2 Mbai 12 - Mbeti ti Nzapa - Tënë so amu fini

Shishak, gbia ti Ezipte ali na bira na kodro ti Juda

¹ So Roboam asara si lengo-gbia ti lo akpengba si lo ga ngangu awe, lo do *Ndia ti *KOTA GBIA, lo zia; azo ti Israel kue asara nga tongana lo.

² Na ngu oku ni so Roboam ayeke gbia, Shishak, gbia ti Ezipte aga ti tiri bira na Jérusalem, ngbanga ti so azo ti Israel asara ye so ayeke sioni mingi ti ke KOTA GBIA.

³ Shishak aga na apusu ti bira 1 200 na azo ti kpengo na mbarata 60 000; gba ti aturugu so alondo na Ezipte amu peko ti lo, ala ti kodro ti Libii, ala ti Suki na ala ti Etiopii.

⁴ Lo mu agbata so a sara ngangu gbagba na tere ni si ayeke na sese ti Juda; lo gue ngbii lo si na Jérusalem.

⁵ Wayanga-Nzapa Shemaya aga abaa Roboam nga na amakonzi ti Juda so abongbi na Jérusalem na ndembe so Shishak aga nduru ti si. Lo tene na ala: “Tënë so KOTA GBIA atene ayeke so: ‘Ala ke mbi awe! Mbi nga, mbi ke ala si mbi zia ala na maboko ti Shishak.’ ”

⁶ Amakonzi ti azo ti Israel na gbia asara tere ti ala kete si ala tene: “KOTA GBIA ayeke mbirimbiri!”

⁷ So KOTA GBIA abaa atene, ala sara tere ti ala kete, tënë ti KOTA GBIA asi na Shemaya, atene: “Ndali ti so ala sara tere ti ala kete, fade mbi yeke fâ ala ti hunzi ala pepe; me fafadeso, mbi yeke sara titene ala soo kuâ. Ngonzo ti mbi ayeke tuku pepe na ndö ti Jérusalem na lege ti Shishak.

⁸ Me fade azo ni ayeke duti na gbe ti Shishak si ala yeke hinga popo ti sarango kua na mbi na sarango kua na agbia ti sese.”

⁹ Shishak, gbia ti Ezipte aga atiri bira na Jérusalem. Lo mu amosoro so a bata na ya ti kubu ti da ti *KOTA GBIA nga na amosoro so ayeke na ya ti yangbo ti gbia, lo hon na ni; lo mu aye kue kue kue, ataa *avala ti lôro so Salomon amu yanga si a sara ni ando so.

¹⁰ Gbia Roboam asara avala na bengba wen, lo mu ni na amakonzi ti aturugu so ayeke bata yanga ti yangbo ti gbia.

¹¹ Lakue tongana gbia ayeke gue na ya ti kota da ti KOTA GBIA, aturugu ti batango gbia ayeke ga si ayeke yo avala ni; na pekoni, ala yeke kiri na ni na da ti aturugu ti batango gbia.

¹² Ndali ti so Roboam asara tere ti lo kete, KOTA GBIA azia ti sara ngonzo na tere ti lo si a fâ azo ni kue kue kue pepe. Na ndö ni kue, ambeni nzoni ye ayeke na sese ti Juda.

Lengo-gbia ti Roboam asi na ndani

¹³ Gbia Roboam asara si lengo-gbia ti lo akpengba na Jérusalem. Lo yeke na ngu baleosio na oko si lo ga gbia; lo le-gbia ngu baleoko na mbarambara na Jérusalem, gbata so *KOTA GBIA asoro na popo ti amara kue ti Israel titene iri ti lo aduti na ndö ni. Iri ti mama ti lo ayeke Naama, zo ti mara ti Amon.

¹⁴ Roboam asara sioni, ngbanga ti so lo mu be ti lo kue pepe ti gi KOTA GBIA.

¹⁵ Aye so Roboam asara, na tongo ndani ngbii asi na ndani, a su tënë ni na molongo ni, na molongo ni na ya ti “Mbeti ti aye so wayanga-Nzapa Shemaya na Ido, zo ti bango nda ti aye asara”. Bira angba lakue na popo ti Roboam na Yeroboam.

¹⁶ Roboam akui, lo hon na peko ti ababâ ti lo; a lu lo na Gbata ti David. Molenge ti lo Abia aga gbia na peko ti lo.