2 Mbai 18 - Mbeti ti Nzapa - Tënë so amu fini

Yosafat asara songo na Akab, gbia ti Israel

¹ Yosafat awara mosoro mingi si azo agonda lo mingi. Lo ga songo na Akab, gbia ti Israel na lege ti wali so lo mu na ya ti sewa ni.

² Na peko ti ambeni ngu, Yosafat ague na Samarii ti baa Akab. Akab aya gba ti ataba na abagara na *sandaga ndali ti gango ti Yosafat na azo so ayeke na tere ti lo. Na pekoni, Akab ahunda na Yosafat titene lo na lo ague ti tiri bira na gbata ti Ramot, na sese ti Galaad.

³ Akab, gbia ti Israel ahunda Yosafat, gbia ti Juda, atene: “Mo ye titene mbi na mo, e gue, e mu Ramot, na sese ti Galaad?” Yosafat akiri tënë na lo, atene: “Mbi na mo, e yeke gi oko, aturugu ti mo na aturugu ti mbi ayeke gi oko. Fade e yeke gue ti tiri bira ni senge.”

Awayanga-nzapa ti Akab atene tënë ti songo benda

⁴ Na pekoni, Yosafat atene na gbia ti Israel: “Ayeke nzoni mo hunda *KOTA GBIA kozoni si!”

⁵ Tongaso gbia ti Israel abongbi awayanga-nzapa ngbangbo osio si lo hunda ala, lo tene: “Alingbi e gue, e tiri bira na gbata ti Ramot, na sese ti Galaad wala mbi zia lege ni?” Ala kiri tënë na lo, atene: “Mo lingbi ti gue senge! Fade Nzapa ayeke zia gbata ni na maboko ti mo, gbia.”

⁶ Me Yosafat ahunda ndo, atene: “Mbeni zo oko ti tenengo peko ti yanga ti KOTA GBIA ayeke ge pepe titene e hunda KOTA GBIA na lege ti lo?”

⁷ Gbia ti Israel akiri tënë na Yosafat, atene: “Mbeni zo oko ayeke daa so e lingbi ti hunda KOTA GBIA na lege ti lo; zo ni ayeke Mishe, molenge ti Imla. Me be ti mbi ake lo mingi, ngbanga ti so lo yeke tene na mbi peko ti tënë ti yanga ti Nzapa nzoni laoko pepe, me lakue gi sioni tënë.” Yosafat atene: “Ayeke nzoni gbia atene tënë tongaso pepe!”

⁸ Tongaso gbia ti Israel airi mbeni kota zo ti yangbo ti lo si atene na lo: “Gue hio, mo ga na Mishe, molenge ti Imla.”

⁹ Gbia ti Israel na Yosafat, gbia ti Juda, ayu bongo ti ala ti gbia si zo oko oko aduti na ndö ti mbata ti lo; ala duti na kota le ti kodro so ayeke nduru na yanga ti gbata ti Samarii. Awayanga-nzapa kue ayeke sara kua ti ala na dawa ti ala.

¹⁰ Na popo ti awayanga-nzapa ni, Sidekia, molenge ti Kenaana ayeke daa; lo mu wen, lo leke na adidi si lo tene: “Tënë so KOTA GBIA atene ayeke so: ‘Na adidi so, fade mo yeke fâ azo ti Sirii ngbii mo hunzi ala kue.’ ”

¹¹ Awayanga-nzapa kue atene gi oko tënë so; ala tene: “Mo gue, mo tiri bira na Ramot, na sese ti Galaad; fade mo yeke so benda! Fade KOTA GBIA ayeke zia gbata ni na maboko ti mo.”

Wayanga-Nzapa Mishe atene tënë ti tingo ti azo ti Israel

¹² Watokua so ague ti iri Mishe so atene na lo: “Baa, awayanga-nzapa kue, tënë ti yanga ti ala ague gi oko: ala tene nzoni tënë na gbia. Mo nga, mo sara si tënë ti mo ague oko na ti ala: mo tene nzoni tënë na lo!”

¹³ Mishe akiri tënë, atene: “*KOTA GBIA ayeke na fini! Tënë so Nzapa ti mbi ayeke tene, gi ni laa mbi yeke tene ande!”

¹⁴ Mishe aga na dawa ti gbia si gbia ahunda lo, atene: “Mishe, alingbi e gue, e tiri bira na gbata ti Ramot, na sese ti Galaad wala mbi zia lege ni?” Mishe akiri tënë na lo, atene: “Ala gue senge! Fade ala yeke so benda! Fade a yeke zia ala na maboko ti ala.”

¹⁵ Me gbia atene na lo: “Fani oke laa mbi lingbi ti hunda na mo titene mo deba yanga ti mo ti tene na mbi gi taa-tënë na iri ti KOTA GBIA?”

¹⁶ Tongaso Mishe atene: “Mbi baa azo ti Israel kue akangbi kirikiri na ndö ti ahoto, tongana ataba so zo ti batango ala ayeke daa pepe.” KOTA GBIA atene: “Makonzi ti azo so ayeke daa oko pepe. Ayeke nzoni zo oko oko akiri na ndo ti lo na siriri.”

¹⁷ Gbia ti Israel atene na Yosafat: “Mbi tene fade na mo pepe? Lo yeke tene na mbi peko ti tënë ti yanga ti Nzapa nzoni pepe; me lo yeke tene gi sioni tënë.”

¹⁸ Mishe akiri atene: “Ala ma tënë so KOTA GBIA atene! Mbi baa KOTA GBIA aduti na ndö ti mbata ti lo ti gbia; ala so kue ayeke na yayu aluti, ambeni na mbage ti maboko ti lo ti koli, ambeni na mbage ti maboko ti lo ti wali.

¹⁹ KOTA GBIA ahunda ndo, atene: ‘Zo wa laa ayeke handa ande Akab, gbia ti Israel titene lo gue, lo tiri bira na gbata ti Ramot, na sese ti Galaad si azo afâ lo kâ, zo wa?’ Mbeni zo atene ti lo ge nde, mbeni atene ti lo kâ nde.

²⁰ Tongaso, mbeni yingo aga, aluti na dawa ti KOTA GBIA si atene: ‘Mbi laa mbi yeke handa ande lo.’ KOTA GBIA atene na lo: ‘Mo yeke sara tongana nyen?’

²¹ Yingo ni akiri tënë, atene: ‘Fade mbi yeke gue si mbi yeke ga yingo ti mvene na yanga ti awayanga-nzapa kue ti gbia.’ KOTA GBIA atene na lo: ‘So nzoni lege ti handango lo laa; gue, mo sara gi tongaso.’ ”

²² Mishe akiri atene: “Fadeso, ye ni asi awe. KOTA GBIA azia yingo ti mvene na yanga ti awayanga-nzapa ti mo kue, so ti fa atene, lo wani, lo leke na be ti lo ti tokua mbeni kpale na ndö ti mo.”

²³ Tongaso Sidekia, molenge ti Kenaana aga nduru na tere ti Mishe, lo pika ngbangba ti Mishe si lo tene: “Yingo ti KOTA GBIA asigigi na ya ti mbi na lege wa ti gue ti tene tënë na mo so?”

²⁴ Mishe akiri tënë, atene: “Biani, fade mo yeke baa ni na lango so mo yeke londo na ya ti mbeni kubu ti hon na ya ti mbeni kubu nde titene mo honde tere ti mo.”

²⁵ Gbia ti Israel amu yanga na azo ti kua ti lo, atene: “Ala gbu Mishe, ala gue na lo na Amon, makonzi ti gbata ni nga na Yoash, molenge ti gbia.

²⁶ Ala tene na amakonzi ni, atene: Tënë so gbia atene ayeke so: ‘Ala bi ye so na da ti kanga! Ala mu na lo gi kete fuku ti mapa na kete kete ngu ngbii asi na lango so mbi yeke kiri na kodro na nzoni tere si.’ ”

²⁷ Mishe akiri tënë na lo, atene: “Tongana mo kiri na nzoni tere biani, andaa KOTA GBIA atene tënë na lege ti mbi pepe.” Lo kiri lo tene: “Ala amara kue, ala ma!”

A fâ gbia Akab na ya ti bira

²⁸ Gbia ti Israel na Yosafat, gbia ti Juda ague ti tiri bira na gbata ti Ramot, na sese ti Galaad.

²⁹ Gbia ti Israel atene na Yosafat: “Mbi yeke yu mbeni bongo nde titene azo ahinga mbi pepe si mbi gue na bira ni. Ti mo, mo yu bongo ti mo ti gbia.” Tongaso gbia ti Israel ayu mbeni bongo nde titene azo ahinga lo pepe si ala use kue ague na bira ni.

³⁰ Andaa gbia ti Sirii amu yanga na amakonzi ti azo ti kpengo na apusu ti mbarata ti lo, atene: “Ala ti na ndö ti asenge turugu wala na ndö ti aturugu ti kota kamba pepe; me ala ti gi na ndö ti gbia ti Israel.”

³¹ So amakonzi ti azo ti kpengo na apusu ti mbarata abaa Yosafat, ala tene: “So gbia ti Israel laa.” Nilaa ala ngoro lo titene ala ti na ndö ti lo. Me Yosafat adekongo. Tongaso *KOTA GBIA amu maboko na lo si Nzapa atumba awato ti lo na tere ti lo.

³² So amakonzi ti azo ti kpengo na pusu ti mbarata abaa atene, so gbia ti Israel laa pepe, ala zia ti tumba peko ti lo.

³³ Me mbeni turugu ti Sirii apika le ti kokora ti lo kirikiri tongaso, le ti kokora ni ague, akpo gbia ti Israel na ndo so awen ti kazaka ti lo ti bira atengbi tere daa. Gbia atene na zo ti kpengo na pusu ti mbarata ti lo, atene: “Mo turne li ti pusu ti mbarata ni na peko, mo sigigi na mbi na ya ti bira ni, ngbanga ti so mbi wara ka awe.”

³⁴ Na lango ni so bira aza wâ ngangu; nilaa mbeni zo agbu gbia titene lo ngba ti luti na nduzu na ya ti pusu ti mbarata ti lo ngbii asi na lakui na dawa ti aturugu ti Sirii. Asi na lakui, lo kui.