1 Samuel 5 - Mbeti ti Nzapa - Tënë so amu fini

Sanduku ti mbuki ti Nzapa ayeke na ndo ti azo ti Filistii

¹ Azo ti Filistii amu sanduku ti *mbuki ti Nzapa, ala yo ni na Eben-Ezer ti gue na ni na gbata ti Asdod.

² Azo ti Filistii amu sanduku ti mbuki ti Nzapa ague na ni na ya ti da ti nzapa ti ala Dagon; ala zia ni na tere ti Dagon.

³ Na ndade ni, azo ti Asdod alondo na kota ndaperere, ala ye ti baa, Dagon laa ati na sese na dawa ti sanduku ti mbuki ti *KOTA GBIA so. Ala mu Dagon na nduzu, ala kiri na lo na plase ti lo.

⁴ Na mbeni ndade ni, ala londo na kota ndaperere, ala ye ti baa, Dagon laa na sese na dawa ti sanduku ti mbuki ti KOTA GBIA. Li ti Dagon na maboko ti lo use kue afâ si ayeke lango na lingo ti yanga ti gbagba ti da; gi tere ti lo laa angba.

⁵ Ndani laa na gbata ti Asdod, awayango-sandaga na azo so kue ayeke li na ya ti da ti Dagon, ala yeke do ndo ti lingo ti yanga ti gbagba ti da ni na gere ti ala pepe, ngbii asi laso.

⁶ Maboko ti KOTA GBIA asara ngangu na azo ti Asdod mingi. Lo tokua aye ti sioni na tere ti azo ti kodro ni; lo zia kobela ti sukungo ye na tere ti ala; ala na azo so alango nduru na gbata ti ala.

⁷ So azo ti Asdod abaa ye so asi na ala so, ala tene: “Alingbi sanduku ti mbuki ti Nzapa ti Israel angba na ndo ti e pepe. Biani, maboko ti Nzapa ayeke sara ngangu na e mingi, e na Dagon, nzapa ti e.”

⁸ Azo ti Asdod airi agbia kue ti azo ti Filistii ti bongbi na ndo ti ala si ala tene na agbia ni: “Nyen laa e lingbi ti sara na sanduku ti mbuki ti Nzapa ti Israel so?” Agbia ti Filistii akiri tënë: “Ala yo sanduku ni ague na ni na gbata ti Gat.” Tongaso, ala yo sanduku ni ague na ni na Gat.

⁹ Me gi so ala si na ni na Gat awe, maboko ti KOTA GBIA asara ngangu na azo ti gbata ni. Kota mbeto asara ala. KOTA GBIA azia kobela ti sukungo ye na tere ti ala: amolenge na akangba.

¹⁰ Azo ti gbata ni atokua sanduku ti mbuki ti Nzapa na gbata ti Ekron. Me gi so sanduku ni asi na Ekron awe, azo ni adekongo, atene: “A yo sanduku ti mbuki ti Nzapa ti Israel aga na ni na ndo ti e titene afâ e na azo ti e kue!”

¹¹ Azo ti Ekron nga airi agbia kue ti azo ti Filistii ti bongbi si ala tene na ala: “Ala mu sanduku ti mbuki ti Nzapa ti Israel akiri na ni na ndo so lani ayeke daa. Tongaso si afâ e na azo ti gbata ti e kue pepe.” Biani, mbeto ti kuâ asara ala, ngbanga ti so maboko ti KOTA GBIA asara ngangu na ala mingi.

¹² Azo so akui pepe so, Nzapa azia kobela ti sukungo ye na tere ti ala, ala yeke dekongo na mawa si dekongo ni ague ngbii asi na yayu.