1 Samuel 23 - Mbeti ti Nzapa - Tënë so amu fini

¹ Mbeni zo ague, atene na David: “Azo ti Filistii ayeke tiri bira na gbata ti Keila si ala yeke nzi ale ti kobe so azo ti gbata ni abata.”

² David ahunda *KOTA GBIA, atene: “Mbi lingbi ti gue ti tiri bira na azo ti Filistii so senge?” KOTA GBIA akiri tënë na lo: “Mo gue, fade mo yeke kinda azo ti Filistii si mo soo azo ti gbata ti Keila na kuâ.”

³ Azo ti David atene na lo: “Na sese ti Juda ge, e yeke na mbeto. Tongana e gue na Keila ti tiri bira na aturugu ti Filistii, fade ye ni ayeke duti tongana nyen?”

⁴ David akiri ahunda KOTA GBIA si KOTA GBIA akiri tënë na lo, atene: “Londo, mo gue na Keila; fade mbi yeke zia azo ti Filistii na maboko ti mo.”

⁵ Tongaso David na azo ti lo ague na Keila si ala tiri bira na azo ti Filistii. Lo mu anyama ti ala si lo fâ azo ti Filistii mingi. Lege so David asoo azo ti Keila na kuâ laa.

⁶ Na ndembe so lani Abiatar, molenge ti Ahimelek akpe si lo gue na tere ti David na Keila so, andaa lo mu *efod, lo gue na ni.

⁷ Azo ague, atene na Saul, atene, David asi na Keila awe. Nilaa Saul atene: “Nzapa azia lo na maboko ti mbi awe, ngbanga ti so lo li na ya ti gbata so gbagba ayeke na tere ni si a kanga yanga ni na angbongboro wen; lo kanga tere ti lo wani awe.”

⁸ Tongaso Saul airi azo ti kodro kue titene ala gue na Keila angoro David na azo ti lo ti tiri bira na ala.

⁹ David ama a tene, Saul aye ti sara sioni na lo si lo tene na wayango-sandaga Abiatar, lo tene: “Ga na efod si.”

¹⁰ David atene: “KOTA GBIA, Nzapa ti Israel, mbi zo ti kua ti mo mbi ma a tene, Saul aye ti ga na Keila ti buba gbata ni ndali ti mbi.

¹¹ Fade akota zo ti Keila ayeke zia mbi na maboko ti Saul? Saul ayeke ga ande biani na Keila tongana ti so mbi zo ti kua ti mo mbi ma tënë ni so? KOTA GBIA, Nzapa ti Israel, kiri tënë na mbi zo ti kua ti mo.” KOTA GBIA akiri tënë, atene: “Lo yeke ga.”

¹² David akiri atene: “Fade akota zo ti Keila ayeke zia mbi na azo ti mbi na maboko ti Saul?” KOTA GBIA akiri tënë, atene: “Azo ni ayeke zia ala na maboko ti lo.”

¹³ Tongaso David na azo ti lo alondo na Keila ti hon, ala gue na ando nde nde. Wungo ti ala kue ayeke nduru na ngbangbo omene. Azo ague, atene na Saul, atene: “David alondo na Keila akpe awe.” So Saul ama tënë so, lo zia ti tokua azo ti tiri bira na gbata ni.

¹⁴ David angba na benyama ti Zif. Lo lango na ya ti du ti têne, na ndö ti ahoto, na ya ti benyama. Saul angba lakue ti gi lo, me Nzapa azia lo na maboko ti Saul pepe.

¹⁵ David ahinga atene, Saul ayeke gi lo ti fâ lo. Nilaa lo ngba na Horsha, na benyama ti Zif.

¹⁶ Mbeni lâ, Jonatan, molenge ti Saul alondo, ague, awara David na Horsha; lo mu wango ti kpengba be ti David na iri ti Nzapa.

¹⁷ Lo tene na David: “Sara mbeto pepe. Fade maboko ti babâ ti mbi Saul ayeke ndu mo pepe. Mo laa mo yeke ga ande gbia ti Israel; mbi si mbi yeke ga na peko ti mo. Babâ ti mbi Saul ahinga ni kue.”

¹⁸ Ala use kue aleke tënë ti *mbuki na popo ti ala na dawa ti KOTA GBIA. David angba ti lo na Horsha si Jonatan akiri na ndo ti lo.

Saul atumba peko ti David

¹⁹ Azo ti Zif ague na tere ti Saul na Gibea si ala tene na lo: “David ahonde tere ti lo na ndo ti e na ya ti du ti têne nduru na Horsha, na ndö ti hoto ti Hakila so ayeke na mbage ti Mbongo ti lando; mo ma tënë ni pepe?

²⁰ Gbia, tongana mo ye ti wara lo fafadeso, mo gue! E laa e yeke gbu lo ti zia lo na maboko ti mo.”

²¹ Saul atene: “Ayeke nzoni *KOTA GBIA asara tufa na ndö ti ala, ngbanga ti so ala baa mawa ti mbi.

²² Tongaso, ala gue, agi nda ti tënë ni nzoni, ala gi ti hinga mbirimbiri ndo so lo yeke daa; ala gi nga ti hinga zo so abaa ndo so lo yeke daa. Mbi ma a tene, le ti lo akpengba mingi.

²³ Ando so kue lo honde tere ti lo daa, ala baa ni nzoni. Na pekoni, ala kiri aga afa na mbi ndo ni mbirimbiri si fade mbi na ala e gue. Tongana lo yeke na ya ti kodro ni, fade mbi yeke gi lo na ya ti kodro ni, mbi yeke gi lo na sese ti azo ti akete mara ti Juda oko oko kue ngbii mbi wara lo.”

²⁴ Azo ni ahon ti gue na Zif kozoni na Saul. David na azo ti lo ayeke na benyama ti Maon so ayeke na mbage ti Mbongo ti lando.

²⁵ Saul na azo ti lo ague ti gi David. Azo ague, atene tënë ni na David. David ague, ali na gbe ti têne so ayeke na benyama ti Maon si lo lango kâ. Saul ama tënë ni si lo tumba peko ti David na benyama ti Maon.

²⁶ Saul na azo ti lo ayeke tambula na tere ti hoto na mbage si David na azo ti lo ayeke tambula nga na tere ti hoto ni na mbeni mbage. David atambula hio hio titene lo kpe na maboko ti Saul. Angba gi kete ka Saul na azo ti lo angoro David na azo ti lo titene agbu ala.

²⁷ Mo ye ti baa, mbeni zo ti tokua aga atene na Saul, atene: “Mo ga hio si. Azo ti Filistii alondo na bira na kodro ni.”

²⁸ Tongaso Saul azia ti tumba peko ti David si lo gue ti tiri bira na azo ti Filistii. Ndani laa a iri ndo so “Têne ti kangbingo tere”.