2 Mbai 3 - Mbeti ti Nzapa - Tënë so amu fini

Salomon asara kota da ti KOTA GBIA

¹ Salomon ato nda ti sara kota da ti *KOTA GBIA na Jérusalem, na ndö ti hoto ti Moria. Kâ laa KOTA GBIA afa tere ti lo lani na babâ ti lo David; kâ laa David aleke mbeni ndo ndali ni na ndö ti lakere ti Ornan, zo ti mara ti Yebus.

² Salomon ato nda ti sara kota da ni na use lango ti use nze na osio ngu ti lengo-gbia ti lo.

³ So ayeke yongo na konongo ti gere ti kota da so Salomon aye ti sara na Nzapa so laa: yongoro ni metere baleota, nduru ni metere baleoko.

⁴ Kubu so a yeke hon daa ti li na ya ti da ni ayo metere baleoko, alingbi na nduru ti kota da ni, yongo ni na nduzu ayeke metere baleomene. A zia lôro ti nzoni ni na tere ni na ya ti da ni kue.

⁵ A pika keke ti sipre na tere ti dere ti kota kubu ni kue, a zia lôro ti nzoni ni na tere ti keke ni, a leke alimo ti maboko ti mburu na aye so akpa azingiri na tere ti keke ni.

⁶ A leke ya ti kota da ni na apendere têne ti ngangu ngere; lôro so lo zia na ya ti da ni ayeke lôro so alondo na Parvaim.

⁷ A zia lôro na tere ti akeke ti li ti da ni, akeke ti yanga ti da ni, akeke ti gbe ti yanga ti da ni. Lo de alimo ti *asheruben na tere ti dere ti da ni.

⁸ Na pekoni, a leke nga mbeni kubu so a iri ni “ndo so ayeke nde si ayeke nzoni kue ahon atanga ni”. Yongo ti kubu ni ayeke metere baleoko, alingbi na nduru ti kota da ti Nzapa; nduru ti kubu ni ayeke nga metere baleoko. A mu kilo 20 000 ti lôro ti nzoni ni si a zia na ya ti kubu ni kue.

⁹ Nengo ti apondi ti lôro so a pika na da ni ayeke grame ngbangbo oku. Ataa akubu ti da-nduzu, a zia lôro na tere ni kue.

¹⁰ Na ya ti da so ayeke nde si ayeke nzoni kue ahon atanga ni, a leke asheruben use so a kporo wen si a leke na ni; a zia nga lôro na tere ti asheruben ni.

¹¹ *Akpangi ti asheruben ni kue ayo metere baleoko; mbeni kpangi ti kozo sheruben ni ayo metere use na ndambo si andu dere ti kubu ni; mbeni kpangi ni ayo metere use na ndambo si andu kpangi ti use sheruben ni.

¹² Mbeni kpangi ti use sheruben ni ayo metere use na ndambo si andu dere ti kubu ni; mbeni kpangi ni ayo metere use na ndambo si andu kpangi ti kozo sheruben ni.

¹³ Ya ti akpangi ti asheruben ni azi, ayo metere baleoko. Ala yeke luti na ndö ti gere ti ala si ala yeke baa ndo na mbage ti ya ti da ni.

¹⁴ A sara ridoo na *len, a zia na tere ni nzoroko so akpa le ti nduzu, nzoroko so abe bengo na nzoroko so abe si aza zango. A kpo nga limo ti asheruben na tere ti ridoo ni.

A sara angbongboro yongoro gere ti da nga na gbalaka na bengba wen

¹⁵ A sara angbongboro yongoro gere ti da use na dawa ti kota da ni: yongo ni na nduzu ayeke metere baleoko na mbarambara. Na ndö ti ngbongboro gere ti da ni oko oko, a leke ambeni pendere ye so akpa kpoto, ayo na nduzu metere use na ndambo.

¹⁶ A leke ambeni kete zingiri si a zia na li ti angbongboro yongoro gere ti da ni; a sara ambeni le ti keke so iri ni grenade ngbangbo oko si a zia na ya ti azingiri ni.

¹⁷ A zia angbongboro yongoro gere ti da ni na dawa ti kota da ti Nzapa: oko na mbage ti maboko ti koli, oko na mbage ti maboko ti wali. A di iri ti gere ni so ayeke na mbage ti maboko ti koli atene, Yakin; a di iri ti gere ni so ayeke na mbage ti maboko ti wali atene, Boaz.