2 Mbai 10 - Mbeti ti Nzapa - Tënë so amu fini

MBAI TI AGBIA TI JUDA 10–36 Bongbi ti azo ti Sishem

¹ Roboam ague na Sishem, ngbanga ti so kâ laa azo ti Israel kue aga ti zia lo gbia.

² Me Yeroboam, molenge ti Nebat ama tënë ni na ndembe so lo yeke na Ezipte. Lo gue lani kâ, ngbanga ti so lo kpe gbia Salomon. So lo ma a tene, azo ti Israel abongbi na Sishem, lo londo na Ezipte lo ga.

³ A tokua azo ti iri lo. Tongaso lo na azo ti Israel kue aga si ala tene na Roboam:

⁴ “Lani babâ ti mo asara e tongana angbaa. Fadeso, mo zi mbage ti nengo kungba ni na ndö ti go ti e, tongaso fade e yeke sara kua na gbe ti mo.” –

⁵ Roboam akiri tënë na ala, atene: “Ala kiri aga abaa mbi na peko ti lango ota.” Tongaso azo ni ague.

⁶ Gbia Roboam ahunda wango na *akangba so asara lani kua na babâ ti lo Salomon, na ngoi so Salomon angba na fini. Lo hunda ala, lo tene: “Ti ala, wango ti nyen laa ala lingbi ti mu na mbi titene mbi kiri tënë na azo so?”

⁷ Akangba ni atene na lo: “Tongana mo sara nzoni na azo so, tongana mo sara na ala ye so ala hunda, tongana mo tene nzoni tënë na ala, fade ala yeke sara kua na gbe ti mo lakue.”

⁸ Me Roboam abaa wango so akangba ni amu na lo so tongana mbumbuse ye. Lo gue, lo hunda wango na amaseka so lo na ala akono legeoko si ala yeke sara kua na gbe ti lo.

⁹ Lo tene na ala: “Azo so ahunda na mbi ti zi mbage ti nengo kungba so babâ ti mbi azia lani na ndö ti go ti ala. Ti ala, wango ti nyen laa ala lingbi ti mu na mbi titene mbi kiri tënë na azo so?”

¹⁰ Amaseka so lo na ala akono legeoko so atene na lo: “Azo so atene, babâ ti mo azia nengo kungba na ndö ti go ti ala si ala hunda na mo ti zi mbage ni na ndö ti ala so, tënë so mo yeke tene na ala ayeke so: ‘Kete li ti maboko ti mbi so akono ahon ngbonda ti babâ ti mbi.

¹¹ Babâ ti mbi azia lani nengo kungba na ndö ti go ti ala. Ti mbi, fade mbi yeke zia na ndö ti go ti ala kungba so akiri ane ahon ndoni. Babâ ti mbi apika ala lani na zaza. Ti mbi, fade mbi yeke pika ala na fimbo so wen ayeke na yanga ni.’ ”

¹² Na peko ti lango ota ni, Yeroboam na azo ni kue aga awara Roboam, tongana ti so gbia atene na ala, atene: “Ala kiri aga abaa mbi na peko ti lango ota.”

¹³ Gbia Roboam abaa wango so akangba amu na lo tongana mbumbuse ye; lo kiri tënë na ala sioni sioni.

¹⁴ Lo kiri tënë na azo ni alingbi na wango so amaseka amu na lo, lo tene: “Fade mbi yeke kiri ti zia nengo kungba na ndö ti go ti ala. Mbi wani, mbi yeke zia na ndö ti go ti ala kungba so akiri ane ahon ndoni. Babâ ti mbi apika ala lani na zaza. Ti mbi, fade mbi yeke pika ala na fimbo so wen ayeke na yanga ni.”

¹⁵ Tongaso, gbia ama tënë ti azo ni pepe. Nzapa asara ye ni tongaso titene ye ni asi alingbi na tënë so *KOTA GBIA atene na Yeroboam, molenge ti Nebat na lege ti wayanga-Nzapa Ahia, zo ti kodro ti Silo.

Ya ti kodro-gbia ni akangbi. Roboam, gbia ti Juda

¹⁶ So azo ti Israel kue abaa atene, gbia ama tënë ti ala pepe, ala kiri tënë na gbia, atene: “Nyen laa ayeke na popo ti e na David, nyen? Nyen laa abongbi e na molenge ti Yese, nyen? Azo ti Israel, zo oko oko akiri na da ti lo! Ti mo, *hale ti David, fadeso, mo baa ndo na ndö ti da ti mo!” Na pekoni, azo ti Israel kue akiri na da ti ala.

¹⁷ Roboam angba ti le-gbia gi na ndö ti azo ti Israel so ayeke lango na ya ti agbata ti sese ti Juda.

¹⁸ Tongaso gbia Roboam atokua Hadoram, makonzi ti azo ti sarango kua ti ngangu na mbage ti azo ti Israel ti Banga; me azo ni abo lo na têne si lo kui. Gbia Roboam awara pasa ti ko hio na ndö ti pusu ti mbarata ti lo, lo kpe, lo gue na Jérusalem.

¹⁹ Lege so azo ti Israel ti Banga ake ti duti na gbe ti komandema ti azo ti sewa ti David ngbii asi laso laa.