1 Samuel 14 - Mbeti ti Nzapa - Tënë so amu fini

Jonatan atiri bira na bongbi ti aturugu ti Filistii

¹ Mbeni lâ, Jonatan, molenge ti Saul atene na zo so ayeke yo aye ti bira ti lo, atene: “Ga, e gue na ndo so azo ti Filistii aduti daa, na mbage kâ so.” Me Jonatan atene tënë ni na babâ ti lo pepe.

² Saul aduti na maka ti Gibea na gbe ti keke ti grenade so ayeke na kodro ti Migron. Aturugu nduru na ngbangbo omene ayeke na tere ti lo.

³ Mbeni wayango-sandaga aluti kâ, lo yu *efod; iri ti lo ayeke Ahia. Lo yeke molenge ti Ahitub, Ahitub ayeke ita ti Ikabod. Ikabod ayeke molenge ti Pinas, Pinas ayeke molenge ti Heli so ayeke wayango-sandaga ti *KOTA GBIA na kodro ti Silo. Aturugu ahinga tënë ti hongo ti Jonatan pepe.

⁴ Lege so Jonatan amu ti gue ti tiri na azo ti Filistii so, akota têne use so yanga ni ayo yongo ayeke daa mbage na mbage. Iri ti mbeni ayeke Boses, iri ti mbeni ayeke Sene.

⁵ Oko têne ni ayeke na mbage ti Banga si abaa le na Mikmas; mbeni têne ni ayeke na mbage ti Mbongo si abaa le na Geba.

⁶ Jonatan atene na zo so ayeke yo aye ti bira ti lo, atene: “Ga, e gue na ndo so aturugu ti Filistii so ahinga Nzapa pepe so ayeke daa. E hinga pepe, KOTA GBIA ayeke sara nzoni ye ndali ti e. Ataa e yeke mingi wala e yeke mingi pepe, mbeni ye ayeke daa pepe ti kanga lege na KOTA GBIA ti sara si e so benda.”

⁷ Zo so ayeke yo aye ti bira ti lo akiri tënë na lo: “Sara ye ti be ti mo. Hon na dawa, mbi yeke ngba na tere ti mo tongana yingo ti mo.”

⁸ Jonatan atene: “Fadeso e yeke gue na mbage ti azo ni; e fa tere ti e na ala.

⁹ Tongana ala tene na e: ‘Ala luti; ala ku, e ga, e wara ala si!’, fade e yeke luti gi na plase ni so, e yeke gue na mbage ti ala pepe.

¹⁰ Me tongana ala tene: ‘Ala ga na mbage ti e!’, fade e yeke gue; so ti fa atene, KOTA GBIA azia ala na maboko ti e awe.”

¹¹ Tongaso, ala use kue ague si azo ti Filistii abaa ala. Azo ti Filistii atene: “Baa, ahebro so lani ahonde tere ti ala na ya ti adu so laa ayeke sigigi so.”

¹² Aturugu ni airi Jonatan na zo so ayeke yo aye ti bira ti lo, atene: “Ala ga na mbage ti e ge; e yeke na mbeni tënë ti tene na ala.” Jonatan atene na zo so ayeke yo aye ti bira ti lo so, atene: “Mu peko ti mbi; KOTA GBIA azia ala na maboko ti azo ti Israel awe.”

¹³ Jonatan ahara harango ti gue na mbage ti ala; zo so ayeke yo aye ti bira ti lo amu peko ti lo. Azo ti Filistii ati na gbe ti Jonatan si zo so ayeke yo aye ti bira ti lo ayeke fâ ala na peko ti lo biani biani.

¹⁴ Na ya ti kozo tingo ni so, Jonatan na zo so ayeke yo aye ti bira ti lo afâ azo ti Filistii nduru na baleuse, na ndo so akono mingi pepe.

¹⁵ Aturugu ti Filistii so angba na ya ti bâbâ nga na azo so ayeke na tere ti bâbâ ni, kota mbeto agbu ala. Ataa aturugu ti batango ndo, na ala ti bubango ndo, kota mbeto ahon ndö ti ala kue. Sese ayingi si kota mbeto ti Nzapa agbu ala.

¹⁶ Asanziri ti Saul so ayeke na Gibea, na sese ti Benjamin abaa gba ti azo ti Filistii so akangbi si ala yeke kpe kirikiri.

¹⁷ Saul atene na azo so ayeke na tere ti lo: “Ala diko azo ti baa zo wa laa ayeke na popo ti e pepe!” A diko azo ni, ala baa so Jonatan na zo so ayeke yo aye ti bira ti lo ayeke daa pepe.

¹⁸ Saul atene na Ahia: “Mu sanduku ti *mbuki ti Nzapa, mo ga na ni.” Biani, na lango ni so sanduku ti mbuki ti Nzapa ni ayeke na ya ti bâbâ ti azo ti Israel.

¹⁹ So Saul angba ti tene tënë na wayango-sandaga Ahia so, wusuwusu akiri alondo ngangu na ya ti bâbâ ti azo ti Filistii. Saul atene na wayango-sandaga ni: “Kiri mo hunda Nzapa pepe!”

²⁰ Saul na aturugu ti lo abongbi tere si ala gue na ndo so bira ni ayeke daa. Ala baa so wusuwusu ahon ndoni si azo ti Filistii ayeke fâ tere na popo ti ala kirikiri.

²¹ Ambeni hebro asara kua kozo na gbe ti azo ti Filistii si ala na azo ti Filistii ni ague na bira. Fadeso azo ni amu peko ti azo ti Israel so abongbi na Saul nga na Jonatan.

²² Azo ti Israel so kue ahonde tere ti ala lani na sese ti Efraim, ndo so ahoto ayeke daa, ama a tene, azo ti Filistii akpe kirikiri, ala nga alondo ti tumba peko ti azo ti Filistii ni, ti tiri bira na ala.

²³ Na lango ni so, KOTA GBIA asara si azo ti Israel aso benda. Bira ni ague ngbii asi na peko ti Bet-Aven kâ.

Aturugu ti Israel asoo Jonatan na kuâ

²⁴ Na lango ni so, azo ti Israel abaa pasi mingi. Andaa Saul adeba ala, atene: “Tongana mbeni zo ate kobe kozoni si lâ akui, kozoni titene mbi sara sioni na awato ti mbi, deba aga na ndö ti lo!” Nilaa, zo oko azia mbeni ye na yanga ti lo pepe.

²⁵ Azo ni kue ali na ya ti gbako, mafuta ti wotoro ayeke na sese.

²⁶ So azo ni asi na ya ti gbako ni awe, ala baa mafuta ti wotoro so ayeke yuru yurungo. Me zo oko amu ni ti zia na yanga ti lo pepe, ngbanga ti so ala sara mbeto ti dengo ba ti Saul.

²⁷ Me Jonatan ahinga pepe atene, babâ ti lo adeba azo ni. Keke so ayeke na maboko ti lo, lo yoro yanga ni na ya ti mafuta ti wotoro ni si lo zia na yanga ti lo. Na pekoni, lo kiri lo wara ngangu.

²⁸ Mbeni turugu oko atene na lo: “Babâ ti mo adeba azo, atene: ‘Zo so ate kobe laso, deba aga na ndö ti lo!’ Nilaa, azo kue awoko so.”

²⁹ Jonatan atene: “Babâ ti mbi aga na kpale na kodro awe! Ala baa, so mbi tara mafuta ti wotoro ni kete so, mbi kiri mbi wara ngangu.

³⁰ Tongana aturugu ate fade aye so ala gbu na peko ti bira na maboko ti awato ti ala laso, ka ala sara sioni mingi na azo ti Filistii ahon ti so ala sara so!”

³¹ Na lango ni so, azo ti Israel afâ azo ti Filistii, ti londo na Mikmas ngbii asi na Ayalon. Aturugu ti Israel awoko kue.

³² Ala tuku na ndö ti aye so ala gbu na peko ti bira. Ala mu ataba, angasa, abagara nga na akete bagara. Ala fâ anyama ni na ndö ti sese si ala te ni gi na ndo so mene ti anyama ni atuku daa.

³³ Mbeni zo atene tënë ni na Saul, atene: “Azo ni asara siokpari so ake *KOTA GBIA, ala te anyama gi na ndo so mene ti anyama ni atuku daa.” Saul atene: “Ala sara mbana ti buba lege ti ndia! Ala rule mbeni kota têne aga na ni na mbi fafadeso.”

³⁴ Na pekoni, Saul atene: “Ala gue na popo ti azo ti kodro si ala tene na ala: ‘Ayeke nzoni zo oko oko aga na mbi bagara ti lo, taba ti lo. Fade ala yeke fâ anyama ni si ala yeke te ni na ndo so; tongaso si ala sara siokpari ti ke KOTA GBIA pepe, na tengo kobe na ndo so mene atuku daa.’ ” Na bi ni so, zo oko oko aga na bagara ti lo so lo yeke na ni si a fâ ni na ndo so.

³⁵ Tongaso, Saul asara gbalaka ndali ti KOTA GBIA. So ayeke kozo gbalaka so lo sara ndali ti KOTA GBIA laa.

³⁶ Saul atene: “E gue na bi so, e tumba peko ti azo ti Filistii, e mu aye ti ala ngbii asi na ndaperere. E fâ ala kue, e zia zo oko angba na fini pepe.” Aturugu akiri tënë: “Sara ye so kue be ti mo aye.” Me wayango-sandaga atene: “E hunda Nzapa na ndo so kozoni si.”

³⁷ Saul ahunda Nzapa, atene: “Ayeke nzoni mbi gue, mbi tiri bira na azo ti Filistii? Fade mo yeke zia ala na maboko ti azo ti Israel?” Na lango ni so, Nzapa akiri tënë na lo pepe.

³⁸ Tongaso Saul airi amakonzi kue ti ga nduru na tere ti lo, lo tene: “Ala gi mbirimbiri ti hinga siokpari wa laa a sara ni laso.

³⁹ KOTA GBIA, wasongo azo ti Israel ayeke na fini! Ataa molenge ti mbi Jonatan laa asara siokpari, fade a yeke fâ lo.” Na popo ti aturugu kue, zo oko akiri tënë na lo pepe.

⁴⁰ Saul akiri atene na azo ti Israel kue: “Ti ala, ala luti na mbage; mbi na molenge ti mbi Jonatan, e luti na mbage.” Azo ni atene na Saul: “Sara ye so be ti mo aye.”

⁴¹ Saul atene na KOTA GBIA: “Nzapa ti Israel, fa na e nda ti ye so mbirimbiri.” Ye so ala bi ti hinga zo wa laa asara siokpari so, ye ni afa Jonatan na Saul. Ye ni afa so aturugu ti Israel ayeke na ya ni oko pepe.

⁴² Saul atene: “Ala bi ye ti baa tënë ni na popo ti mbi na molenge ti mbi Jonatan.” Ye ni afa Jonatan.

⁴³ Saul atene na Jonatan: “Fa na mbi peko ti ye so mo sara so.” Jonatan afa na lo peko ti ye ni, atene: “Mbi mu kete mafuta ti wotoro na yanga ti keke so lani ayeke na maboko ti mbi so si mbi tara ni. Mbi laa! Mbi yeke nduru ti kui fafadeso.”

⁴⁴ Saul atene: “Tongana mo kui pepe, ayeke nzoni Nzapa asara ye ti ngangu mingi na mbi!”

⁴⁵ Me aturugu atene na Saul: “Jonatan so asara si azo ti Israel aso benda so, fade lo yeke kui biani? Tongana e fâ lo, so ayeke sioni ye mingi. KOTA GBIA ayeke na fini! E yeke yeda titene kua ti li ti Jonatan oko ati na sese pepe, ngbanga ti so lo na Nzapa laa asara ye so laso!” Tongaso aturugu asoo Jonatan na ya ti kuâ.

⁴⁶ Saul azia lege ti tumbango peko ti azo ti Filistii si ala kiri na kodro ti ala.

Saul aso benda

⁴⁷ Gi so Saul aga gbia ti Israel awe, lo tiri bira na awato ti lo kue so angoro lo: azo ti Moab, azo ti Amon, azo ti Edom, agbia ti Soba nga na azo ti Filistii. Na ndo so kue lo hon daa, lo so benda.

⁴⁸ Lo fa ngangu ti lo na lege so lo so benda na ndö ti azo ti Amalek si lo zi azo ti Israel na gbe ti azo ni so lani ayeke nzi aye ti ala so.

⁴⁹ Iri ti amolenge ti Saul ti koli ayeke so: Jonatan, Ishevi na Malkishua. Iri ti amolenge ti lo ti wali ayeke so: Merab, kozo molenge ni na Mikal, ngambe ni.

⁵⁰ Iri ti wali ti Saul ayeke Ahinoam; Ahinoam ayeke molenge ti Ahimaas. Iri ti makonzi ti aturugu ti lo ayeke Abner; Abner ayeke molenge ti Ner; Ner ayeke babâ-kete ti Saul.

⁵¹ Kish ayeke babâ ti Saul si Ner ayeke babâ ti Abner; ala use kue ayeke amolenge ti Abiel.

⁵² Na ngoi so kue Saul ayeke gbia, lo tiri bira ngangu na azo ti Filistii. Lakue tongana lo baa mbeni zo ti ngangu wala mbeni zo so ayeke sara mbeto pepe, lo yeke mu zo ni ti ga turugu ti lo.