2 Mbai 6 - Mbeti ti Nzapa - Tënë so amu fini

¹ Tongaso Salomon atene: “KOTA GBIA, mo tene lani, mo tene, mo yeke duti na ya ti vukongo ndo so avuko pitipiti.

² Me ti mbi, mbi sara da na mo, ndo so mo yeke duti daa lakue lakue!”

Salomon azia kota da ti Nzapa nde ndali ti Nzapa

³ Azo ti Israel kue abongbi, ala luti na nduzu; Salomon abaa ndo na mbage ti ala si lo sara tufa na ndö ti ala.

⁴ Lo tene: “Mbi mu singila na *KOTA GBIA, Nzapa ti Israel! Zendo so lo mu lani na babâ ti mbi David, lo wani, lo sara ye alingbi na ni;

⁵ nilaa lo tene: ‘Ti londo na lango so mbi sara si azo ti mbi asigigi na sese ti Ezipte, mbi soro laoko pepe mbeni gbata na popo ti amara ti Israel kue titene a sara da na ya ni ndali ti mbi, wala mbi soro mbeni zo pepe titene lo ga makonzi ti azo ti Israel, azo ti mbi.

⁶ Me mbi soro Jérusalem ti duti daa, mbi soro nga David titene lo sara komandema na ndö ti Israel, azo ti mbi.’

⁷ Babâ ti mbi David aleke lani na be ti lo ti sara da ndali ti KOTA GBIA, Nzapa ti Israel.

⁸ KOTA GBIA atene na lo: ‘Mo leke na be ti mo ti sara da ndali ti mbi, so nzoni mingi.

⁹ Me mo laa mo yeke sara ande da ni pepe; molenge ti mo laa ayeke sara da ni ndali ti mbi.’ ”

¹⁰ Salomon akiri atene: “Tënë so KOTA GBIA atene lani so, lo sara ye alingbi na ni awe: mbi ga gbia na peko ti babâ ti mbi David, mbi duti na ndö ti mbata ti Israel, alingbi na tënë so KOTA GBIA atene lani, nilaa mbi sara kota da so ndali ti KOTA GBIA, Nzapa ti Israel.

¹¹ Mbi zia na ya ti da ni sanduku so atêne so a su atënë ti *mbuki na le ni, mbuki so KOTA GBIA na azo ti Israel asara.”

Salomon asambela Nzapa

¹² Na pekoni, Salomon aluti na dawa ti gbalaka ti *KOTA GBIA, na le ti bongbi ti azo ti Israel kue, lo ya maboko ti lo na nduzu.

¹³ Andaa Salomon amu lani yanga si a sara mbeni ye na bengba wen ti luti na ndö ni, a zia ni na be ti gbagba ni. Yongoro ni ayeke metere use na ndambo, nduru ni ayeke metere use na ndambo, yongo ni na nduzu ayeke metere oko na ndambo. Salomon aluti na ndö ti ye ni, lo kuku na likunu ti lo na dawa ti bongbi ti azo ti Israel kue, lo yoro maboko ti lo na nduzu ti sambela,

¹⁴ lo tene: “KOTA GBIA, Nzapa ti Israel, mbeni nzapa ti lingbi na mo ayeke daa pepe, ataa na yayu wala na sese. Mo yeke bata tënë ti *mbuki na azo ti kua ti mo si mo yeke sara nzoni be na azo so ayeke tambula na dawa ti mo na be ti ala kue.

¹⁵ Zendo so mo mu lani na babâ ti mbi David, zo ti kua ti mo, mo sara ye alingbi na ni awe. Tënë so mo tene na lo, mo wani, mo sara ye alingbi na ni awe; ye ni laa asi laso so.

¹⁶ Fadeso KOTA GBIA, Nzapa ti Israel, sara ye alingbi na tënë so mo tene lani na babâ ti mbi David, zo ti kua ti mo; lani mo tene: ‘Tongana amolenge ti mo abata lege ti dutingo ti ala nzoni, tongana ala sara ye alingbi na *Ndia ti mbi tongana ti so mo wani, mo sara, fade mbeni zo oko ti ya ti sewa ti mo ayeke duti lakue na ndö ti mbata ti gbia ti Israel.’

¹⁷ Fadeso KOTA GBIA, Nzapa ti Israel, tënë so mo tene na David, zo ti kua ti mo so, mo sara ye alingbi na ni!

¹⁸ “Me Nzapa alingbi biani ti duti na ndo oko na azo na ndö ti sese so? So yayu so akono ahon ndoni alingbi na konongo ti lo pepe si kota da so mbi sara ayeke kete mingi so!

¹⁹ Ataa so kue, KOTA GBIA, Nzapa ti mbi, dingi mê ti mo, mo ma sambela ti mbi na toto ti mbi, zo ti kua ti mo. Ma dekongo na sambela so mbi, zo ti kua ti mo, mbi yeke ya na mo.

²⁰ Zi le ti mo bi na lâ ti baa ndo na tere ti kota da so, ndo so mo tene, mo yeke duti daa. Ma sambela so mbi, zo ti kua ti mo, mbi yeke ya na mo na ndo so.

²¹ Ma vorongo tere ti mbi, zo ti kua ti mo na vorongo tere ti azo ti Israel, azo ti mo so ala luti na ndo so si ala yeke sambela mo. KOTA GBIA, mo so mo yeke na yayu kâ, ma sambela ti e, mo zi nga tënë na li ti e.

²² “Tongana mbeni zo asara sioni na mba ti lo si a hunda na lo ti deba yanga ti lo, tongana lo ga nduru na gbalaka ti mo ti deba yanga ti lo, na ya ti kota da so,

²³ mo so mo yeke na yayu kâ, ayeke nzoni mo ma zo ni; mo sara ye, mo fâ ngbanga ti azo ti kua ti mo titene zo so asara sioni, lo wara pika lo si sioni ti lo akiri na li ti lo wani; zo so asara sioni pepe, mo sara na lo alingbi na mbirimbiri ti lo.

²⁴ “Tongana awato ahon ndö ti azo ti Israel, azo ti mo, na bira, ngbanga ti so ala sara siokpari so ake mo, tongana ala kiri na mbage ti mo, ala sepela mo, ala sambela mo si ala voro tere ti ala na mo na ya ti kota da so,

²⁵ mo so mo yeke na yayu kâ, ma sambela ti ala, zi siokpari na li ti azo ti Israel, azo ti mo; mo kiri na ala na sese so mo mu ando na akotara ti ala nga na ala wani so.

²⁶ “Tongana le ti nduzu akanga si ngu-Nzapa apika pepe, ngbanga ti so azo ti Israel asara siokpari so ake mo, tongana ala baa ndo na mbage ti da so ti sambela mo, tongana ala sepela mo si ala zia lege ti siokpari ti ala, ngbanga ti so mo sara ngangu na ala,

²⁷ mo KOTA GBIA so mo yeke na yayu, ayeke nzoni mo ma ala si mo zi siokpari na li ti azo ti kua ti mo nga na li ti azo ti Israel, azo ti mo. Mo fa na ala nzoni lege titene ala tambula daa. Na pekoni, sara si ngu-Nzapa apika na ndö ti sese so mo mu na ala si aga ti ala so.

²⁸ “Tongana kota nzara ati na ya ti kodro, tongana sioni kobela ti bubango kodro asi, tongana akobe ti yaka ahole si abuba kue, tongana agbadola na angadi atuku na ya ti kodro, tongana awato angoro agbata ti azo ti mo, azo ti Israel ti mu na bira, wala mara ti sioni ye wa, wala mara ti kobela wa ati na ya ti kodro,

²⁹ tongana mbeni zo, wala azo ti Israel so kue ayeke azo ti mo, tongana zo oko oko ahinga sioni ti lo nga na pasi ti lo biani, tongana lo sambela mo, lo voro tere ti lo na mo si lo yoro maboko ti lo na mbage ti kota da so ti sambela mo,

³⁰ mo so mo yeke na yayu kâ, na ndo so mo yeke duti daa, ma sambela ti ala, zi siokpari na li ti ala; mo sara na zo oko oko alingbi na sarango ye ti lo, ngbanga ti so mo hinga tënë ti be ti lo. Biani, gi mo oko laa mo hinga tënë ti be ti azo.

³¹ Tongaso, fade azo ti Israel ayeke kpe mbeto ti mo si ala yeke sara ye so be ti mo aye na ngoi so kue ala yeke duti na fini na ndö ti sese so mo mu ando na akotara ti e.

³² “Tongana wande, lo so lo yeke na popo ti azo ti Israel pepe, azo ti mo, tongana lo ma tënë ti kota iri ti mo, tënë ti ngangu ti maboko ti mo, maboko ti mo so mo yoro, tongana lo londo na mbeni kodro yongoro, lo ga na mbage ti kota da so ti sambela mo,

³³ mo so mo yeke na yayu kâ, na ndo so mo yeke duti daa, ayeke nzoni mo ma sambela ti wande so si ye so kue lo hunda na mo, mo mu ni na lo. Tongaso, fade azo kue ti ndö ti sese so ayeke hinga mo, ala yeke kpe mbeto ti mo tongana ti so azo ti Israel, azo ti mo, ayeke kpe mbeto ti mo; azo ni ayeke hinga nga atene, da so mbi sara so, a di iri ti mo na ndö ni.

³⁴ “Tongana azo ti mo ague ti tiri bira na awato ti ala na ndo so mo ye ti tokua ala daa, tongana ala baa ndo na mbage ti gbata so ti sambela mo, so ti tene gbata so mo soro; tongana ala baa ndo na mbage ti kota da so mbi sara ndali ti mo,

³⁵ mo so mo yeke na yayu kâ, ma sambela ti ala na vorongo tere ti ala, mo gbu koko ti ala!

³⁶ “Tongana azo ti Israel asara siokpari so ake mo – ngbanga ti so mbeni zo so asara siokpari pepe ayeke daa pepe – tongana mo sara ngonzo na tere ti ala si mo zia ala na maboko ti awato ti ala titene awato ti ala ni agbu ala, ague na ala na mbeni kodro so ayeke yongoro, wala so ayeke nduru,

³⁷ tongana azo ti Israel agbu li ti ala na ya ti kodro so a gbu ala, a gue na ala daa, tongana ala kiri na mbage ti mo si ala voro tere ti ala na mo, atene: ‘E ke yanga ti mo awe, e sara siokpari awe, e sara sioni awe!’,

³⁸ tongana ala kiri na mbage ti mo na be ti ala kue, na yingo ti ala kue na ya ti kodro so a gbu ala si a gue na ala daa, tongana ala baa ndo na mbage ti kodro so mo mu ando na akotara ti ala, wala ala baa ndo na mbage ti gbata so mo soro nga na mbage ti da so mbi sara ndali ti mo, tongana ala sambela mo,

³⁹ mo so mo yeke na yayu kâ, na ndo so mo yeke duti daa, ma sambela ti ala na vorongo tere ti ala, mo gbu koko ti ala; siokpari so ala sara ti ke mo, mo zi tënë ni na li ti ala.

⁴⁰ “Fadeso Nzapa ti mbi, mo zi le ti mo, mo zi mê ti mo, mo ma sambela ti mbi so mbi yeke ya na mo na ndo so!

⁴¹ KOTA GBIA Nzapa, fadeso, londo mo ga na ndo ti duti ti mo, mo na sanduku ti mbuki so ngangu ti mo ayeke daa so! KOTA GBIA Nzapa, ayeke nzoni awayango-sandaga ti mo amu tënë ti songo zo na kuâ, ala yu ni tongana bongo; ayeke nzoni azo ti mo afa ngia ti ala ndali ti anzoni ye so mo sara.

⁴² KOTA GBIA Nzapa, zo so mo soro lo si mo zia lo gbia so, mo tumba lo pepe; dabe ti mo na gba ti anzoni ye so mo sara ando na David, zo ti kua ti mo.”