gbalaka so lani Salomon asara na bengba wen alingbi pepe titene a zia asandaga ni kue na ndö ni.

⁸ Na ngoi ni so, Salomon asara matanga ti Akpangba na ya ti lango mbarambara, lo na azo ti Israel kue. Azo ayeke gbani gbani; ala londo na ando nde nde laa aga: ti londo na sese ti Lebo-Hamat, na mbage ti Banga ngbii asi na ngu ti Ezipte, na mbage ti Mbongo.

⁹ Na lango miombe ni, ala sara mbeni kota bongbi. Ala sara matanga ti zia gbalaka nde ndali ti Nzapa na ya ti lango mbarambara; na pekoni, ala kiri asara matanga ti Akpangba ni na ya ti lango mbarambara.

¹⁰ Na pekoni, na lango baleuse na ota ti nze mbarambara ni, gbia azia lege na azo ti kiri na da ti ala. Na kiringo ti ala, tere ti ala anzere, be ti ala gi na ngia ndali ti nzoni so KOTA GBIA asara lani na David, na Salomon nga na azo ti Israel, azo ti lo.

KOTA GBIA akiri asi na Salomon ti fani use ni

¹¹ So Salomon ahunzi ti sara kota da ti *KOTA GBIA na yangbo ti gbia awe si lo hunzi nga ti leke aye so lo leke na be ti lo ti sarango ni na ya ti kota da ti KOTA GBIA nga na ya ti yangbo ti lo wani awe,

¹² KOTA GBIA asi na lo na bi si atene na lo: “Mbi ma sambela ti mo awe; mbi soro ndo so ndali ti mbi titene a sara da ti mungo asandaga daa.

¹³ Tongana mbi kanga le ti nduzu si ngu-Nzapa apika pepe, tongana mbi mu yanga na agbadola ti te aye ti kodro ni kue, wala mbi tokua sioni kobela ti bubango kodro na tere ti azo ti mbi,

¹⁴ tongana azo ti mbi so a di iri ti mbi na ndö ti ala asara tere ti ala kete, ala sambela mbi, ala gi le ti mbi si ala zia sioni lege ti sarango ye ti ala, mbi so mbi yeke na yayu kâ, fade mbi yeke ma sambela ti ala, mbi yeke zi siokpari na li ti ala si mbi yeke sara titene kodro ti ala aga nzoni.

¹⁵ Fadeso, mbi zi le ti mbi awe, mbi dingi mê ti mbi ti ma sambela so azo ayeke sara na ndo so.

¹⁶ Mbi soro da so si mbi zia ni nde ndali ti mbi titene iri ti mbi angba na ndö ni kpu na kpu. Fade le ti mbi na nzoni be ti mbi ayeke ngba na ndö ni lakue.

¹⁷ Ti mo, tongana mo tambula na dawa ti mbi tongana ti so babâ ti mo David asara lani, tongana mo sara ye so kue alingbi na yanga so mbi mu na mo, tongana mo sara ye alingbi na andia ti mbi nga na aye so mbi fa,

¹⁸ fade mbi yeke sara titene lengo-gbia ti mo angba lakue alingbi na *mbuki so mbi na babâ ti mo David, e sara. Mbi tene lani na lo, mbi tene: ‘Fade mbeni zo ti sewa ti mo ayeke duti daa lakue ti sara komandema na ndö ti Israel.’.

¹⁹ Me tongana ala zia peko ti ala na mbi si ala ke ti sara ye alingbi na andia ti mbi nga na atënë ti ndia ti mbi so mbi mu na ala, tongana ala gue ti sara na ambeni nzapa nde si ala kuku na gbe ti anzapa ni,

²⁰ fade mbi yeke gboto ala na sese ti mbi tongana ti so a yeke gboto pere; sese so mbi mu na ala so. Kota da so mbi zia ni nde ndali ti mbi wani, fade mbi yeke bi ni yongoro na le ti mbi, mbi yeke sara titene aga mbeni ye ti *mato nga na ye so azo kue ayeke he na ngia.

²¹ Tongana mbeni zo ahon ande na tere ti kota da so azo agonda ni mingi so, fade li ti lo kue ayeke kpe si lo yeke hunda tere ti lo, lo tene: ‘KOTA GBIA asara na kodro so nga na kota da so tongaso ngbanga ti nyen’?

²² Fade a yeke kiri tënë na lo, atene: ‘Ye ni asi tongaso, ngbanga ti so azo ti Israel azia KOTA GBIA, Nzapa ti akotara ti ala, lo so lo sara si akotara ti ala ni asigigi na sese ti Ezipte. KOTA GBIA asara si aye ti ngangu so asi na ala, ngbanga ti so ala mu peko ti ambeni nzapa nde, ala kuku na gbe ti anzapa ni si ala voro ala.’ ”