2 Mbai 28 - Mbeti ti Nzapa - Tënë so amu fini

Lengo-gbia ti Ahaz ato nda ni

¹ Ahaz ayeke na ngu baleuse si lo ga gbia; lo le-gbia ngu baleoko na omene na Jérusalem. Lo sara ye so ayeke mbirimbiri pepe na le ti *KOTA GBIA; lo sara ye tongana ti kotara ti lo David pepe.

² Me lo mu peko ti sarango ye ti agbia ti Israel. Lo gue daa ti kporo wen ti leke ayanda ndali ti *Baal.

³ Lo wani, lo zö dukani na popo-hoto ti Molenge ti Hinom si lo gbi amolenge ti lo ti koli na wâ ti mu na *sandaga. Lo mu peko ti asioni sarango ye ti amara nde, asioni ye so zo alingbi ti baa na le ti lo fani use pepe. Ando KOTA GBIA atumba amara ni na ndö ti sese ni si lo mu na azo ti Israel.

⁴ Ahaz amu asandaga si lo zö dukani na ando so azo aleke na ndö ti ahoto ti voro anzapa nde daa, na ndö ti akete hoto nga na gbe ti akeke so akugbe ni ayeke gbani gbani.

⁵ Tongaso, KOTA GBIA, Nzapa ti lo azia lo na maboko ti gbia ti Sirii. Gbia ni aso benda na ndö ti Ahaz, lo gbu gba ti azo si lo gue na ala na Damas. KOTA GBIA azia nga Ahaz na maboko ti Peka, molenge ti Remalia, gbia ti Israel si lo fâ azo ti Ahaz gbani gbani.

⁶ Gi na ya ti lango oko, Peka afâ aturugu ti Juda 120 000, ala kue gi angangu turugu; ye ni asi, ngbanga ti so ala do KOTA GBIA, Nzapa ti akotara ti ala azia.

⁷ Zikri, mbeni kpengba turugu ti mara ti Efraim afâ Maaseya, molenge ti gbia ti Juda; lo fâ nga Azrikam, makonzi ti aye ti yangbo ti gbia; lo fâ nga Elkana, lo so lo yeke nduru nduru na tere ti gbia.

⁸ Aturugu ti Israel agbu na popo ti a-ita ti ala ti Juda azo saki ngbangbo use ti ga azo ti kanga: awali, amolenge-koli nga na amolenge-wali. Ala gbu gba ti aye na peko ti bira si ala gue na ni na Samarii.

⁹ Na Samarii, mbeni wayanga ti KOTA GBIA ayeke daa, iri ti lo Oded. Lo gue ti wara tere na aturugu ti Israel so alondo na Samarii ti kiri; lo tene na ala: “KOTA GBIA, Nzapa ti akotara ti ala asara ngonzo na tere ti azo ti Juda. Nilaa lo zia azo ti Juda ni na maboko ti ala si ala fâ azo ti Juda ni na sioni ngonzo so tënë ni ague ngbii asi na yayu.

¹⁰ Ti fadeso, ala ye ti mu azo ti Juda na azo ti Jérusalem ti ga angbaa ti ala ti koli na ti wali! Me ala, azo ti Israel, ala wani laa ayeke sara sioni na KOTA GBIA, Nzapa ti ala pepe?

¹¹ Ala ma mbi si! A-ita ti ala, azo ti Juda so ala gbu ala ti ga azo ti kanga so, ala zia lege na ala ti kiri na ndo ti ala. Biani, KOTA GBIA asara ngonzo mingi na tere ti ala, azo ti Israel.”

¹² Na popo ti amakonzi ti Efraim, ambeni ake tënë ti aturugu so alondo na bira si akiri. Azo ni ayeke so: Azaria, molenge ti Yohanan; Berekia, molenge ti Meshilemot; Yehizkia, molenge ti Shalum nga na Amasa, molenge ti Hadlai.

¹³ Amakonzi ni atene na ala: “Azo so ala gbu ala ti ga azo ti kanga so, ala ga na ala ge pepe, ngbanga ti so ala yeke sara titene e sara sioni na KOTA GBIA. Ala ye titene siokpari ti e na sioni ti e akiri ahon ndoni? Andaa e sara sioni mingi awe, nilaa KOTA GBIA asara ngonzo mingi na tere ti e, azo ti Israel so.”

¹⁴ Na le ti amakonzi nga na le ti bongbi ti azo kue, aturugu azi azo so lani ala gbu ala; aye so ala gbu na peko ti bira so, ala do azia.

¹⁵ Na pekoni, azo so a di iri ti ala ndali ti kua ni, ague ti de be ti azo ti kanga ni. Na popo ti aye so ala gbu na peko ti bira, ala mu abongo na aporo ti mu na azo so ayeke na ni pepe. Ala mu na ala kobe ti tengo ni nga na ye ti nyongo ni, ala kanga le ti ka ti azo so awara ka. Azo so kue alingbi ti tambula pepe, ala zia ala na ndö ti alele si ague na ala ngbii asi na Jéricho, gbata ti Amburu, na tere ti a-ita ti ala, azo ti Juda. Na pekoni, ala kiri na Samarii.

Ahaz ahunda titene azo ti Asirii amu na lo maboko

¹⁶ Na ngoi ni so, gbia Ahaz atokua azo ti hunda na gbia ti Asirii ti mu na lo maboko.

¹⁷ Azo ti Edom akiri aga atiri bira na azo ti Juda si ala gbu ambeni zo ni ti ga azo ti kanga.

¹⁸ Azo ti Filistii ali na ngangu na ya ti agbata ti *Kodro-ti-gbeni nga na ya ti agbata so ayeke na mbage ti Mbongo na sese ti Juda. Ala mu agbata ti Bet-Shemesh, ti Ayalon, ti Gederot, ti Soko nga na akodro so ayeke na tere ni. Ala mu gbata ti Timna na akodro so ayeke na tere ni; gbata ti Gimzo na akodro so ayeke na tere ni. Na pekoni, ala duti kâ.

¹⁹ *KOTA GBIA azia kamene na le ti azo ti Juda ndali ti Ahaz. Ahaz apusu azo ti kodro ti lo ti sara sioni mingi, lo wani, lo sara sioni mingi so ake KOTA GBIA.

²⁰ Teglat-Falasar, gbia ti Asirii aga ti mu maboko na Ahaz pepe, me lo ga ti tiri bira na lo, ti zia lo na ya ti kota kpale.

²¹ Andaa Ahaz amu fade amosoro so ayeke na ya ti kota da ti KOTA GBIA, na amosoro so ayeke na yangbo ti gbia nga na ti so ayeke na ya ti da ti akota zo ti kodro si lo tokua ni na gbia ti Asirii; me lo sara ye so gbaa.

²² Na ngoi so gbia Ahaz ayeke na ya ti kpale so, lo ngba ngbango ti sara sioni mingi so ake KOTA GBIA.

²³ Lo mu *asandaga na anzapa ti Damas so lani akinda lo so. Lo tene na be ti lo, lo tene: “So anzapa ti agbia ti Sirii ayeke mu maboko na ala so, ayeke nzoni mbi mu *sandaga na anzapa ni so si fade ala yeke mu na mbi maboko.” Me anzapa so asara si Ahaz na azo ti Israel ati.

²⁴ Tongaso, Ahaz abongbi akungba so kue ayeke na ya ti kota da ti Nzapa si lo fâ ya ni; lo kanga ayanga ti kota da ti KOTA GBIA si lo sara agbalaka na asangbi-lege kue ti Jérusalem.

²⁵ Na ya ti agbata oko oko kue ti Juda, lo leke ando na ndö ti ahoto titene lo zö dukani daa na anzapa nde. Na sarango ye tongaso, lo zia ngonzo mingi na be ti KOTA GBIA, Nzapa ti akotara ti lo.

²⁶ Tanga ti atënë na ndö ti Ahaz, aye so kue lo sara, na tongo ndani ngbii asi na ndani, a su tënë ni na ya ti “Mbeti ti agbia ti Juda na ti Israel”.

²⁷ Ahaz akui, lo hon na peko ti ababâ ti lo si a lu lo na Jérusalem; me a lu lo pepe na ndo so a yeke lu agbia ti Israel daa. Molenge ti lo Ezekias laa aga gbia na peko ti lo.