2 Mbai 13 - Mbeti ti Nzapa - Tënë so amu fini

Lengo-gbia ti Abia

¹ Na ngu baleoko na miombe ni so Yeroboam ayeke gbia ti Israel, Abia aga gbia ti Juda.

² Lo le-gbia ngu ota na Jérusalem. Iri ti mama ti lo ayeke Mikaya, molenge ti Uriel, zo ti gbata ti Gibea. Bira ayeke na popo ti Abia na Yeroboam.

³ Abia amu akpengba turugu 400 000 titene lo tiri bira na Yeroboam. Yeroboam aleke akpengba turugu 800 000 so ala hinga ti tiri bira nzoni titene lo tiri bira na Abia.

⁴ Abia aluti na ndö ti hoto ti Semaraim, na sese ti Efraim, ndo so ahoto ayeke daa; lo dekongo, lo tene: “Yeroboam na azo ti Israel kue, ala ma mbi si!

⁵ Ala hinga pepe atene, *KOTA GBIA, Nzapa ti Israel amu ando David na *ahale ti lo titene ala le-gbia na ndö ti Israel kpu na kpu? *Mbuki so KOTA GBIA asara na ala ayeke mbuki ti ingo!

⁶ Me Yeroboam, molenge ti Nebat, zo ti kua ti Salomon, molenge ti David alondo si lo tomboka na tere ti wa ti lo.

⁷ Agodobe na azo ti kirikiri abongbi na tere ti Yeroboam si ala hon ndö ti Roboam, molenge ti Salomon. Roboam angba lani maseka si lo de ti kpengba pepe, nilaa lo lingbi ti gbu le ni na ala pepe.

⁸ Fadeso, ala ye ti londo ti ke kodro-gbia so KOTA GBIA amu na *ahale ti David. Yeroboam, mo na azo ti mo, ala yeke gbani gbani si na popo ti ala, ala yeke na abagara ti lôro so Yeroboam asara titene aga anzapa ti ala.

⁹ Ala tumba taa awayango-sandaga ti KOTA GBIA, ahale ti Aaron nga na azo ti mara ti Lévi si ala soro awayango-sandaga ti ala wani tongana ti so azo ti ambeni kodro asara! Zo so aga na koli-bagara oko na akoli-taba mbarambara, ala yeke soro lo tongana wayango-sandaga titene lo sara kua na anzapa so ayeke taa Nzapa pepe.

¹⁰ Ti e, KOTA GBIA laa ayeke Nzapa ti e; e zia lo pepe. Awayango-sandaga so ayeke sara kua na KOTA GBIA ayeke ahale ti Aaron si azo ti mara ti Lévi ayeke sara kua ti ala.

¹¹ Lakue na ndaperere nga na lakui, ala yeke ya na KOTA GBIA *asandaga so a yeke gbi ni kue na wâ, ala yeke zö na lo dukani so fion ni anzere na lo, ala yeke zia mapa so a mu na Nzapa na ndö ti meza so ayeke *nzoni si lakue na lakui, ala yeke za wâ na ya ti alamba so ayeke na ndö ti gere so a sara na lôro. Ti e, e yeke sara kua na KOTA GBIA, Nzapa ti e. Me ti ala, ala zia lo awe.

¹² Fadeso, Nzapa wani ayeke makonzi ti e; awayango-sandaga ti lo ayeke na e, ala yeke na li ti e, ala yeke na atatalita ti huru ni si e yeke dekongo ti bira na li ti ala, azo ti Israel. Ala tiri bira na KOTA GBIA, Nzapa ti akotara ti ala pepe, ngbanga ti so ala lingbi ti so benda pepe.”

¹³ Na ngoi ni so, Yeroboam atokua ambeni turugu ti luti na hondengo ni na mbage ti peko ti azo ti Juda; azo ti Israel ayeke na dawa ti ala si ambeni turugu ti Yeroboam aluti na hondengo ni na mbage ti peko ti azo ti Juda ni.

¹⁴ Azo ti Juda abaa ndo na peko, ala baa so, fade ala yeke tiri bira na aturugu so ambeni ayeke na dawa ti ala si ambeni ayeke na peko ti ala. Azo ti Juda adekongo na KOTA GBIA si awayango-sandaga ahuru tatalita.

¹⁵ Aturugu ti Juda adekongo ti bira. Gi na ndembe so ala dekongo, Nzapa akinda Yeroboam na azo ti Israel kue na dawa ti Abia nga na azo ti Juda.

¹⁶ Azo ti Israel akpe na dawa ti azo ti Juda si Nzapa azia azo ti Israel na maboko ti azo ti Juda ni.

¹⁷ Abia na aturugu ti lo afâ azo ti Israel gbani gbani: akpengba turugu ti Israel 500 000 akui.

¹⁸ Na lango ni so, azo ti Israel aga taa buba si azo ti Juda aso benda, ngbanga ti so ala luti na ndö ti KOTA GBIA, Nzapa ti akotara ti ala.

¹⁹ Abia atumba peko ti Yeroboam; lo mu agbata tongana: Betel, Yeshana na Efron nga na ambeni kodro so ayeke na tere ni.

²⁰ Na ngoi so Abia ayeke gbia, Yeroboam akiri awara ngangu oko pepe. Na ndani, KOTA GBIA apika lo si lo kui.

²¹ Me Abia awara ti lo ngangu mingi. Lo mu awali baleoko na osio si lo du amolenge-koli baleuse na use nga na amolenge-wali baleoko na omene.

²² Tanga ti atënë na ndö ti Abia, aye so lo sara na atënë so lo tene, a su tënë ni kue na ya ti “Mbeti ti dango be ti wayanga-Nzapa Ido”.

²³ Abia akui, lo hon na peko ti ababâ ti lo; a lu lo na Gbata ti David. Molenge ti lo Asa aga gbia na peko ti lo. Na ngoi so Asa ayeke le-gbia, kodro aduti kpoo na ya ti ngu baleoko.