2 Mbai 19 - Mbeti ti Nzapa - Tënë so amu fini

Yosafat azia awafango-ngbanga na sese ti Juda

¹ Yosafat, gbia ti Juda akiri na nzoni tere na da ti lo, na Jérusalem.

² Zo ti bango nda ti aye Yehu, molenge ti Hanani, aga awara gbia Yosafat na lege si atene na lo: “Mo mu maboko na sioni zo tongaso ngbanga ti nyen? Azo so be ti ala ake *KOTA GBIA so, mo ye ala ngbanga ti nyen? Ndali ti ye so mo sara so, KOTA GBIA ayeke sara ngonzo na tere ti mo.

³ Me mo sara ambeni nzoni ye: na ya ti kodro ti mo kue, akeke so azo aleke aluti na nduzu ndali ti nzapa-wali *Ashera, mo gbi ni; mo zia be ti mo kue ti gi Nzapa.”

⁴ Yosafat angba na Jérusalem. Na pekoni, lo to nda ti tambula na popo ti azo ti lo, ti londo na Bersheba ngbii asi na sese ti Efraim, ndo so ahoto ayeke daa. Lo sara si azo ni akiri na mbage ti KOTA GBIA, Nzapa ti akotara ti ala.

⁵ Lo zia awafango-ngbanga na ya ti kodro ni kue, na ya ti agbata oko oko kue ti Juda so a sara ngangu gbagba na tere ni.

⁶ Lo tene na ala: “Ala sara hange na kua so ala yeke sara ande. Ngbanga so ala yeke fâ, ala fâ ni ndali ti zo pepe, me ndali ti KOTA GBIA. Na ngoi ti fango ngbanga ni, KOTA GBIA ayeke na ala.

⁷ Fadeso, ala kpe mbeto ti KOTA GBIA; ala sara hange na ye so kue ala yeke sara, ngbanga ti so KOTA GBIA, Nzapa ti e aye ye ti kirikiri pepe, lo yeke mu mbage ti mbeni zo pepe, lo ye tënë ti petengo goro pepe.”

⁸ Na Jérusalem nga, Yosafat azia ambeni zo ti mara ti Lévi, ambeni wayango-sandaga nga na amakonzi ti asewa ti Israel titene ala fâ ngbanga ti azo na iri ti KOTA GBIA si ala leke nga atënë so ayeke na popo ti azo ti gbata ni.

⁹ Lo mu yanga na ala, lo tene: “Fade ala yeke sara kua ni na kpengo mbeto ti KOTA GBIA, lakue na legeni nga na be ti ala kue.

¹⁰ Tongana a-ita ti ala so ayeke lango na ya ti agbata nde nde aga na mbeni tënë na gbe ti ala titene ala fâ ngbanga ni, ataa ayeke tënë ti fango zo, wala tënë ti sarango ye so ake ndia, wala tënë ti ye so ake mbela ti Nzapa, wala ye so ake kpengba tënë ti Nzapa, wala ye so ake lege ti sarango ye ti azo, ayeke nzoni ala fa nda ni na a-ita ti ala, tongaso si a-ita ti ala ni asara sioni ti ke KOTA GBIA pepe si ngonzo ti KOTA GBIA ati na ndö ti ala nga na ndö ti a-ita ti ala ni pepe. Tongana ala sara tongaso, fade mbeni tënë oko ayeke na li ti ala pepe.

¹¹ Fade kota wayango-sandaga Amaria ayeke duti na li ti ala ndali ti akua kue ti KOTA GBIA. Makonzi ti azo ti mara ti Juda, Zebadia, molenge ti Ismael, lo laa lo yeke duti na li ti ala ndali ti akua kue ti gbia. Azo ti mara ti Lévi laa ayeke duti na tere ti ala ti su aye kue na mbeti. Ala gbu ngangu, ala sara kua! Ayeke nzoni KOTA GBIA aduti na zo so ayeke sara nzoni ye.”