1 Samuel 22 - Mbeti ti Nzapa - Tënë so amu fini

David aga makonzi ti mbeni bongbi ti azo

¹ David alondo na ndo so, lo kpe, lo gue, lo honde tere ti lo na ya ti du ti têne na Adulam. A-ita ti lo na asewa ti babâ ti lo kue ama tënë ni si ala gue, awara lo.

² Azo so aye ti ngangu asi na ala, azo so yongo ti azo ayeke na li ti ala nga na azo so tere ti ala anzere pepe abongbi na tere ti David si lo ga makonzi ti ala. Wungo ti ala kue ayeke nduru na ngbangbo osio.

³ David alondo na ndo so lo gue na Mispe, na sese ti Moab. Lo tene na gbia ti Moab: “Mbi gbu gere ti mo, zia lege na babâ ti mbi na mama ti mbi ti ga ti duti na tere ti mo ngbii mbi hinga ye so Nzapa ayeke sara ande ndali ti mbi si.”

⁴ David ague na babâ na mama ti lo na dawa ti gbia ti Moab; ala ngba na tere ti gbia ngbii asi na ngoi so kue David ahonde tere ti lo so.

⁵ Wayanga-Nzapa Gad atene na David: “Ngba ti honde tere ti mo na ndo so pepe. Sigigi mo gue na sese ti Juda.” Nilaa David alondo ague na ya ti gbako ti Heret.

Saul afâ awayango-sandaga ti Nob kue

⁶ Saul ama a tene, azo ahinga ndo so David na azo ti lo ayeke daa. Saul ayeke na Gibea, lo yeke duti na gbe ti keke ti tamaris so ayeke na ndö ti mbeni kete hoto. Likongo ti lo ayeke na maboko ti lo si azo ti kua ti lo kue aluti na tere ti lo.

⁷ Saul atene na azo ti kua ni: “Ala, azo ti Benjamin, ala ma mbi nzoni! Fade molenge ti Yese ayeke mu na ala kue ayaka na ayaka ti *vinye tongana ti so mbi mu na ala so? Lo yeke mu ande ala titene ala ga amakonzi na ndö ti aturugu saki oko wala na ndö ti aturugu ngbangbo oko?

⁸ Ngbanga ti nyen si ala kue ayeke leke tënë na tere ti mbi na hondengo ni? So molenge ti mbi na molenge ti Yese ama tere ti ga *ambuki so, zo oko na popo ti ala atene na mbi tënë ni pepe, zo oko abaa mawa ti mbi pepe. So molenge ti mbi ayeke pusu zo ti kua ti mbi ti leke kuku titene mbi ti daa, zo oko ti tene tënë ni na mbi ayeke daa pepe. Ye ni laa e yeke baa laso so.”

⁹ Doeg, zo ti Edom so ayeke lani na popo ti azo ti kua ti Saul akiri tënë, atene: “Mbi baa molenge ti Yese asi na Nob na ndo ti Ahimelek, molenge ti Ahitub.

¹⁰ Ahimelek ahunda *KOTA GBIA ndali ti lo. Lo mu na David kobe ti tengo ni; lo mu nga na lo yongoro zeme ti Goliat, zo ti Filistii.”

¹¹ Tongaso, gbia airi wayango-sandaga Ahimelek, molenge ti Ahitub, lo na asewa ti lo kue so ala yeke awayango-sandaga ti gbata ti Nob. Ala kue aga na ndo ti gbia.

¹² Saul atene na Ahimelek: “Molenge ti Ahitub, mo ma mbi nzoni!” Ahimelek akiri tënë: “Mbi yeke ma mo, gbia.”

¹³ Saul atene na lo: “Mo na molenge ti Yese aleke tënë na tere ti mbi na hondengo ni ngbanga ti nyen? Mo mu na lo kobe, mo mu nga na lo yongoro zeme si mo hunda Nzapa ndali ti lo titene lo leke kuku si mbi ti daa. Ye ni laa e yeke baa laso so.”

¹⁴ Ahimelek akiri tënë na gbia, atene: “Na popo ti azo ti kua ti mo kue, mbeni mbirimbiri zo tongana David ayeke daa? Lo yeke kogara ti gbia, lo ga makonzi ti aturugu ti batango mo, azo ti da ti mo ayeke ne lo mingi.

¹⁵ Gi laso laa mbi to nda ti hunda Nzapa ndali ti lo? Mbi gbu li ti mbi kete pepe ti leke tënë na azo na hondengo ni na tere ti mo! Ayeke nzoni gbia azia tënë na li ti mbi, wala na li ti azo ti sewa ti mbi pepe. Mbi hinga ye oko na ya ti tënë so pepe.”

¹⁶ Gbia atene: “Ahimelek, fade mo yeke kui, mo na azo ti sewa ti mo kue.”

¹⁷ Na pekoni, gbia atene na aturugu ti batango lo so ayeke na tere ti lo so, atene: “Ala gue, afâ awayango-sandaga ti *KOTA GBIA, ngbanga ti so ala nga, ala yeke mu maboko na David. Ala hinga atene lo kpe, me ala tene tënë ni na mbi pepe.” Me azo ti kua ti gbia ni ake titene maboko ti ala andu awayango-sandaga ti KOTA GBIA.

¹⁸ Tongaso gbia atene na Doeg, zo ti Edom, atene: “Gue, mo fâ awayango-sandaga so.” Doeg ague si lo wani, lo fâ awayango-sandaga ni. Na lango ni so, lo fâ azo balemiombe na oku, ala so ayu *efod so a sara na *len.

¹⁹ Na Nob, gbata ti awayango-sandaga, Saul afâ akoli, awali, amolenge na akete molenge so angba ti nyon mê; lo fâ abagara, alele nga na ataba.

²⁰ Gi Abiatar oko, molenge ti Ahimelek, molenge ti Ahitub laa akpe ague na tere ti David.

²¹ Abiatar atene na David atene, Saul afâ awayango-sandaga ti KOTA GBIA.

²² David atene na Abiatar: “So lani mbi baa Doeg, zo ti Edom kâ so, mbi hinga, mbi tene, lo yeke gue ande ti tene peko ti aye so kue na Saul. Ndali ti mbi laa asewa ti mo kue awara kuâ.

²³ Ngba na tere ti mbi ge; sara mbeto pepe. Zo so aye ti fâ mo, andaa lo ye nga ti fâ mbi. Na tere ti mbi ge, mbeni ye ti sara mo ayeke daa pepe.”