2 Mbai 20 - Mbeti ti Nzapa - Tënë so amu fini

Azo aga ti tiri bira na kodro-gbia ti Juda. Yosafat asambela

¹ Na pekoni, azo ti Moab, azo ti Amon na azo ti mara ti Meun aga ti tiri bira na Yosafat.

² Azo aga atene tënë ni na Yosafat, atene: “Gba ti aturugu ayeke ga ti tiri bira na mo. Ala londo kâ na mbage ti kota ngu ti Gba-ti-ingo, so ti tene na sese ti Edom. Fadeso ala si na Hasason-Tamar awe, so ti tene na En-Gedi.”

³ Mbeto agbu Yosafat si lo leke na be ti lo ti hunda *KOTA GBIA. Lo hunda na azo ti Juda kue titene ala ke kobe ti sambela.

⁴ Azo ti Juda alondo na ya ti agbata kue ti kodro ni, ala bongbi tere ti ala titene ala gi KOTA GBIA.

⁵ Yosafat aluti na ya ti bongbi ti azo ti Juda na ti azo ti Jérusalem, na ndo so abaa le na fini gbagba ti kota da ti KOTA GBIA.

⁶ Lo sambela, lo tene: “KOTA GBIA, Nzapa ti akotara ti e, mo laa mo yeke Nzapa na yayu, mo laa mo yeke na komandema na ndö ti akodro-gbia kue ti dunia! Mo yeke na ngangu, mo yeke na kota ngangu; zo oko alingbi ti luti na le ti mo pepe.

⁷ Mo laa mo yeke Nzapa ti e so mo tumba ando azo ti kodro so na dawa ti azo ti Israel, azo ti mo; mo mu kodro ni na *ahale ti Abraham so aye mo mingi; mo mu kodro ni na ala titene aga ti ala biani biani!

⁸ Ala sara kodro na ndo so si ala sara kota da na iri ti mo, ala tene:

⁹ ‘Tongana mbeni kpale asi na e, wala bira, wala sioni ngbanga, wala sioni kobela ti bubango kodro, wala kota nzara si e ga, e luti na dawa ti kota da so – so ti tene na dawa ti mo, ngbanga ti so iri ti mo ayeke na ndö ti da ni – na ya ti kota mawa ti e, tongana e dekongo na mo, fade mo yeke ma e si mo yeke soo e na kuâ.’

¹⁰ Fadeso azo ti Amon, ti Moab nga na azo so ayeke lango na sese ti ahoto ti Seir ayeke ga ti tiri bira na e. Na ngoi so akotara ti e asigigi ando na sese ti Ezipte, mo ke na ala titene ala hon na ya ti akodro ti amara so. Akotara ti e ahon na mbeni lege nde si ala fâ azo ni pepe ti hunzi ala.

¹¹ Me laso, ye so ala ye ti futa na e, ayeke ti ga ti tumba e na ndö ti sese so mo mu na e!

¹² Nzapa ti e, fade mo fâ ngbanga na li ti ala pepe? Na dawa ti gba ti aturugu so aga ti tiri bira na e so, e yeke na ngangu oko pepe, e hinga ye so e lingbi ti sara oko pepe. Me le ti e kue gi na ndö ti mo.”

¹³ Azo ti Juda kue aluti na dawa ti KOTA GBIA, ala na awali ti ala na amolenge ti ala.

KOTA GBIA asara si azo ti Juda aso benda

¹⁴ Na ya ti bongbi ti azo ni, yingo ti *KOTA GBIA aga na ndö ti Yaziel, mbeni zo ti mara ti Lévi; lo yeke molenge ti Zakarii, Zakarii ayeke molenge ti Benaya, Benaya ayeke molenge ti Yeiel, Yeiel ayeke molenge ti Matania, Matania ayeke mbeni *hale ti Asaf.

¹⁵ Yaziel atene: “Ala azo ti Juda kue, ala na azo ti Jérusalem kue na mo gbia Yosafat, ala ma tënë so nzoni. Tënë so KOTA GBIA atene na ala ayeke so: ‘Ala sara mbeto pepe, mbeto ti gba ti aturugu so asara ala pepe! Biani, bira ni ayeke ti ala pepe, me ti Nzapa.

¹⁶ Kekereke, ala zu ague na mbage ti awato ti ala. Awato ti ala ni amu lege so ayeke gue na ndö ti hoto ti Akongo si ala yeke ga. Ala yeke wara awato ni na yanga ti ngu so abaa le na benyama ti Yeruel.

¹⁷ Tiringo bira ni ayeke ti ala pepe. Ala, azo ti Juda na ti Jérusalem, ala gue kâ, ala luti kpoo, ala kue ayeke baa lege so KOTA GBIA ayeke soo ande ala na kuâ. Ala sara mbeto pepe, ala zia mbeni ye azia mbeto na be ti ala pepe. Kekereke, ala gue na mbage ti awato ni; fade KOTA GBIA ayeke na ala.’ ”

¹⁸ Yosafat akuku, akpo li ti lo na sese. Azo ti Jérusalem kue na azo ti Juda akuku nga na sese na dawa ti KOTA GBIA ti voro lo.

¹⁹ Na pekoni, azo ti mara ti Lévi, ala so ayeke ahale ti Kehat, na ahale ti Kore alondo ti gonda KOTA GBIA, Nzapa ti Israel na kota go mingi.

²⁰ Na kota ndaperere, azo kue alondo ti gue na benyama ti Tekoa. Na guengo ti ala, Yosafat aluti na nduzu si lo tene na ala: “Azo ti Jérusalem na azo ti Juda, ala ma mbi si! Ayeke nzoni ala zia be ti ala na ndö ti KOTA GBIA, Nzapa ti ala si fade ala yeke wara ngangu. Ala zia be ti ala na ndö ti azo ti tenengo peko ti yanga ti lo si fade ala yeke so benda.”

²¹ Na pekoni, Yosafat na azo ni ama tere si lo zia azo ti hengo bia ti mu li ti tambula ti aturugu; ala yu bongo so a zia nde ndali ti KOTA GBIA si ala yeke he bia ti sepela na lo, atene: “Ala sepela KOTA GBIA, ngbanga ti so nzoni be ti lo angba kpu na kpu!”

²² Na ndembe so ala to nda ti he bia si ala yeke sepela KOTA GBIA, lo bi wusuwusu na popo ti azo so aga ti tiri bira na azo ti Juda: azo ti Amon, ti Moab na azo so ayeke lango na sese ti ahoto ti Seir. Ala wani ayeke tiri na popo ti ala.

²³ Azo ti Amon na ti Moab alondo ti tiri na azo so ayeke lango na sese ti ahoto ti Seir. Ala fâ azo ti sese ni kue, ahunzi ala. Na pekoni, ala fâ tere na popo ti ala.

²⁴ So azo ti Juda asi na ndo so zo alingbi ti luti daa ti baa benyama nzoni, ala baa ndo na mbage ti gba ti awato ti ala, ala baa gi akuâ so ayeke lango na sese; mbeni zo oko asoo kuâ pepe!

²⁵ Yosafat na azo ti lo aga agbu aye ti awato ti ala. Ala wara gba ti anyama, amosoro, abongo nga na apendere ye. Aye so ala gbu na peko ti bira ni ayeke mingi, nilaa ala mu lango ota ti gbu na aye ni. Ala lingbi ti gue na ni kue pepe, ngbanga ti so aye ni ahon ndoni.

²⁶ Na lango osio ni, ala bongbi tere ti ala na popo-hoto ti Beraka titene ala mu singila na KOTA GBIA. Ndani laa azo angba ti iri ndo ni so Beraka ngbii asi laso.

²⁷ Azo ti Juda kue na azo ti Jérusalem alondo ti kiri na Jérusalem na ngia, ngbanga ti so KOTA GBIA azia kota ngia na be ti ala na lege so lo kinda awato ti ala. Yosafat ayeke na li ti tambula ni.

²⁸ Ala li na Jérusalem na pikango kundi na kete kundi, ala huru tatalita ngbii ala si na ni na ya ti kota da ti KOTA GBIA.

²⁹ So azo ti ambeni kodro-gbia nde ama a tene, KOTA GBIA akinda awato ti Israel, mbeto ti Nzapa asara ala mingi.

³⁰ Tongaso, kodro-gbia ti Yosafat aduti kpoo, ngbanga ti so Nzapa ti lo amu na lo siriri mbage na mbage kue.

Lengo-gbia ti Yosafat asi na ndani

³¹ Yosafat ayeke na ngu baleota na oku si lo ga gbia ti Juda. Lo le-gbia ngu baleuse na oku na Jérusalem. Iri ti mama ti lo ayeke Azuba, molenge ti Shili.

³² Yosafat amu peko ti sarango ye ti babâ ti lo Asa, lo zia lege ni pepe; lo sara ye so ayeke mbirimbiri na le ti *KOTA GBIA.

³³ Me ando so azo aleke na ndö ti ahoto si ala yeke voro anzapa nde daa, lo zi ni pepe. Nilaa azo azia be ti ala kue pepe na Nzapa ti akotara ti ala.

³⁴ Tanga ti atënë na ndö ti Yosafat, na tongo ndani ngbii asi na ndani, a su ni na ya ti “Mbeti ti atënë na ndö ti Yehu, molenge ti Hanani”; mbeti ni ayeke na ya ti mbeti ti agbia ti Israel.

³⁵ Na pekoni, Yosafat, gbia ti Juda asara songo na Ahazia, gbia ti Israel. Sarango ye ti Ahazia ni ayeke sioni mingi.

³⁶ Ala ma tere ti leke amangboko so alingbi ti gue na Tarsis. Ala leke amangboko ni na ndo ti lutingo ti amangboko na Esion-Geber.

³⁷ Me Eliezer, molenge ti Dodava, zo ti kodro ti Maresha, atene na Yosafat peko ti yanga ti KOTA GBIA, atene: “Ndali ti so mo sara songo na Ahazia, aye so mo leke so, fade KOTA GBIA ayeke buba ni.” Biani, amangboko ni alinda ngu si alingbi ti gue na Tarsis pepe.