1 Samuel 2 - Mbeti ti Nzapa - Tënë so amu fini

Anne amu singila na KOTA GBIA

¹ Anne asambela, atene: “Ndali ti *KOTA GBIA, be ti mbi ayeke na ngia mingi; ndali ti KOTA GBIA, kamene ahon na le ti mbi. Mbi lingbi ti zi yanga na awato ti mbi. Be ti mbi anzere mingi ndali ti so mo soo mbi awe.

² KOTA GBIA oko laa ayeke nde si ayeke nzoni kue, mbeni zo ti bata e tongana lo ayeke daa pepe; lo yeke oko kota têne so e luti na ndö ni ti bata tere ti e; mbeni nzapa nde tongana lo ayeke daa pepe.

³ Ala azo, ala ngba ti diko atënë ti baba ti ala pepe; ala zia atënë ti mbana so ayeke sigigi na yanga ti ala. KOTA GBIA ayeke Nzapa so ahinga ye kue; lo laa lo yeke fâ ngbanga ti aye so kue azo ayeke sara.

⁴ Ya ti kokora ti angangu turugu afâ awe; me azo so ngangu ti ala ahunzi biani biani, ala kiri awara ngangu.

⁵ Azo so ayeke te ye lani ya ti ala asi so, ala kiri ayeke gi kua ndali ti kobe ti yanga ti ala. Me azo so lani nzara ahon ndö ti ala, ala yeke wu tere ti ala fadeso. Wali so ya ti lo akanga lani, lo du fadeso amolenge mbarambara. Me wali so adu lani gba ti amolenge, lo yeke kiri ti du fadeso pepe.

⁶ KOTA GBIA laa ayeke sara si zo akui, lo laa lo yeke sara si zo akiri na fini. KOTA GBIA laa ayeke sara si zo azu na ndo ti akuâ, lo laa lo yeke sara si zo asigigi na ndo ti akuâ.

⁷ KOTA GBIA laa ayeke sara si zo aga wayere; lo laa lo yeke mu mosoro na zo. KOTA GBIA laa ayeke zia zo na kete ndo; lo laa lo yeke zia zo na kota ndo.

⁸ Zo so ayeke na ngangu pepe si ayeke lango na ya ti fuku ti sese, KOTA GBIA laa ayeke mu lo na nduzu. Zo ti mawa so ayeke lango na ya ti azende, KOTA GBIA ayeke mu lo ti zia lo na popo ti akota zo. Lo yeke mu azo ti mawa ti zia ala na kota ndo. Agere ti sese ayeke ti KOTA GBIA; lo laa lo leke sese ni na ndö ni.

⁹ KOTA GBIA ayeke bata fini ti azo so aye lo. Me azo so ake tënë ti lo, ala yeke kui na ya ti vukongo ndo. Taa-tënë, zo alingbi ti hon ndö ti aye na ngangu ti lo wani pepe.

¹⁰ Azo so alondo ti tiri na KOTA GBIA, fade lo yeke kungbi ya ti ala. Na nduzu kâ, lo yeke tokua bekpa ti sungba na ndö ti ala. Fade KOTA GBIA ayeke fâ ngbanga ti azo ti sese kue. Lo yeke mu ngangu na zo so lo zia lo gbia; zo so KOTA GBIA asoro lo ti ga gbia, fade lo sara si lo wara ngangu mingi.”

¹¹ Na pekoni, Elkana akiri na da ti lo na kodro ti Rama. Ti molenge ni, lo ngba ti lo ti sara kua na KOTA GBIA na gbe ti wayango-sandaga Heli.

Siokpari ti amolenge ti wayango-sandaga Heli

¹² Amolenge ti Heli ayeke asioni zo mingi. Ala yeke kpe mbeto ti *KOTA GBIA pepe.

¹³ Ala yeke awayango-sandaga; me ye so ala yeke sara na azo ti kodro ayeke so: tongana mbeni zo amu *sandaga na KOTA GBIA, zo ti kua ti wayango-sandaga ayeke ga na ngoi so a yeke to kasa ni. Lo gbu mbeni furshete so yanga ni ayeke ota na maboko ti lo.

¹⁴ Lo yeke yoro furshete ni ti kpo na akasa ni na ya ti tawa, wala na ya ti kota tawa, wala ata nde nde so a yeke to akasa daa. Kasa so furshete ni akpo si asigigi na ni, ayeke ga ti wayango-sandaga. Amolenge ti Heli ayeke sara mara ti ye so na azo ti Israel so kue aga na Silo.

¹⁵ Mbeni ye ni so ala sara ayeke so: tongana mbeni zo amu sandaga si a de ti gbi mafuta ni pepe, zo ti kua ti wayango-sandaga asi. Lo yeke tene na zo so ayeke mu sandaga ni so, lo tene: “Mu ti wayango-sandaga kasa ni na mbi titene a gbi na lo. Lo ye si mo tokua na lo kasa so a to ni tongo pepe, me lo ye gi kasa so angba na fini ni.”

¹⁶ Tongana zo ti mungo sandaga ni atene na lo: “Mo ku a gbi mafuta ni na ndö ti gbalaka kozoni si. Na pekoni, fade mo yeke mu ye so kue be ti mo aye.” Zo ti kua ti wayango-sandaga ni atene: “Mbi ke awe! Mu na mbi kasa ni fafadeso. Tongaso pepe, mbi yeke mu ni na ngangu.”

¹⁷ Siokpari ti amolenge ti Heli ayeke kota mingi na le ti KOTA GBIA, ngbanga ti so ala yeke baa asandaga so azo ayeke mu na KOTA GBIA tongana senge ye na le ti ala.

¹⁸ Me Samuel, so ade molenge ayeke sara kua na le ti Kota Gbia. Lo yu *efod so a sara na *len.

Anne akiri adu ambeni molenge

¹⁹ Na ya ti ngu oko oko, mama ti Samuel ayeke fu mbeni kota bongo ti molenge ndali ti lo. Lo yeke gue na bongo ni na lo na ndembe so lo na koli ti lo ayeke gue ti mu *sandaga na *KOTA GBIA.

²⁰ Heli asara tufa na ndö ti Elkana na wali ti lo, atene: “Ayeke nzoni KOTA GBIA asara si mo na wali so akiri adu amolenge na peko ti molenge so ala mu na KOTA GBIA so.” Na pekoni, Elkana na wali ti lo akiri na da ti ala.

²¹ KOTA GBIA aga ti sara nzoni be na Anne si lo du amolenge-koli ota na amolenge-wali use. Ti Samuel, lo yeke kono na le ti KOTA GBIA.

Heli agboto mê ti amolenge ti lo

²² Heli aga mbakoro mingi. Lo ma tënë ti ye so amolenge ti lo ayeke sara na azo ti Israel kue. Lo ma nga atene, amolenge ti lo ayeke lango na awali so ayeke sara kua na yanga ti da ti bongo so *KOTA GBIA na azo ti lo ayeke wara tere daa.

²³ Tongaso Heli atene na ala: “Ala yeke sara mara ti aye tongaso ngbanga ti nyen? Mbi ma azo ti kodro kue ayeke tene tënë ti sioni sarango ye ti ala.

²⁴ Amolenge ti mbi, ala zia lege ti sarango ye tongaso. Tënë so mbi ma azo ti KOTA GBIA ayeke tene na iri ti ala so ayeke nzoni pepe.

²⁵ Tongana zo asara sioni na mba ti lo, fade Nzapa ayeke gbu koko ti lo. Me tongana zo asara sioni na KOTA GBIA, zo wa laa ayeke gbu ande koko ti lo, zo wa?” Me amolenge ni ama tënë ti babâ ti ala pepe, ngbanga ti so KOTA GBIA aleke na be ti lo ti sara si ala kui.

²⁶ Me kete Samuel angba ti kono, lo ga nzoni na le ti KOTA GBIA nga na le ti azo.

Akpale so ayeke si ande na ya ti sewa ti Heli

²⁷ Mbeni zo ti kua ti Nzapa aga awara Heli si atene na lo: “Tënë so *KOTA GBIA atene ayeke so: Na ngoi so akotara ti mo ayeke ando angbaa ti gbia Faraon na Ezipte, mbi sara si ala hinga mbi mbirimbiri.

²⁸ Na popo ti amara ti Israel kue, mbi soro kotara ti mo Aaron nga na *ahale ti lo titene ala ga awayango-sandaga ti mbi. Nilaa, lo yeke sara kua ti mungo *sandaga na ti zongo dukani na ndö ti gbalaka ti mbi; ala yeke baa mbi ndali ti ambeni ye. Asandaga so kue azo ti Israel aga na ni, mbi mu mbage ni na ala.

²⁹ Ngbanga ti nyen laa mo na amolenge ti mo ayeke baa sandaga ti mbi na ye so mbi mu yanga si azo aga na ni na ya ti da ti mbi, tongana mbeni buba ye na le ti ala so? Ngbanga ti nyen laa mo ne amolenge ti mo ahon mbi? Azo ti mbi so ayeke azo ti Israel aga na mbi anzoni ye ti mu na sandaga. Ngbanga ti nyen laa mo na amolenge ti mo ayeke te ni si ala yeke kono na ni so?

³⁰ Ndani laa, tënë so KOTA GBIA, Nzapa ti Israel atene ayeke so: Taa-tënë, mbi tene ando na azo ti sewa ti mo nga na azo ti kete mara ti mo, mbi tene: Ala laa ayeke sara ande kua na mbi kpu na kpu, me fadeso, mbi ke awe! Mbi yeke ne azo so ane mbi. Me azo so ake mbi si abaa mbi tongana buba zo, fade a yeke baa ala tongana buba zo. So tënë ti yanga ti mbi KOTA GBIA laa.

³¹ Baa, lango titene mbi zi ngangu ti mo na ti azo ti kete mara ti mo kue aga nduru awe. Fade a yeke kiri ti wara mbeni mbakoro na ya ti sewa ti mo pepe.

³² Mo yeke baa mbeni mba ti mo so ayeke duti na ya ti da ti Nzapa, lo yeke sara anzoni ye kue ndali ti azo ti Israel. Me na ya ti sewa ti mo, mbeni mbakoro ayeke duti daa oko pepe.

³³ Fade mbi yeke bata mbeni zo ti sewa ti mo oko nduru na tere ti gbalaka ti mbi titene kota be asara mo si be ti mo angba gi na nduzu. Me tanga ti azo ti sewa ti mo, ala kue ayeke kui tongana asenge zo.

³⁴ “Ye so ayeke fa na mo atene, tënë so mbi tene na mo ayeke taa-tënë ayeke so: Hofni na Pinas, amolenge ti mo use kue ayeke kui gi na ya ti lango oko.

³⁵ Na pekoni, fade mbi yeke soro mbeni wayango-sandaga so ayeke sara ye na legeni. Lo yeke sara ande ye so anzere na mbi nga na ye so be ti mbi aye. Mbi yeke sara titene ahale ti lo aduti awayango-sandaga lakue. Zo ti mbi so mbi yeke soro lo titene lo ga gbia, fade ala sara kua na lo.

³⁶ Tongana mbeni zo ti sewa ti mo oko angba na fini, fade lo yeke ga ti kuku na gbe ti wayango-sandaga ti hunda na lo kete pata, wala mbeni kete mapa. Fade lo yeke tene na wayango-sandaga ni, lo tene: ‘Mbi gbu gere ti mo, mu na mbi mbeni kua ti wayango-sandaga titene mbi sara si mbi lingbi ti wara mbeni kete kobe ti tengo ni maa!’ ”