2 Mbai 11 - Mbeti ti Nzapa - Tënë so amu fini

¹ Gi so Roboam asi na Jérusalem awe, lo bongbi anganga turugu saki ngbangbo oko na balemiombe ti Juda na ti Benjamin titene ala gue, atiri bira na azo ti Israel ti Banga, tongaso si kodro ni akiri na gbe ti komandema ti lo.

² Me tënë ti *KOTA GBIA asi na wayanga-Nzapa Shemaya, atene:

³ “Tene na Roboam, molenge ti Salomon, gbia ti Juda nga na azo ti Israel so kue ayeke na sese ti Juda, na ala so ayeke na sese ti Benjamin, mo tene:

⁴ Tënë so KOTA GBIA atene ayeke so: ‘Ala gue, atiri bira na a-ita ti ala pepe! Ayeke nzoni zo oko oko akiri na ndo ti lo. Biani, mbi laa mbi yeda si ye so asi.’ ” Azo ni ama yanga ti KOTA GBIA, ala kiri na ndo ti ala si ala zia ti gue ti tiri bira na Yeroboam.

Roboam asara angangu gbagba na tere ti agbata nde nde

⁵ Roboam aduti na Jérusalem si lo sara angangu gbagba na tere ti agbata so ayeke na Juda:

⁶ Betlehem, Etam, Tekoa,

⁷ Bet-Sur, Soko, Adulam,

⁸ Gat, Maresha, Zif,

⁹ Adoraim, Lakish, Azeka,

¹⁰ Sora, Ayalon na Hebron. Agbata so a sara ngangu gbagba na tere ni so ayeke na sese ti Juda na ti Benjamin.

¹¹ Roboam aleke angangu gbagba ti tere ti agbata ni; lo zia agovoronere na ndö ni si lo bata kobe, mafuta nga na vin na ya ni.

¹² Na ya ti agbata oko oko so kue, *avala na alikongo ayeke daa. Ndali ti so lo sara si agbata so aga angangu gbata, sese ti Juda na ti Benjamin angba na gbe ti komandema ti lo.

Awayango-sandaga na azo ti mara ti Lévi akiri na peko ti Roboam

¹³ Awayango-sandaga na azo ti mara ti Lévi so ayeke na sese ti Israel kue akiri na peko ti Roboam.

¹⁴ Azo ti mara ti Lévi azia sese ti ala so ayeke na tere ti agbata ni nga na ambeni ye ti ala, ala gue na Juda nga na Jérusalem, ngbanga ti so Yeroboam na amolenge ti lo akanga lege na ala ti sara kua ti ala ti wayango-sandaga na *KOTA GBIA.

¹⁵ Yeroboam wani asoro awayango-sandaga ti lo titene ala sara kua na ando so azo aleke na ndö ti ahoto ti voro anzapa daa, anzapa so akpa akoli-ngasa wala akete bagara.

¹⁶ Azo ti amara kue ti Israel, ala so azia be ti ala ti gi *KOTA GBIA, Nzapa ti Israel, ala mu peko ti azo ti mara ti Lévi ti gue na Jérusalem titene ala mu *asandaga na KOTA GBIA, Nzapa ti akotara ti ala.

¹⁷ Tongaso ala sara si kodro-gbia ti Juda awara ngangu; na ya ti ngu ota, ala sara si komandema ti Roboam, molenge ti Salomon akpengba, ngbanga ti so na ya ti ngu ota ni, azo ti Israel asara ye tongana ti so ala sara na ngoi ti David na ti Salomon.

Azo ti sewa ti Roboam

¹⁸ Roboam amu Mahalat ti ga wali ti lo. Mahalat ayeke molenge ti Yerimot; Yerimot ayeke molenge ti David; mama ti Mahalat ayeke Abihail, molenge ti Eliab; Eliab ayeke molenge ti Yese.

¹⁹ Mahalat adu na Roboam amolenge ota: Yeush, Shemaria na Zaham.

²⁰ Na peko ti Mahalat, Roboam amu Maaka, molenge ti Abishalom ti ga wali ti lo. Maaka adu na lo amolenge osio: Abia, Atai, Ziza na Shelomit.

²¹ Roboam aye Maaka, molenge ti Abishalom, ahon tanga ti awali ti lo kue. Awali ti Roboam so lo ne ala mingi ayeke baleoko na miombe, awali so lo ne ala mingi pepe ayeke baleomene. Lo du amolenge-koli baleuse na miombe, amolenge-wali baleomene.

²² Roboam amu Abia, molenge ti Maaka, ti duti na kozo ndo na ya ti sewa ni, ngbanga ti so lo ye ti sara si Abia aga gbia.

²³ Le ti Roboam ahan; nilaa lo kangbi tanga ti amolenge ti lo ti koli kue na ya ti asese ti Juda na ti Benjamin. Lo kangbi nga ala na ya ti agbata so ngangu gbagba ayeke na tere ni; lo mu na ala gba ti kobe, lo sara veke ti gba ti awali na ala.