2 Korente 3 - Mbeti ti Nzapa - Tënë so amu fini

Azo ti kua ti fini mbuki

¹ E yeke kiri ti tene nzoni tënë na iri ti e wani? Wala e yeke mu ambeti so atene nzoni tënë na ndö ti e tongana ti so ambeni zo ayeke sara so? E mu ambeti ni ti gue na ni na ala, wala e mu ni na maboko ti ala?

² Ala laa ayeke mbeti ti e, mbeti so a su ni na ndö ti be ti e titene azo kue ahinga si ala diko ni.

³ Biani, ye ni ayeke na hondengo ni pepe: ala yeke tongana mbeti so Christ asu ni si e gue na ni na azo. A su mbeti ni na ngu ti sungo na mbeti pepe, me a su ni na Yingo ti Nzapa, lo so lo yeke na fini; a su ni na ndö ti têne pepe, me na ndö ti be ti azo.

⁴ E yeke tene tënë so, ngbanga ti so e zia be ti e kue na ndö ti Nzapa na lege ti Christ.

⁵ E baa tere ti e pepe, e tene, e lingbi ti sara kua ni na ngangu ti e wani, me e lingbi ti sara kua ni na ngangu so alondo na Nzapa.

⁶ Lo laa lo sara si e ga azo so alingbi ti sara kua ti fini *mbuki so alondo na ndia so a su ni sungo pepe, me so alondo na Yingo-Vuru. Ndia so a su ni sungo ayeke gue na zo na kuâ, me Yingo ayeke mu fini na zo.

⁷ A de atënë ti ndia na ndö ti atêne si gonda ti Nzapa aza ahon ndoni na ndembe ni so. Ndali ti zango ti gonda ni, azo ti Israel alingbi ti baa le ti Moïse pepe, ataa so gonda ni ayeke gi ndali ti kete ngoi. Tongana ndia so ayeke gue na zo na kuâ asara si lo wara gonda ahon ndoni,

⁸ fade kua so Yingo ayeke sara, gonda ni ayeke kiri ti hon gonda ti ndia mingi!

⁹ Tongana kua ti ndia so ayeke fâ fade ngbanga na li ti azo ayeke na gonda mingi, fade kua ti Yingo so ayeke sara si azo aga mbirimbiri na le ti Nzapa ayeke na gonda mingi ahon ndoni!

¹⁰ Gonda so aza ando so, tongana a haka ni na gonda ti fadeso, ayeke mbeni ye oko pepe, so ti tene, gonda ti fadeso ahon ti kozoni.

¹¹ Biani, so ye so ahon hongo ayeke lani na gonda, fade ye so ayeke ngba lakue lakue ayeke na gonda ahon ndoni!

¹² So e zia be ti e kue ti ku nzoni ye tongaso, mbeto ti ye oko asara e pepe.

¹³ E yeke sara ye tongana Moïse pepe so abi ando bongo na le ti lo, tongaso si azo ti Israel alingbi ti baa pepe gonda so ayeke gi ndali ti kete ngoi si ayeke hon hongo.

¹⁴ Me lege ti hingango ndo ti ala akanga ando! Ndani laa, ti londo na ndembe ni so ngbii asi laso, tongana ala yeke diko mbeti ti Kozo Mbuki, bongo ni angba ti kanga le ti ala; a de azi bongo ni so pepe. A yeke zi bongo ni gi na le ti zo so aga oko na Christ.

¹⁵ Ti londo na ndembe ni so ngbii asi laso, azo ni angba lakue ti diko mbeti ti Moïse, me mbeni bongo akanga lege ti hingango ndo ti ala.

¹⁶ Gi tongana zo azia ngbene lege ti sarango ye ti lo ti mu peko ti *Kota Gbia si bongo ni ayeke zi na le ti lo.

¹⁷ Andaa Kota Gbia ayeke Yingo; ndo so Yingo ti Kota Gbia ayeke daa, ye ti zingo zo na gbe ti ngbaa ayeke daa.

¹⁸ E so kue a zi bongo ni na le ti e awe, azo ayeke baa gonda ti Kota Gbia na ndö ti le ti e tongana ti so zo ayeke baa ye na ya ti tatara. Yingo ti Kota Gbia ayeke sara titene e ga nde, e kpa Kota Gbia si gonda ti e ayeke gue guengo lakue na nduzu.