1 Samuel 18 - Mbeti ti Nzapa - Tënë so amu fini

¹ Gi so David ahunzi ti tene tënë na Saul awe, Jonatan aye David; lo ye David tongana ti so lo ye na tere ti lo wani.

² Na lango ni so Saul abata David na tere ti lo, lo zia lege na David ti kiri na babâ ti lo pepe.

³ Tongaso, Jonatan na David aleke tënë na popo ti ala, ngbanga ti so Jonatan aye lo tongana ti so lo ye na tere ti lo wani.

⁴ Jonatan azi kota bongo so lo yu, lo mu na David. Lo mu nga na David abongo ti lo ti turugu; ataa yongoro zeme ti lo, kokora ti lo na kamba ti lo so lo yeke kanga na ndö ti bongo, lo mu nga na David.

⁵ Ndo so kue Saul ayeke tokua David daa ti tiri bira, David ayeke so benda. Saul azia lo na li ti azo ti bira kue. Azo ti kodro kue na azo ti gbe ti Saul aye tënë ti lo.

Saul atara ti fâ David

⁶ Na peko ti so David afâ Goliat, zo ti Filistii si lo na aturugu ayeke kiri na kodro, awali alondo na ya ti agbata ti Israel kue ti gue ti wara gbia Saul. Ala yeke he bia, ala yeke dodo, ala yeke pika ngo, ala yeke pika mozoko, ala dekongo na ngia.

⁷ Awali ni abongbi yanga oko, ala yeke na ngia si ala yeke he bia, atene: “Saul afâ azo saki saki, David afâ ti lo azo saki baleoko, saki baleoko.”

⁸ Ngonzo agbu Saul mingi. Atënë ti ya ti bia ni anzere na be ti lo pepe. Lo tene: “Ala tene, David afâ azo saki baleoko si mbi fâ ti mbi gi azo saki oko. Angba gi titene ala mu lo gbia ti kodro ni!”

⁹ Gi na lango ni so Saul ato nda ti baa David na sioni le.

¹⁰ Lango oko na pekoni, Nzapa atokua sioni yingo na tere ti Saul si lo yeke diko atënë kirikiri na ya ti da ti lo. David apika kundi ti lo tongana ti so lo sara kozo, Saul ayeke na likongo ti lo na maboko ti lo.

¹¹ Saul ayo likongo ni na nduzu si lo tene na be ti lo, lo tene: “Fade mbi yeke kpo David, mbi pete lo na tere ti dere ti da.” Me fani use, David akpe na le ti likongo ni.

¹² Saul asara mbeto ti David, ngbanga ti so Saul ahinga atene, *KOTA GBIA ake lo awe si lo yeke na David.

¹³ Saul azia David makonzi na li ti aturugu saki oko titene lo tumba lo yongoro na tere ti lo. Tongaso, David ayeke na li ti aturugu ni, ala yeke gue na bira, ala yeke kiri.

¹⁴ Na ya ti abira so kue David ayeke gue daa, lo yeke so benda, ngbanga ti so KOTA GBIA ayeke na lo.

¹⁵ So Saul abaa David ayeke so benda mingi, mbeto ti David ayeke sara lo sarango.

¹⁶ Me azo ti Israel kue na azo ti Juda aye David, ngbanga ti so lo laa lo yeke luti na li ti ala na guengo ti ala na bira nga na kiringo ti ala.

David amu Mikal, molenge ti Saul ti ga wali ti lo

¹⁷ Saul atene na David: “Baa, Merab, kozo molenge ti mbi ti wali laa; mbi yeke mu lo na mo titene lo ga wali ti mo. Gi ye oko, sara kua ti mbi ngangu, mo tiri bira ndali ti *KOTA GBIA.” Andaa Saul ayeke tene na be ti lo, atene: “Mbi wani laa mbi yeke fâ lo pepe; ayeke nzoni azo ti Filistii laa afâ lo.”

¹⁸ David akiri tënë na Saul: “Mbi yeke ti mbi zo wa? Asewa ti mbi, na mara ti babâ ti mbi so ayeke na Israel ayeke nyen si mbi ga kogara ti gbia so?”

¹⁹ Me na ndembe so ala ga nduru ti mu Merab, molenge ti Saul titene lo ga wali ti David, ala kiri amu lo titene lo ga wali ti Adriel, zo ti gbata ti Abel-Mehola.

²⁰ Andaa Mikal, mbeni molenge ti Saul ti wali aye David. A tene tënë ni na Saul si tënë ni anzere na lo.

²¹ Saul atene na be ti lo, atene: “Fade mbi yeke mu na lo Mikal titene lo ga tongana kuku si azo ti Filistii alingbi ti zia maboko na ndö ti David.” Nilaa, fani use, Saul atene na David: “Laso, mo yeke ga kogara ti mbi.”

²² Saul amu yanga na azo ti gbe ti lo, atene: “Ala tene na David na hondengo ni, atene: ‘Gbia aye tënë ti mo si e azo ti gbe ti lo kue, e ye mo. Ayeke nzoni mo yeda ti ga kogara ti lo.’ ”

²³ Azo ti gbe ti Saul atene atënë so kue na David. David atene na ala: “Titene zo aga kogara ti gbia, ayeke ye ti ngia na le ti ala? Mbi, mbi yeke ti mbi wayere, mbi yeke senge zo.”

²⁴ Azo ti gbe ti Saul ague, atene na lo peko ti tënë so David atene so.

²⁵ Saul atene: “Ala tene na lo, atene: ‘Gbia ahunda titene mo ka nginza na peko ti wali ni pepe. Me lo hunda gi *pito ngbangbo oko ti azo ti Filistii tongana kiringo peko ti sioni na awato ti lo.’ ” Saul aleke fade ye kue titene David ati na maboko ti azo ti Filistii.

²⁶ Azo ti gbe ti Saul atene peko ti tënë ni na David. David ayeda na tënë ni si lo ye ti ga kogara ti gbia. Lango so a fa so ade ti lingbi pepe,

²⁷ David na azo ti lo alondo ti gue ti tiri bira na azo ti Filistii si lo fâ ala ngbangbo use. David aga na apito ni, azo adiko na dawa ti gbia titene David aga kogara ti gbia. Tongaso Saul amu molenge ti lo ti wali Mikal ti ga wali ti David.

²⁸ Saul abaa si lo hinga atene, KOTA GBIA ayeke na David si molenge ti lo ti wali Mikal aye David.

²⁹ Mbeto ti David akiri asara Saul ahon ndoni si lo ga wato ti David biani biani.

³⁰ Amakonzi ti aturugu ti Filistii ague ti tiri bira na azo ti Israel. Na ya ti abira ni oko oko kue, David laa ayeke so benda ahon aturugu ti kota kamba ti Saul kue; nilaa iri ti lo awu mingi.