1 Samuel 21 - Mbeti ti Nzapa - Tënë so amu fini

¹ Nilaa David amu lege ague si Jonatan akiri na kodro.

David na ndo ti wayango-sandaga Ahimelek

² David asi na kodro ti Nob, na ndo ti wayango-sandaga Ahimelek. Tere ti lo ayeke do dongo si lo ga ti wara David na lege. Lo hunda David: “Mo ga gi mo oko ngbanga ti nyen? Mbeni zo ayeke na tere ti mo pepe ngbanga ti nyen?”

³ David akiri tënë na Ahimelek: “Gbia amu yanga na mbi, atene: ‘Ye so mbi tokua mo ti sarango ni so, ayeke nzoni zo oko ahinga tënë ni pepe.’ Ti amba ti mbi, mbi fa na ala mbeni ndo titene ala ku mbi daa.

⁴ Me nyen laa ayeke na maboko ti mo so? Mu na mbi mapa oku wala mbeni ye so ayeke na maboko ti mo so.”

⁵ Wayango-sandaga ni akiri tënë na David, atene: “Mapa so ayeke na maboko ti mbi so, ayeke senge mapa pepe. Me gi mapa so a zia ni nde ndali ti Nzapa. Tongana azo ti kua ti mo alango fade na wali pepe, ka mbi mu na mo senge.”

⁶ David akiri tënë na wayango-sandaga, atene: “Biani, lakue tongana e londo ka ti gue na bira, a yeke ke na e ti lango na awali. Na ndö ni, tongana mbi londo ti gue na bira, a yeke zia aye ti bira ti azo ti mbi nde ndali ti Nzapa. Tongana lege ti e ti laso ayeke senge lege laa, fade aye ti bira ni ayeke sara si aga *nzoni, ngbanga ti so a mu ni na Nzapa awe.”

⁷ Tongaso wayango-sandaga amu na David mapa so a zia nde ndali ti Nzapa, ngbanga ti so mbeni mapa nde ayeke daa pepe, gi mapa so a mu na sandaga na Nzapa. Andaa azo azia amapa ni na dawa ti *KOTA GBIA si ala kiri azia amapa so angba wâ na plase ni.

⁸ Na lango ni so, mbeni zo ti kua ti Saul ayeke na ya ti da ti KOTA GBIA, ti sara kua na dawa ti Nzapa. Iri ti lo Doeg, zo ti mara ti Edom; lo yeke makonzi ti azo so ayeke bata anyama ti Saul.

⁹ David atene na Ahimelek: “Mbeni likongo wala yongoro zeme ayeke na maboko ti mo ge pepe? Mbi ga na yongoro zeme ti mbi wala aye ti bira ti mbi pepe, ngbanga ti so gbia atokua mbi, mbi londo hio si mbi ga so.”

¹⁰ Wayango-sandaga ni akiri tënë: “Yongoro zeme ti Goliat, zo ti Filistii so lani mo fâ lo na popo-hoto ti Terebente ayeke daa. A kanga ni na ya ti kaba si a zia *efod na ndö ni. Tongana mo ye ti mu ni, mo mu ni senge. Mbeni yongoro zeme nde ayeke na ndo so pepe.” David atene: “Mu na mbi ni, mbeni zeme ti hon ni ayeke daa pepe.”

David ayeke na ndo ti azo ti Filistii

¹¹ Na lango ni so, David alondo akpe yongoro na tere ti Saul. Lo si na ndo ti Akish, gbia ti Gat.

¹² Azo ti kua ti Akish atene na lo: “So David laa pepe? So gbia ti Israel laa pepe? Lo laa awali adodo lani si ahe bia na iri ti lo, atene: ‘Saul afâ azo saki saki, David afâ ti lo azo saki baleoko, saki baleoko?’ ”

¹³ Atënë so agbu be ti David mingi si mbeto ti Akish, gbia ti Gat asara lo mingi.

¹⁴ Tongaso, David asara tere ti lo buba na le ti azo ti Filistii. Lo to nda ti tene tënë kirikiri na popo ti ala; lo yeke sara ambeni nzoroko na tere ti akeke ti yanga ti gbagba ti gbata ni; ngu ti yanga ti lo ayeke yuru na tere ti kua ti yanga ti lo.

¹⁵ Akish atene na azo ti kua ti lo: “Ala hinga kue atene, lo yeke zo ti fuu, ala ga na lo na mbi ngbanga ti nyen?

¹⁶ Azo ti fuu ayeke na mbi ge pepe? Ala kiri aga na lo so titene lo sara ye ti fuu na le ti mbi ngbanga ti nyen? Mara ti zo tongaso so ayeke li na ya ti da ti mbi?”