1 Samuel 24 - Mbeti ti Nzapa - Tënë so amu fini

David ake ti fâ Saul

¹ David alondo na ndo so si lo gue, lo duti na En-Gedi, mbeni ndo so titene zo asi daa ayeke ngangu.

² So Saul atumba peko ti azo ti Filistii si lo kiri na kodro awe, azo aga atene na lo: “David ayeke fadeso na benyama ti En-Gedi.”

³ Saul amu akpengba turugu saki ota na popo ti aturugu ti Israel kue si lo gue ti gi David na azo ti lo na ndo so abaa le na ndo so a iri ni Têne-ti-angasa-ti-ngonda.

⁴ Saul asi na gbagba ti ataba so ayeke na yanga ti lege. Mbeni du ti têne ayeke kâ. Saul ali na ya ni ti sara puru. Andaa David na azo ti lo ayeke na ngbonda ti du ti têne ni.

⁵ Azo ti David atene na lo: “Lango so *KOTA GBIA atene na mo, atene: ‘Mbi yeke zia wato ti mo na maboko ti mo titene mo sara na lo ye so be ti mo aye so, lango ni alingbi awe.’ ” David alondo si lo fâ yanga ti kota bongo ti Saul gi yeke.

⁶ Na peko ti aye so, be ti David apika mingi, ngbanga ti so lo fâ yanga ti kota bongo ti Saul.

⁷ David atene na azo ti lo: “Ayeke nzoni KOTA GBIA abata mbi si mbi sara sioni na kota zo ti mbi pepe! Biani, Nzapa laa atuku mafuta na li ti lo ti zia lo gbia. Maboko ti mbi so ayeke sara ande sioni na lo oko pepe, ngbanga ti so Nzapa atuku mafuta na li ti lo awe.”

⁸ Na lege ti tënë so, David akanga lege na azo ti lo ti tiri bira na Saul. Saul asigigi na ya ti du ti têne ni si lo gue.

⁹ Na pekoni, David alondo na ya ti du ti têne ni asigigi si lo dekongo na peko ti Saul, atene: “Gbia, kota zo ti mbi.” Saul abaa ndo na peko ti lo. David akuku akpo li ti lo na sese.

¹⁰ David atene na Saul: “Tënë so azo ayeke tene na mo atene, mbi yeke gi lege ti sara sioni na mo so, mo ma ni ngbanga ti nyen?

¹¹ Laso, mo baa na le ti mo wani awe; laso KOTA GBIA azia mo na maboko ti mbi na ya ti du ti têne so. Azo atene na mbi ti fâ mo, me mbi ke si mbi tene: ‘Maboko ti mbi alingbi ti ndu kota zo ti mbi pepe, ngbanga ti so KOTA GBIA atuku mafuta na li ti lo awe.’

¹² Babâ gbia, baa ye! Baa yanga ti kota bongo ti mo laa ayeke na maboko ti mbi so! So mbi fâ yanga ti kota bongo ti mo si mbi fâ mo pepe so, ayeke nzoni mo hinga, mo tene, be ti mbi ayeke sioni na tere ti mo pepe, wala be ti mbi ake mo pepe si mbi sara nga sioni ti ke mo pepe. Mo laa mo yeke tumba peko ti mbi ti fâ mbi.

¹³ Ayeke nzoni KOTA GBIA afâ ngbanga na popo ti mbi na mo. Ayeke nzoni KOTA GBIA akiri peko ti sioni na mo ndali ti sioni so mo sara na mbi so. Me fade maboko ti mbi ayeke ndu mo pepe.

¹⁴ Mbeni *mato ti akotara atene: ‘Azo ti sioni laa ayeke sara ye ti sioni.’ Me fade maboko ti mbi ayeke ndu mo pepe.

¹⁵ Gbia ti Israel ague ti tiri bira na zo wa? Mo yeke tumba peko ti zo wa? Mo yeke tumba peko ti kuâ ti mbo, mo yeke tumba peko ti buba mandere!

¹⁶ KOTA GBIA laa ayeke fâ ande ngbanga na popo ti mbi na mo. Lo yeke baa ya ti tënë so nzoni, lo yeke gbu koko ti mbi, lo yeke fâ ya ti ngbanga so si lo yeke zi mbi na maboko ti mo.”

¹⁷ So David atene tënë so awe, Saul ahunda ndo, atene: “David molenge ti mbi, taa go ti mo laa?” Na pekoni, Saul ati na kota toto.

¹⁸ Lo tene na David: “Mo yeke mbirimbiri ahon mbi, ngbanga ti so mo sara nzoni na mbi, me mbi, mbi sara sioni na mo.

¹⁹ Laso, mo fa nzoni be ti mo na mbi awe. KOTA GBIA azia mbi na maboko ti mo titene mo fâ mbi, me mo fâ mbi pepe.

²⁰ Lakue, tongana mbeni zo awara wato ti lo, fade lo yeke zia wato ti lo ni ahon senge? Oko pepe! Ayeke nzoni KOTA GBIA akiri na mo peko ti nzoni so mo sara na mbi laso so.

²¹ Fadeso mbi hinga awe: mo yeke ga gbia si na ngoi so mo yeke le-gbia, kodro ti Israel ayeke kpengba na maboko ti mo.

²² Fadeso, ayeke nzoni mo deba yanga ti mo na mbi na iri ti KOTA GBIA, mo tene: na peko ti kuâ ti mbi, fade mo yeke fâ *ahale ti mbi pepe; mo yeke zi iri ti mbi na ya ti sewa ti babâ ti mbi pepe.”

²³ David adeba yanga ti lo na Saul. Na pekoni, Saul akiri na ndo ti lo si David na azo ti lo akiri na ndo so ala honde tere ti ala daa.