2 Mbai 23 - Mbeti ti Nzapa - Tënë so amu fini

A tuku mafuta na li ti Yoas ti ga gbia

¹ Na ngu mbarambara ni, wayango-sandaga Yoyada aye ti sara kpengba ye. Lo na amakonzi ti aturugu so ayeke na li ti aturugu ngbangbo oko asara *mbuki; amakonzi ti aturugu ni ayeke so: Azaria, molenge ti Yeroam; Ismael, molenge ti Yohanan; Azaria, molenge ti Obed; Maaseya, molenge ti Adaya na Elishafat, molenge ti Zikri.

² Ala tambula na sese ti Juda kue. Na ya ti agbata ni kue, ala bongbi azo ti mara ti Lévi na amakonzi ti asewa ti Israel. Na pekoni, ala kue akiri na Jérusalem.

³ Azo so kue abongbi na ya ti kota da ti Nzapa; ala na gbia Yoas asara mbuki. Yoyada atene na ala: “Baa Yoas, molenge ti gbia laa! Fade lo yeke le-gbia alingbi na tënë so *KOTA GBIA atene na ndö ti *ahale ti David.

⁴ Ye so fade ala yeke sara ayeke so: tongana awayango-sandaga na azo ti mara ti Lévi ayeke to nda ti sara kua na *lango ti wungo tere, kozo bongbi ti ala ayeke bata ayanga ti kota da ti Nzapa;

⁵ use bongbi ni ayeke bata da ti gbia si ota bongbi ni ayeke bata yanga ti gbagba so iri ni Ti-gere-ti-da. Fade azo kue ayeke duti na ya ti gbagba ti kota da ti Nzapa.

⁶ Zo oko alingbi ti li na ya ti kota da ti KOTA GBIA pepe, gi awayango-sandaga na azo ti mara ti Lévi so ayeke sara kua. Ala lingbi ti li, ngbanga ti so a zia ala nde ndali ti KOTA GBIA. Fade azo kue asara ye alingbi na ye so KOTA GBIA ake tënë ni.

⁷ Ti tanga ti azo ti mara ti Lévi, fade ala yeke ngoro tere ti gbia, zo oko oko na ye ti bira ti lo maboko ti lo si ndo so kue gbia aye ti gue daa, ala yeke na tere ti lo. Zo so aye ti li na ya ti kota da ti Nzapa, fade a yeke fâ lo.”

⁸ Azo ti mara ti Lévi na azo ti Juda kue asara ye alingbi gi na yanga so wayango-sandaga Yoyada amu. Makonzi oko oko abongbi azo ti lo, azo so ato nda ti kua ti ala na lango ti wungo tere nga na ala so ahunzi kua ti ala na lango ni so, ngbanga ti so Yoyada azia lege na bongbi oko ti gue ti wu tere ti lo pepe.

⁹ Wayango-sandaga Yoyada amu na amakonzi so ayeke na li ti aturugu ngbangbo oko alikongo, akota *vala na akete vala ti gbia David; aye ni so ayeke na ya ti kota da ti Nzapa.

¹⁰ Lo zia akoli kue, zo oko oko na ye ti bira ti lo na maboko ti lo; ala luti na dawa ti kota da ti Nzapa, alondo na mbage ti maboko ti koli ngbii asi na mbage ti maboko ti wali, nduru na tere ti gbalaka; ala luti ti ngoro gbia.

¹¹ Tongaso Yoyada na amolenge ti lo asigigi na Yoas. Ala zia kpoto ti gbia na li ti lo si ala mu na lo mbeti ti mbuki. Ala tuku mafuta na li ti lo titene ala zia lo gbia. Biaku tongaso, azo ato nda ti dekongo atene: “Gbia na nduzu!”

¹² So Atalii ama wuluwulu ti azo so ayeke mu loro si ayeke pika sako na li ti gbia, lo ga lo wara ala na ya ti kota da ti KOTA GBIA.

¹³ Lo baa ndo si lo baa gbia so ayeke luti na ndö ti mbeni ye so a leke na nduzu titene agbia aluti daa, na yanga ti kota da ti Nzapa. Amakonzi na azo ti hurungo tatalita ayeke nduru na tere ti gbia. Azo ti kodro kue ayeke na ngia si ambeni ayeke huru tatalita. Azo ti pikango mozoko ayeke pika aye ti mozoko ti ala; azo ti hengo bia amu agbakuru ti bia ti ala si ala yeke mu li ti abia ti sepelango Nzapa. Atalii asuru bongo na tere ti lo si lo dekongo, lo tene: “So kango zo laa! So kango zo laa!”

¹⁴ Wayango-sandaga Yoyada aye titene a fâ Atalii na ya ti kota da ti Nzapa pepe. Nilaa lo iri amakonzi so ayeke na li ti aturugu ngbangbo oko si lo tene na ala: “Ala mu lo na popo ti azo asigigi na lo. Tongana mbeni zo amu peko ti lo, fade a yeke fâ zo ni.”

¹⁵ A gbu Atalii si a gue na lo na yangbo ti gbia. So lo si na yanga ti gbagba so iri ni Ti-ambarata, ala fâ lo.

¹⁶ Yoyada asara mbuki na popo ti lo na azo kue nga na gbia titene ala ga azo ti KOTA GBIA.

¹⁷ Tongaso, azo ni kue ali na ya ti da ti nzapa *Baal, ala kungbi da ni na sese, ala buba agbalaka ni na ayanda ni. Ala fâ Matan, wayango-sandaga ti Baal na dawa ti agbalaka ni.

¹⁸ Na pekoni, Yoyada azia kua ti batango kota da ti KOTA GBIA na maboko ti awayango-sandaga so ayeke azo ti mara ti Lévi. David akangbi lani awayango-sandaga ni na ya ti abongbi nde nde na ya ti kota da ti KOTA GBIA titene ala ya na KOTA GBIA asandaga so a yeke gbi ni kue na wâ, alingbi na *Ndia ti Moïse. Lo mu yanga na ala ti sara kua ni na hengo bia na ngia.

¹⁹ Yoyada azia nga azo na yanga ti kota da ti KOTA GBIA titene ala bata ni, tongaso si mbeni zo so aga *sioni awe na lege ti aye nde nde ali na ya ti da ni pepe.

²⁰ Yoyada amu amakonzi so ayeke na li ti aturugu ngbangbo oko, akota zo ti kodro nga na azo ti kodro kue; lo mu nga gbia na ya ti kota da ti KOTA GBIA, ala hon na mbage ti yanga ni ti nduzu, ala si na yangbo ti gbia. Kâ, ala sara si Yoas aduti na ndö ti mbata ti gbia.

²¹ Azo ti kodro kue ayeke na ngia. Na peko ti so a fâ Atalii awe, gbata ni akiri aduti kpoo.