2 Mbai 14 - Mbeti ti Nzapa - Tënë so amu fini

¹ Asa asara ye so ayeke nzoni na ye so ayeke mbirimbiri na le ti *KOTA GBIA, Nzapa ti lo.

² Lo zi agbalaka ti anzapa ti awande nga na ando so azo aleke na ndö ti ahoto si ala yeke voro anzapa nde daa; lo kungbi na sese angbongboro têne so azo aleke si aluti na nduzu, lo fâ ya ti akeke so ala leke si aluti na nduzu ndali ti nzapa-wali *Ashera.

³ Lo mu yanga na azo ti Juda ti gi KOTA GBIA, Nzapa ti akotara ti ala, ti sara ye alingbi na ndia ti lo nga na atënë ti ndia ti lo.

⁴ Lo zi ando so azo aleke na ndö ti ahoto si ala yeke voro anzapa nde daa na ya ti gbata kue ti Juda, lo zi nga agbalaka so azo ayeke zö dukani na ndö ni. Nilaa na ngoi ti lengo-gbia ti lo, kodro aduti kpoo.

⁵ Kodro ni aduti kpoo si azo aga ti tiri bira na lo na ya ti angu ni so pepe, ngbanga ti so KOTA GBIA wani amu na lo siriri. Tongaso lo wara lege ti sara angangu gbagba na tere ti agbata ti Juda.

⁶ Lo tene na azo ti Juda: “E sara angangu gbagba na tere ti agbata so, e sara agbagba na tere ni, e sara akota da so ayo na nduzu, e zia angbongboro wen na yanga ni ti kanga na ni; e sara ni na ndembe so kodro ni ade ti e so. Biani, e gi KOTA GBIA, Nzapa ti e; nilaa lo sara si e duti kpoo mbage na mbage kue so.” Tongaso ala sara agbata si aye ti ala aga nzoni.

⁷ Asa ayeke na aturugu 300 000 so ala yeke azo ti mara ti Juda; ala laa ayeke yo kota *vala nga na likongo. Lo yeke nga na aturugu 280 000 so ayeke azo ti mara ti Benjamin; ala laa ayeke yo kete vala si ala yeke pika akokora. Ala kue ayeke angangu zo ti bira.

⁸ Zera, zo ti Etiopii, aga na aturugu kutu oko nga na apusu ti bira 300 ti tiri bira na ala. Zera ague ngbii asi na Maresha.

⁹ Asa ague ti wara lo si lo na aturugu ti lo aleke tere ti ala ti tiri bira na popo-hoto ti Sefata, nduru na Maresha.

¹⁰ Asa adekongo na KOTA GBIA, Nzapa ti lo, lo tene: “KOTA GBIA, mo lingbi ti mu maboko na zo so ayeke na ngangu pepe nga na zo so ayeke na ngangu. KOTA GBIA, Nzapa ti e, ga, mo mu maboko na e maa! Biani, e luti na ndö ti mo. Na iri ti mo laa e ga ti tiri bira na gba ti aturugu so. KOTA GBIA, Nzapa ti e, sara si mbeni zo ahon ndö ti mo pepe.”

¹¹ KOTA GBIA akinda azo ti Etiopii na dawa ti Asa nga na dawa ti aturugu ti Juda; aturugu ti Etiopii akpe.

¹² Asa na aturugu ti lo atumba peko ti ala ngbii asi na Gerar. Aturugu ti Etiopii akui gbani gbani, mbeni zo oko ti ala angba na fini pepe, ngbanga ti so KOTA GBIA na aturugu ti lo anika ala. Azo ti Juda agbu gba ti aye na peko ti bira ague na ni.

¹³ Azo ti Juda amu na lege ti bira agbata so kue ayeke na tere ti Gerar, ngbanga ti so mbeto ti KOTA GBIA asara azo ti agbata ni. Azo ti Juda agbu aye ti ya ti agbata ni, ngbanga ti so mosoro mingi ayeke kâ.

¹⁴ Ala li nga na bira na ndo ti lango ti azo ti batango anyama si ala gbu ataba na angasa gbani gbani nga na *azambala. Na pekoni, ala kiri na Jérusalem.