2 Mbai 1 - Mbeti ti Nzapa - Tënë so amu fini

MBAI TI SALOMON, GBIA TI ISRAEL 1–9

¹ Salomon, molenge ti David asara si lengo-gbia ti lo akpengba; *KOTA GBIA Nzapa ti lo ayeke na lo si amu nengo na lo mingi.

Salomon ahunda ndara na Nzapa

² Salomon abongbi azo ti Israel kue, amakonzi so ayeke na ndö ti aturugu 1 000, ala so ayeke na ndö ti aturugu 100, awafango-ngbanga nga na amakonzi kue ti azo ti Israel, so ti tene amakonzi ti asewa.

³ Salomon na bongbi ti azo ni kue ague na li ti hoto so ayeke na Gabaon, ngbanga ti so da ti bongo so KOTA GBIA na azo ti lo ayeke wara tere daa ayeke kâ. Moïse, zo ti kua ti KOTA GBIA laa aleke ando da ti bongo ni na benyama.

⁴ Me David amu lani sanduku ti *mbuki ti Nzapa na gbata ti Kiriat-Yearim ague na ni na Jérusalem si lo zia na gbe ti da ti bongo so lo sara kâ ndali ni.

⁵ Ti gbalaka so Besalel, molenge ti Uri, ata ti Hur amu bengba wen asara na ni, gbalaka ni ayeke na dawa ti da ti bongo ti KOTA GBIA, na Gabaon. Na ndo so laa Salomon na bongbi ti azo ni ayeke gi KOTA GBIA.

⁶ Kâ, Salomon ague na tere ti gbalaka ti bengba wen, na dawa ti KOTA GBIA, nduru na da ti bongo so KOTA GBIA na azo ti lo ayeke wara tere daa; lo ya anyama saki oko na *sandaga so a yeke gbi ni kue na wâ.

⁷ Gi na bi ni so, Nzapa asi na Salomon si atene na lo: “Hunda na mbi ye so mo ye, fade mbi yeke mu ni na mo.”

⁸ Salomon akiri tënë na Nzapa: “Mo sara nzoni be mingi na babâ ti mbi David si mo zia mbi gbia na plase ti lo.

⁹ Fadeso KOTA GBIA Nzapa, ayeke nzoni mo sara si tënë so mo tene na babâ ti mbi David so, aga taa-tënë. Biani, mo laa mo zia mbi gbia na ndö ti azo so awu mingi tongana fuku ti sese.

¹⁰ Ti fadeso, mu na mbi ndara na hingango ndo titene mbi hinga ti fa lege nzoni na azo so. Tongaso pepe, zo wa laa alingbi ti sara komandema na ndö ti azo ti mo, azo ti mo so ayeke mingi mingi so?”

¹¹ Nzapa atene na Salomon: “Mo hunda pepe ti wara gba ti mosoro, wala anzoni ye, wala gonda, wala kuâ ti awato ti mo; mo hunda nga pepe ti duti na gigi aninga. Me mo hunda ndara na hingango ndo titene mo sara na komandema na ndö ti azo ti mbi so mbi zia mo gbia na ndö ti ala. Ndali ti so be ti mo asara nzara ti aye tongaso,

¹² mbi mu na mo ndara na hingango ndo awe. Na ndö ni, mbi yeke mu na mo mosoro, anzoni ye nga na gonda. Mo yeke wara ni ahon agbia so kue aga kozo ti mo wala ala so ayeke ga na peko ti mo.”

¹³ Tongaso, Salomon alondo na li ti hoto ti Gabaon, na dawa ti da ti bongo so KOTA GBIA na azo ti lo ayeke wara tere daa si lo kiri na Jérusalem. Lo le-gbia na ndö ti azo ti Israel.

Salomon awara ngangu nga na mosoro mingi

¹⁴ Salomon abongbi apusu ti bira nga na ambarata: apusu ti bira ayeke saki oko na ngbangbo osio, ambarata ayeke saki baleoko na use. Lo bata ambeni pusu ni nga na ambarata ni na tere ti lo na Jérusalem; lo bata ambeni na ya ti agbata so a leke ndali ni.

¹⁵ Gbia asara si wen ti nginza na lôro asi singo na Jérusalem tongana têne; lo sara si keke ti sedre asi singo tongana keke ti sikomor na *Kodro-ti-gbeni.

¹⁶ A mu ambarata ndali ti Salomon na Ezipte nga na Silisii si ayeke ga na ala. Azo ti dengo buze ti gbia ague kâ si ayeke vo ala.

¹⁷ Pusu ti bira oko so azo ti dengo buze amu na Ezipte ti ga na ni, ngere ni ayeke ale ti nginza ngbangbo omene; mbarata oko, ngere ni ayeke ale ti nginza ngbangbo oko na baleoku. Azo ti dengo buze ni ayeke ga nga na ni ti ka na agbia ti mara ti Het kue nga na agbia ti sese ti Sirii.

Salomon aleke aye ndali ti sarango na kota da ti Nzapa

¹⁸ Salomon amu yanga titene a sara kota da ndali ti *KOTA GBIA si a sara nga yangbo ndali ti lo wani.